O LA’U TALA FO’I

133 Hits

1. Matauina i Tala Fou le lagolago a le atunuu atoa i le faamoemoe o le alo o Samoa o Lupesoli’ai Joseph Parker! E moni lava le upu i le titi fai-tama o Samoa talu ai e fesoota’i uma tagata Samoa i le so’o-tino ma le so’o-toto! E ui lava ina faapea ua taunuu manuia lea faamoemoe-ae le o se upu e avane ai le lauiloa ai o Samoa i le lalolagi atoa ona o lenei faamoemoe-ma o se unaiga foi lea tau Turisi e tafafao mai i Samoa! Afai la o le tulaga lea o loo i ai taaloga uma o loo aofia ai alo ma fanau a Samoa-a faapefea la ona le fia o mai tagata mai atunuu ese i Samoa? Ia faafetai o lea ua tini taunuu le faamoemoe-ma e momoli atu ai foi le faamalo ma le faafetai i le atunuu ma lana lagolago i lenei faamoemoe ua a’e ma le malo-ua lau-manu’ia ai Samoa i le lalolagi atoa! Ia o lea ua i’u manuia le taumafaiga a Lupesoli’ai Joseph Parker-a mafai la ona toe faaluaina e le Manu Samoa Ta’ito’afitu ma le Manu Samoa Sefulu-lima-o ai a lē fia Samoa? O le a la sou taofi?

 

2. Matauina foi i Tala Fou se isi galuega tele o loo fuafuaina mo le eletise-ma o lea eletise fai mai e le o se eletise mai le suavai-ae o le eletise mai le malosi toe faafouina poo le “Renewable Energy. “ Afai la o se fuafuaga lea ua fai e se tasi o kamupani-e peiseai o le tulaga lea ua leva ona tatau ona fai! Ua leva aso o tatou faamoemoe lava i le eletise mai le suavai-ma a faaletonu foi le suavai-ua le maua foi e tagata se eletise. A tu’u mai la i ona po nei-e peiseai o lea ua vili le tatou eletise mai le suau’u-ma o lea suau’u- o loo totogi e tagata o le atunuu-toe totogi ma le aitalafu a le Malo-toe totogi foi e tagata o le atunuu a latou pili o moli! O le taua la o lenei fuafuaga fou-ia maua ai e le atunuu se eletise taugofie ma le faatuatuaina. Ae o le itu taua lava-o le i ai lea o se tauvaga a kamupani fai-eletise ina ia taugofie ai totogi o le eletise e faaaoga e tagata.O le tatalo la-ia vave tino mai le fuafuaga a lea kamupani-ina ia maua ai se faamāmā avega i le atunuu! O le a sou taofi? 

 

3. Matauina foi i Tala Fou fai mai ua una’ia le Malo o Niu Sila e fesoasoani mai i le Maketi i Savalalo! E le o manino mai poo le a le mafuaga-ae peiseai o soo se mea lava e tupu i Samoa –o fafo lava e tua i ai! O le fesili la-sa faapefea ona faagaoioi le Maketi i Savalalo? Afai sa totogi e tagata o le atunuu sa faaaogaina lea nofoag ni tupe-o fea la o ave i ai ia tupe? Afai o le SLC poo le Faalapotopoga o Eleele a Samoa sa totogi i ai e tagata faipisinisi sa faaaogaina le Maketi i Savalalo-o fea la o i ai ia tupe? O tupe ia e tatau ona tapa i ai i le taimi nei! Ae afai la ua nimo atu ai foi ma tupe o le Maketi i Savalalo i le fausia o le nofoaga autu o le Faalapotopotoga o Eleele a Samoa i Tuana’imalo-ua tatau la ma onomea ona fai se su’esu’ega pe o fea ua ave i ai ia tupe! Afai ua talosagaina Niu Sila e fesoasoani mai i le Maketi i Savalalo-o lona uiga la-ua matua gau aano lava le Malo o Samoa-ma e aliali mai-o le mea lava lea o le a alu ai le Malo o Samoa- o le faalagolago i isi atunuu e fesoasoani mai, ae fuli latou e faaalu tupe a le atunuu ia latou faiga pi’opi’o ia e faitau miliona ma miliona tupe a le atunuu ua liu-suavai ai! O le a sou taofi? 

 

4. Toe matauina foi i Tala Fou se tasi o Tamaitai Savaii-o loo tauva mo le faiga-palota o loma nei-ma ua na ta’utino mai mea uma lava ma le pogai o lona fia tauva mo le Palota ia Mati o le tausaga nei.! Ia afai o Samoa o le atunuu e pulea faa-temokalasi-o le a le leaga o lea tulaga? Ua loa tausaga o faafoe e le itupa o alii le Malo o Samoa-ae leai lava se taimi ua tulai mai ai se tamaitai i le foe o le Malo! O le mea lea-afai ua loa ona faafoe mai e alii le malo o Samoa-faamata la e le o se mea amiotonu ona tuu loa le avanoa i tamaitai i lenei taimi? E le faapea e le’i a’o’oga ia tamaitai-sa galulue foi isi i tulaga maualuga tau galuega. Afai o lea ua savali le 40 tausaga o faafoe e le HRPP le atunuu-ae o lenei lava e matitiva ma pologa-faamata la e le o le taimi lenei ua tatau ai loa ona tulai ai se tamaitai na te ta’ita’ia le Malo o Samoa! Ia-atonu e manatu nisi-o se mea fou lea-ae a tatou toe tilotilo i tua ma le afuaga o Samoa-o tama’itai lava sa faafoeina le atunuu-lea foi na pogai ai ona ta’oto le atunuu i lago tonu! E le o se mea fou la i tamaitai le faafoeina o se malo-ma e le faapea a Malo Faa-Polokiki –ona le mafai ai lea e tamaitai ona faafoe. Afai la sa avea muamua tamaitai ma ta’ita’i o le atunuu-o lona uiga-sa alofagia e le atunuu! Aisea? Leaga o a latou faaiuga uma lava na fai-sa faavae i luga o le alofa i o latou aiga- tagata ma le maopoopoga o le atunuu! O le ituaiga lena o ta’ita’iga o loo manaomia vave e Samoa-o ni ta’ita’i e alolofa moni i le atunuu-ae le o ni ta’ita’i e mafuli i folafolaga ma le sailiga o latou lava manuia- ae leai se mea o faia mo le manuia o le atunuu! Afai la o fia maua e Samoa se lavea’i ma se fesoasoani moni mo tagata uma o le atunuu-e na o se faiga-malo lava e ta’ita’ia e se tamaitai e manuia ai Samoa! O le a sou taofi? 

© Samoa Observer 2016

Developed by Samoa Observer in Apia