O LA’U TALA FO’I

125 Hits

1. Matauina i Tala Fou se ulutala fai mai ua “faasa’o e Cindy faamaumauga…..”-o ia la faamaumauga e le o mautinoa-ae o lana faasa’oga-  “o le faamanatu mai lea i le atunuu –o lea faafafine ua maliu-o se tama poo se atalii o se tagata Samoa-o se sui o se ekalesia- ma o se tagata o le atunuu-o ni matua Samoa ma o se aiga Samoa-o le fesili la-“E i ai se faamatalaga na fai atu e nusipepa poo nisi o le atunuu-‘e le o se ulugalii Samoa ma e le o se tagata Samoa fo’i?

O le tulaga lea ua matauina-ua na o le tele o faamatalaga- ae le iloa pe o le a tonu le mataupu lea fai mai e fia faasa’o! Talu ai la e le mafai ona faalupeina lea faafafine o se tama’ita’i- o lea la e faapea atu ai-ia alii Cindy –e le o se mataupu tau faafafine le mataupu nei-ae o le mataupu a le nusipepa ma le aiga o le faafafine ua maliu!

Fai pea la outou faalapotopotoga-ae ia manatua foi-e na o le lua lava tagata na fai e le Atua! E na o le tane lava ma le fafine! Afai la o lea-o lona uiga la-ua fiapule le tagata i mea na fai e le Atua-ma e le aumaia le aia tatau e fai ai se mea-e ese mai le mea na fai e le Atua! O le a la sou taofi? 

2. Matauina foi i Tala Fou-e i ai se kamupani faifaiva o le a na faaaogaina le vaega o le uafu i Satitoa lea e toso ai vaa. I le taimi nei la-e le o iloa poo ai le igoa o lea kamupani-ae poo foi le atunuu e ou lea kamupani.

Ae peitai-fai mai tala fou -o lea tulaga o le a vave ona faailoa mai e le Malo lea kamupani. O lea la tulaga-talosia ia taunuu. E mafua ona afai e toe mafaufau i le faitau miliona ma miliona o tupe a le atunuu na alu ai- ae o lea e na o le tūtū e pei o se elefane pa’apa’e- ae leai se mea o aoga i ai-toe leai se tupe o maua mai ai-o le a la le igoa o lea mea?

O se faatautala poo le le kea i le afu maligi o le atunuu? Ae ui o lea-faafetai pe afai e mafai ona tino mai le fuafuaga ua i ai nei-ina ia mafai ai ona toe faaola mai tupe a le atunuu na maumau i lea uafu ona o le faatautala ma le leai o ni fuafuaga lelei! O le a sou taofi? 

3. Matauina foi i Tala Fou se isi foa’i tupe mo le Iuni Lakapi a Samoa. A manatu la i lenei vaitau ma le tele o foa’i tau tupe i le Iuni Lakapi a Samoa-o le fesili la-faamata e mafai ona faapea ai o loo alu aoga ia tupe- pe a fua i taunuuga o tauvaga tau taaloga lakapi sa feagai talu ai nei ma le Manu Samoa 15 ma le Manu Samoa Ta’ito’afitu?

Afai la e le o paleni le tele o nei foa’i ma taunuuga o tauvaga lakapi ia o loo auai le Manu Samoa-o lona uiga la-o lea lava o loo i ai se mea o loo faaletonu! A fua la i le taimi nei-o lea ua i ai faia’oga Papalagi mai fafo-ae le o lelei lava taunuuga o taaloga a le Manu Samoa 15 ma le Manu Samoa Ta’ito’afitu!

Afai la ua tele suiga ua fai i faia’aoga o le Manu Samoa ae le o lelei lava-e a la pe a fai loa se suiga i le Pulega o le Iuni Lakapi a Samoa? Faamata e le o ni polokiki ia e mafua ai ona malaia le ‘Au a le Atunuu? A toe manatu i aso ua mavae-o faia’oga Samoa lava sa faafoeina le Manu Samoa-ae sa matua faamanuiaina lava.

E le gata i le Manu Samoa 15-ae sa logologoa foi le Manu Samoa Ta’ito’afitu! O le mea lea-o ane ni tagata sa lakapi e faafoeina le Iuni-aua e ese lava le Lakapi-ese le Polokiki! Vaai foi i Iuni Lakapi a atunuu i fafo ia o loo lelei-e matua leai lava ma se tagata polokiki o aafia ai.

E o lava tagata polokiki ia e fai a latou polokiki-o foi tagata lakapi e fai le lakapi-ma o le pogai lena e manuia ai! E matua leai foi ma se Palemia poo se Peresetene o se isi malo o i fafo-o ona pulea se Iuni Lakapi-ae tu’u lava i tagata e iloa lakapi ma sa avea ma tagata taaalo o le lakapi! O le a sou taofi?

© Samoa Observer 2016

Developed by Samoa Observer in Apia