Malo le tau La’auli Joseph!
O le taunu’u mai ai o le alo o Samoa i a Lupesoliai La’auliolemalietoa Joseph Parker o se fiafiaga tele lea i le to’atele o le atunu’u aemaise o lona afio’aga i Faleula.
Na maua e le Fofoga o Samoa i le aso ananafi le fa’atalatalanoaga ma se tasi o sui o le afio’aga i a Kome Siole na ia fa’ailoa ai le agaga fa’afetai ona o le mafai ai lea ona maua le avanoa e feiloai ai i a La’auli.
“Ia o le agaga fa’afetai ma le fiafia tele i a te a’u o se tasi o sui o le afio’aga nei ia o le mafai ai lea ona maua le avanoa e o’o mai La’auli ma le fusi lea ua ia ausia.
“Ua o’u mimita ai lava, aua o le tama o i’inei o lo’o i ai lona aiga, ma o le tama o le ‘ele’ele.
“Ou te iloa ma le mautinoa ia ua tele sona sao taua mo si o tatou atunu’u ma o se tulaga fa’afiafia tele lea i a te a’u le taimi lenei ia ma le to’atele lava.
Na ia fa’ailoa o le taimi lenei i totonu o le afio’aga ia e leai lava se isi itu o i ai ae na’o le agaga fa’afetai ma le fiafia.
“Ia o mo’omooga alofa mo le uso ia alofagia e le Atua le feagai ai ma le taleni.
“O lo’o o matou tatalo lava ma lagolagoina oe i so’o se itu.
“Malo fa’aea atunu’u, ua male mata e va’ai.
O le naunautaiga o Kome ia avea La’auli ma fa’ata’ita’iga lelei i talavou o le atunu’u.
“Ia e le gata la mo Samoa ae o i’inei i Faleula lava ia, o le fa’aaogaina lelei ai o le malosi ma le ola ia o le itu e pito sili lea ona taua i le taimi lenei.
“A o’o fo’i i le taimi e matutua ane ai ia o le a le fesoasoani tele o a lava la’asaga o lo’o o latou manana’o e ausia i le lumana’i.
“Ia ae le uma lava le agaga fa’amalo mo Laauli, ia tautuana o lo’o o matou lagolagoina pea au taumafaiga uma.
“Ia manuia!