O le soifuaga o lo’o ola ma soifua ai nei,e le’o toe tutusa lava male soifuaga na ola ai o tatou tua’a ua lagomau mai ti’asa. O le tele o nei suiga e faigata ona tatou iloa ma silafia auā  o le to’atele e le’i ola ma soifua ai i ia aso. 

Ae peita’i, o lo’o iai lava le au ao sinasina o lo’o fia fa’asoa mai pea o latou manatu ma finagalo mo i latou e le’o iloa ma silafia. 

O Simau Pagamalie Faiaso mai le alalafaga o Vaitele-Uta, ole 93 tausaga o lona soifua ua avea lea ma ala e  faigofie  ai ona ia silafia le anoanoa’i o suiga i si o tatou atunu’u. 

“Ua tele lava suiga ole olaga i Samoa i aso nei ma aso ua mavae,” o lana fa’aaliga lea i le Fofoga o Samoa. 

“O se tasi o suiga tele o le to’atele lea o i latou ua le toe iloa ma silafia tu ma aga fa’asamoa. Ua i ai mea ua le toe iloa e tagata i le vaitau nei ona fa’atino auā ua latou leiloa fa’atino nisi o aganu’u ma tu fa’asamoa.”

O le finagalo o Simau, e sili atu lona fiafia ile olaga na ola ai o tatou tua’a nai lo’o le tulaga ua iai le olaga i lenei vaitau. Auā faimai a ia, o aso la, sa masani lava tagata Samoa ile olaga fa’asamoa. 

“O le olaga i aso la sa manaia lava,” o lana tala lea. 

“Ae ua ese nei aso auā ua tele lava ina fa’atuatuana’i le to’atele ile tatou aganu’u. To’atele foi nisi ua fa’apea mai o le aganu’u ua mafua ai ona matitiva, ae leai.

“O le manuia lava ole tagata ia ma lona aiga o lo’o i ona lava lima. O le olaga lava lena na amata mai ai le Samoa ia. A falōlō la ma pologa le tagata, o lona lava ia fa’atamala.”

I le matāupu o lo’o fa’aauau pea le fefulisa’i ai o finagalo o le atunu’u pe mafua mai le matitiva ona o mea e fai ale lotu ma le aganu’u, e lē auai ai le finagalo o Simau i lea tulaga. 

“Ua iai i latou ua faitio ma fa’apea mai o mea fai a le lotu ua mafua ai le ola matitiva, ae e matagā na fa’amatalaga ma na fa’aupuga.

E ave fanau i le aoga Aso Sa, e a’oa’o ai fanau ina ia iloa faitautusi ma tusitusi ia ma iloa ai le Atua. 

“Ae mafua mai lava le leaga ole tagata lava ia. O le mea lea ua iai, a tele mea fai a le lotu, ua ‘alo le to’atele o isi tagata a’o isi ua liu lotu. 

“Ua fa’apena fo’i  i mea e fai i totonu o faigā-nu’u. O le tele o tagata, e tele loa ma saputu mai saogamea a le nu’u ma le lotu, ua te’i a lea ua o ese. 

“Ae le’o le olaga na sa masani mai ai tagata Samoa. O le Samoa a ia e masani e ola foa’i ma ola tautua.”

O le isi fa’afitauli e finagalo Simau ua fa’atuputupula’ia i lenei vaitau, o le tulaga lea i le a’afia ai o fanau po’o tupulaga i ta’a’iga a isi tupulaga. 

“O le isi na o tulaga ua maitauina lava le a’afia ai o tupulaga i nei aso. Ua ‘ese’ese lava tupulaga i aso nei ma aso ua tuana’i. 

“O aso nei, ua tele ina a’oa’oina lelei a tatou fanau ona o le una’i a nai matua; a’o le mea ua tupu, ua pipi’i loa i isi tupulaga, amata loa ona ‘ese a latou amio fa’aalia ma o’o atu ai i fa’afitauli. 

“Ua tele fanau ua le fa’alogo i ni upu ma fautuaga mai matua. E ui fo’i lava i le atamamai o nisi fanau ma usita’i lelei i matua, e maua loa i fa’aosoosoga a le fili ma isi tupulaga, galo atoa matua ma le olaga sa masani ai.”