TALATUU O LE POGAI NA MAUA AI E FUNEFE’AI LE AO O TAGALOA MO IA MA LONA AIGA

1409 Hits

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer.


O Funefe’ai o le atalii o Vaasiliifiti sa nonofo ma Sinaalana le afafine o Lataisaotele, O Sina lena fai mai o se tamaitai lalelei tele. Ua mana’o i ai Tagaloa e fai mona faletua ona o le lalelei tele o le tamaitai. O le pogai lea na alu ai Tagaloa ia Fune-ma folafola i ai lona suafa e avatu mo ia pe afai na te tosina mai Sina e fai ma ana avā.

E le gata i le suafa o Tagaloa-a ua foloafola atu ma ona tafa’i e nonofo i lona itu taumatau ma le itu tauagavale ma a latou launiu e faamalumalu a’i (Taulauniu mai le Lagi).

O Tafa’i nei e to’avalu-o Sae ma Fataloto mai Vaiafai (Iva); o Tugaga ma Tagaloasataoa mai Safune; o Gale ma Tuiasau mai Vaisala (Asau), ma Mata’afā ma Taliva’a mai Sili (Tufu).Ua mana’o tele Fune i le suafa o Tagaloa-ma ua na talia le faatau, ma na talu mai ai ona ta’ua na nu’u e fa o Safune-o le Aiga o Fune poo le Fale o Fagafua.

 

O LE FAIGA-MALO O UPOLU-E AFUA MAI IA PILI’A’AU MA ONA ATALII E TO’AFA.

E pei o Aperaamo anamua le tupu’aga o Iutaia- e faapena le manatu ia Pili lea ua avea ma tupuaga o Samoa.

E i ai isi igoa sa faaigoa ai o ia e pei o Pilitavave, Piliuli, Pilipa’ū, Pilitaimalelagi, Pili’opo ma isi lava igoa. E matua faaletonu lava le gafa o Pili-ma e eseese uma lava tala, ae o le a faaalia iinei na o ni tala se lua. O le tala muamua e mai Manu’a, ae o lona lua- o le tala a Samoa i Sisifo.

O le Tala muamua fai mai o Pega ma Pega ma le la fanau e to’atolu- e to’alua tama ma le teine o Sina. O le ulumatua o Pilimoelagi-ma o lona igoa ua ta’u mai ai sa mau o ia i le lagi, ae o lona uso o Pilimoevai-sa mau i le vaitaele o la matua i Lefagā.

O le pogai lena sa faasa ai e Pega ma Pega le la tama teine- e ‘aua ne’i alu e taele i lena vai. Ae ui o lea-ua o’o i le tasi aso-ua lagona e Sina le mana’o tele e fia taele i lea vai faasaina, ma ua i’u ina la feiloa’i ai ma Pilimoevai. Ua iloa e Sina ua uma lona mamalu-ona sola ai lea i Lefagā i le Aualuma a Fiti-uta. O le pogai lea ua faaigoa ai le vai na tupu ai lea mea o le “Punafofoa.” Na nonofo Sina ma Pulele’i’ite i Fitiuta ma maua ai le la fanau.

Ae peitai-sa mulimuli atu pe Pilimoevai i le teine i Manu’a, ma nofo ai e lata i le fale o Sina i le vai e igoa o Vailega. E masani Sina ona alu pea i aso uma e ta’ele ai ma u’u ai lona tino i le lega. O lana masani lena ua faaigoa ai lea vai-o Vailega. E le’i iloa e Sina na mulimuli atu lona tuagane o Pilimoevai ia te ia i Manu’a. Ona alu lea o ia i le tasi aso e taele i Vailega e pei ona masani ai. Ona lavea ai lea o ia i le apevai a Pilimoevai.

Na iloa e Pulelei’ite le mea ua tupu-ona ia valaauina lea o Pili e sau i lo la fale. Na alu ane Pili i le fale ma ua fai ai lana mavaega ia Sina e faapea:-A fanau Sina-ia faaigoa e Puleleiite lana tama  o Pili.

Ua matua lea tama –ua aliali mai lona fiafia tele i le fagota. E musu ai lona tina-ma e faalavelave pea i ai pe a sauni le tama e alu e fagota. Ae le mafai lava Pili. Ona sola ai lea i Faalava ma nonofo faatasi ai ma Tuita’ū. Ua masesei ma Tuita’ū ona alu lea i Faganeanea (poo Fagasameme); na ia tuua ina ae alu i Mulinuu (Faleasao), ona oso lea i le sami ma aau i Vatia i Tutuila lea na feagai ai o ia ma nisi o mea faigata-ona aau ai lea o Piliaau i Savaii ma nofo i Aopo i nisi aso ma ua faaigoa ai o Pili’opo. Fai mai foi isi o Leopili ma Pilisosolo o tupuaga ia o Pili. 

© Samoa Observer 2016

Developed by Samoa Observer in Apia