Tofu i le to’ese le tamā-mataifale : Fa’amanatu e Vui mana’oga ua tatau ona fai

23 December 2015, 12:00AM

Ripotia e Tusitala o le 

Samoa Observer

Fa’aliliu e Maiava

 

Ua toe fa’amanatu mai e se tasi o Fa’amasino o le Fa’amasinoga Maualuga, se fautuaga mo le atunu’u, ina ia faia se lisi o tagata ua fa’amaonia moliaga e a’afia ai faiga-fa’amalosi e fai i tama’ita’i (Sex Offenders Register), ina ia tau tu’u-itiitia ai i latou e faia amioga fa’apea – e aofia ai tagata solitulafono ua fa’afo’i mai isi atunu’u – e feoa’i sa’oloto ma fa’asaolo ai i totonu o le atunu’u. 

Na fa’atusa e le Fa’amasino o Vui Clarence Nelson tagata nei, e pei o ni luko-fe’ai i le ana o se mamoe ma tu’uina mai ai lea fautuaga, ae le’i lauina le fa’asalaga, e fa’afalepuipuiina ai se tama na fa’amaonia ona moliaga o le mataifale fa’amalosi-teine e 13, na faia i lona lava afafine moni, mo le 21 tausaga 

O le teine – na i’u lava ina ma’ito – sa 15 tausaga le matua i le taimi na faia ai e lona tama lenei agasala-ogaoga. O lo’o taofia le fa’alauiloaina o le igoa o lea teineititi a’o le ua molia, na ta’ua o VL.

Na fa’ailoa i le Fa’amasinoga, o le tagata lea o VL, sa fa’asalaina ma falepuipui muamua i Niu Sila i le 2009 ona o lona faia o ni sauaga-mataga i se teineitiiti e i le va o le 12 – 16 tausaga. Na tipoti mai i Samoa ina ua mae’a ona tuli lona fa’asalaga, ma sa fa’afeao mai lana susuga lea e leai-se-fai’ai, e leoleo Niu Sila e to’alua. 

Na ta’ua i le Fa’amasinoga, ina ua taunu’u mai i Samoa, sa faia e VL lona afafine e pei o sona to’alua. Ae mata’utia ai, lona taofiofia fa’apagota o ia i totonu o lona lava fale.

“E te matua fa’asa lava le teine ona alu i fafo ma le fale. E te nofo fasi le teineititi pe a e manava atu o lo’o i fafo o le fale, e aunoa ma se mafuaga tatau,” o saunoaga ia a le Ali’i Fa’amasino.

 “O le molimau a lona tuagane, o isi taimi e masa’a le toto o lo’u tuafafine pe a fasi. I lana fo’i molimau, e le fa’atagaina o ia e matamata i le TV. O le ua molia, e foliga e fetaui iai le fa’a’upuga masani, o se ‘tasi ua ma’i-valea’.  E foliga mai fo’i i la’u matau, sa ia taofia fa’aPagota lona lava afafine i lona lava aiga.” 

Na saunoa Vui, o le amio a le ua molia, e fa’afaufau ai ma fia pua’i tagata pe a fa’alogo iai.    

 “O le ua molia nei, o se ali’i e matua leai lava se fai’ai, e fa’afefe so’o lona lava atali’i – le tuagane o le na tagi, ina ua fai sa’o iai ona o lana amio lea,” o le fa’aaliga lea a Vui.

O le mea aupito mata’utia ina ua molia le ali’i lea, o lona te’ena lea o moliaga, na mafua ai lava ona toe lalaga e le teine ma lona tuagane lenei mata’upu matuia, a’o fa’afofoga le anoano o tagata-‘ese i le potu-fa’amasino.

 “’Ou te matua ofo ai lava pe fa’afefea ona fa’atagaina lenei tagata amio-manu, e ola sa’oloto fa’apenei e aunoa ma se silafia e tagata o lo tatou atunu’u nei, a’o lea sa tipoti mai fafo ona o lana amio le-popoi le-mafaufau lea, na mafua ai fo’i ona momoli mai e leoleo e to’alua ona o le mata’utia. Ae maise fo’i le leai o ni faiga maumaututu e li’oli’o ai le toe faia o lana amio i le atunu’u nei. 

 “O le mata’upu lenei, ua toe fa’amamafa mai ai fo’i se tasi o mana’oga tuga, o le faia lea o se Lisi o Tagata Fa’apenei, e matuia ma mata’utia a latou agasala sa faia muamua. Ina ia mafai ai ona va’ava’aia lelei nei ituaiga tagata ua tatala mai le falepuipui ua ma’ea o latou fa’asalaga.

“Tusa lava po’o a moliaga sa fa’asalaina ai i Samoa po’o se isi lava atunu’u i fafo. 

“E foliga mai ua avea o se faiga masani i le taimi nei, le toe fa’afo’i mai i Samoa o tagata le-mafaufau ma le-popoi nei e molia ma fa’afalepuipui i fafo pe a mae’a o latou fa’asalaga. 

 “Ona tatala atu lea i tua i afio’aga ma alalafaga e aunoa ma so latou malamalama i le tala’aga o nei tagata ua latou ola fa’atasi.

O le fa’atusa tonu lava lenei o le fuaitau, o le luko-fe’ai i le ana o si tama’i-mamoe.”

23 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>