O LA’U TALA FO’I

23 July 2016, 12:00AM

1. Matauina i Tala Fou se ulutala fai mai ‘Ua matua sosofa i lalo e le Malo le faia ma le faaaogaina o tupe tau faasese poo tupe leaga!

O le vaega la o loo taulamua i le faatinoina o lea fuafuaga-o le Pule lea o le Vaega o Mataupu Faale-tulafono ma mea tau tupe- o le Faletupe Tutotonu o Samoa-o Gafatasi Patu!

O le faaaliga la a Gafatasi Patu e faapea na faatino lea fuafuaga i nai masina ua mavae atu-ma ua latou vaaia ai le matua pa’ū i lalo o le faaaogaina o ia tupe tau faasese-o loo taape i totonu o le atunuuu…! Fai mai la o nisi sa faatinoina lea faiga leaga -ua faasala i le solitulafono o le gaosia lea o tupe tau faasese.

O le tala fai mai ua leva ona galulue le Faletupe Tutotonu ma Leoleo e ala i le faasalalauina atu i Leitio 2AP. Talofa FM ma nusipepa- e faailoa atu ai lenei fe’au i le atunuu atoa-ina ia taofia ai tagata mai le soli o le tulafono e ala i le faaaogaina o tupe tau faasese! Ia –afai la o lea-o le fesili-o le a le pogai ua le faailoa mai ai i le atunuu-poo ai ia tagata o loo faia lenei solitulafono mata’utia?

A toe faaupu lenei fesili-ona faapea lea-“O ni tagata mai fafo poo ni tagata lava o le atunuu ia o loo faia lenei solitulafono mata’utia? Ae o le fesili taua lava-e faapea ona manino le atunuu pe afai e le  o faailoa maia aloa’ia poo ai ia tagata?

O ni tagata Samoa poo ni tagata mai fafo? Faamata e le o aafia ai nisi o le aufaigaluega a le Malo ma faalapotopotoga a le Malo? Afai la o aafia ai nisi o le Malo poo tagata faigaluega o le Malo-o lona uiga-e le mafai foi ona faailoa maia-ae o le a faataatiatia ai foi- e pei lava o faiga pi’opi’o a le

Malo ia na suesueina ma faamalonia e le Pule ma Su’etusi Sili a le Malo-ae o lea lava e taofiofi e le Palemia ma lana faigamalo! O le a la sou manatu? Faamata e mafai ona faailoa mai i le atunuu igoa o nei tagata o loo aafia i le faia o nei tupe tau faasese? 

2. Matauina i Tala Fou se tasi o pagota i fafo ane o le Faamasinoga- ina ua mae’a lona faamasinoga. O le matau atu i lenei tala-e foliga mai o le mea lea o loo fai nei i totonu o le Falepuipui-o le faafefe e le tasi pagota le isi pagota na te fasiotia o ia ma le isi anoano.

O le tulaga la ua aliali mai-“o faapefea ona vaai nei pagota i totonu o le Falepuipui? O lona uiga-e muamua momoloe Leoleo ae fai ai lava faiga a pagota ia i le po atoa? Afai la e leai se taimi faa-tapulaaina e tatau ai ona momoe pagota uma-ma ia mautinoa ua ta-loka uma potu o pagota ta’itasi-ona nonofo ai lea o Leoleo e tiute i le po atoa?

Afai la e le tofu le pagota ma le potu-ae momoe faatasi-o le a faapefea la ona titina nei faiga o le fia malosi o le tasi pagota i le isi pagota ma tutupu mai ai faalavelave!

E le tioa ona sosola so’o i tua pagota ona o le tuufau e fai o latou lava loto! Afai o le po-e tatau i Leoleo ona tiute i totonu o le falepuipui ina ia mafai ona matauina mea uma o loo tutupu-ma mautinoa ai le saogalemu o pagota uma.Afai la e fai mai Leoleo o le falepuipui-ua fiu e taumafai-ona faaaoga loa lea o le isi auala!

O le a le auala? O le Pule o le Falepuipui na te faamaopoopoina uma pagota-ona tautala lea i ai faa-tamā-ina ia mafai ai ona sui o latou loto-aua a mafai ona sui o latou loto-ona mafai lea ona maua e pagota le olaga fou ma le tagata fou! O le a sou taofi?

3. Matauina i le Talanoaga i le Ala-le anoano o manatu faaalia i le fesili-“Pe o saogalemu Samoa pe leai.” O le matau la i finagalo faaalia o sui o le atunuu na fesiligia-fai mai:-“O loo saogalemu lava Samoa! Ia ua lelei! Ae o le fesili-“O le a le ituaiga o saogalemu lea o loo saogalemu ai Samoa? O se saogalemu mai se Taua- poo ni Fevaevaeaiga?

O saogalemu mai le Mativa ma le le Tagolima? O saogalemu mai Faiga Pi’opi’o lea sa taiulu ai Taitai o le Malo ma Tagata Faigaluega o le Malo e pei ona lipotia e le Pule ma Su’etusi Sili? O saogalemu mai le fetuleni mai o tagata ese i totonu o le atunuu e fai ai a latou pisinisi ae malaia ai tagata faipisinisi o le atunuu?

O saogalemu le Sami o Samoa mai Kamupani Faifaiva e fia ia uma ona faatau i ai Laisene e le Malo e fagogota ai i ogasami o Samoa? O saogalemu mai le sosola so’o o pagota i tua ma sauaina tagata-talepe fale ma gaoi meatotino a tagata pe afai e ta’ua na o nisi o ia faafitauli?

O le tali-e matua leai-leai lava se saogalemu o Samoa! Ua tafetafea manuia i le tele o le faatautala ma le fiapule to’atasi-i tofi ma meatotino a le atunuu! O le a la sou taofi? O saogalemu Samoa pe leai? 

23 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>