O lea tagata amio leaga ua faaigoaina o le tagata solitulafono aupito i mata’utia o Samoa, o Lauitiiti Tualima, o ananafi na faatoese ai ona o lana amio.

“Ou te faato’ese ai e tusa ai ma le mea na ‘ou faia, “ o lana faaaliga lea. “Ua ‘ou sese ma ua ‘ou matua lagona lo’u faanoanoa. Ou te talia soo se faasalaga e tuuina mai e le Faamasinoga.”

Na fai e Tualima se faato’esega puupuu i luma o le Alii Faamasino o Lesatele Rapi Vaai ina ua tula’i o ia mo lona faasalaga e tusa ai ma le osofaiga o se ulugalii mai Ausetalia ma le toso faamalosi o se tamaitai Ausetalia lea sa fai malologa mai i Samoa i le tausaga talu ai. 

Na tolopo e le Alii Faamasino o Lesatele le faasalaina o lea alii se’ia aulia le aso 19 o Aokuso 2016-ina ia tuuina atu ia te is se taimi e Iloilo ai talosaga na tuuina atu mai le Vaega o Moliaga. Ae peitai-na ia faaalia e faapea o loo sailia e le Ofisa o Moliaga a le Malo se 20 tausaga faaopoopo o le faasalaga tau falepuipui mo lenei pagota e mata’utia le sola soo i tua. 

Na ioe Tualima i lona nofosala i tuuaiga e tolu tau le toso teine, tasi le moliaga o le gaoi, tasi le moliaga o le fao mea, ma se moliaga o le tau faamata’u e fasioti ma le isi tau le faa-auupegaina i se ‘auupega mata’utia. O ia moliaga uma e faasino i le osofaiga o se ulugalii mai Tasemania i le Lupesina Treesort i le aso 24 o Setema 2015.

E tusa ai ma le otootoga o faamatalaga moni, na o faatasi Tualima ma Leoleo o le Falepuipui i le falema’i i le aso 23 o Setema 2015-ma o le taimi lea na mafai ai ona ia sola ese. Na ui atu o ia i Tiavi-lea sa nofo ai mo le aso.

I le faagasologa o taimi amata o le isi aso, na ia talepe ai ma ulufia se potu sa nofoia e ni turisi ia e tatau ona pu’e le la malaga i le vaalelei e toe foi atu ai i Ausetalia i lea taeao.

Fai mai lea otooto o le tagata na afaina i lea faiga tau tosoteine, o Angie Jackson, lea ua sauni e taele ae o le taimi lea na ia vaaia ai le itu tete’e. Na ia umia se seleulu ma faafefe ai na te fasiotia o ia pe afai e faataiŏ. 

Na tapā e Tualima se tupe ma  la  telefoni fe’avea’i ona la ave lea ia te ia mea sa na mana’omia. Ae peitai-sa le faamalieina ai o ia..Ona ia saisai lea o le ulugalii ma toso faamalosi le tamaitai a’o tilotilo atu si ona to’alua.

O ola o lea ulugalii sa mafai ona faasaoina ina ua siaki e le Pule o Treesort i la’ua –talu ai ua la tuai le la taavale la’upasese i le malae vaalele. Ae mo Tualima, sa mafai ona ia sola ese i lea po ma nisi o meatotino a le ulugalii.

.O le Aso 5 o Oketopa 2015 na toe pu’e ai Tualima. Ina ua fesiligia e uiga i lea osofaiga, na ia ta’utino e faapea o ia na faia, o faamatalaga otooto ia a Leoleo.