Faaali le Atua ia Toa e ala i le gagana Eperu

By Deidre Fanene 23 June 2016, 12:00AM

Pe matou te talitonu i ai pe leai-e le afaina lea talu ai- e faaaoga e le Atua tagata e le taualoa e auina mai ai Lana fe’au i le lalolagi.O upu ia na faailoa mai e Rev. Opapo Oeti i nusipepa ananafi i le taimi na ia taloina ai se talanoga ma nusipepa e faalauiloa mai ai le mea ua faaalia e le Atua i lona afafine.

O lea feiloaiga sa faatino I lo latou aiga i Vaitele ma fai mai Rev Opapo o ia ma lona afafine-o lea faatoa taliu mai Niu Sila. “Sa ma i Niu Sila e faatino se sauniga mo nisi o a matou ekalesia CCCS i Niu Sila,” o lana faaaliga lea.

“Ma o taimi uma lava e tautala ai Toa e tusa ai ma lona iloa-e toe aliali mai foi  ia faailoga ae sa matou le vaaia lava se’ia o’o ina ma toe taliu-ma o le taimi lena e amata ai ona toe tula’i mai nei mea uma.”Fai mai Rev. Opapo ua amata ona tusitusi lona afafine i le gagana Eperu.

“Fai mai lea Tama’ita’i o nei fe’au e mai le Atua ae le o tusia i le gagana Peretania poo le gagana Samoa ae o loo i totonu o le gagana Eperu anamua ma le gagana Eperu o aso nei,” o lana faaaliga lea. “O le a iloa lelei e lea Tamaiatai le taimi na ia maua se fe’au talu ai-o ia faailoga e aliali mai ma le toto ua amata foi ona aliali mai.

“O le a moeiini mata o lea Tamaitai ma amata ona tusitusi i lenei gagana ma na ia faailoa mai foi e tele lava isi fe’au o le a ‘aumai. “E faigata ona talitonuina nei ituaiga o mea-talu ai e ono mafai ona manatu tagata-o ia lava lea e faatupuina nei mea-ae le o ia-ma na ‘ou aumaia foi le Tusi Pa’ia Eperu e faamaonia ai e faapea o nei mea na tusi e Toa-e matua moni atoatoa.”

O le tua’a o lea tamaitai e 23 tausaga le matua na ia toe faaalia e faapea o nei fe’au uma na tusia e lona afafaine ua uma ona ia tuuina atu i ta’ita’i o ekalesia ta’itasi ina ia su’esu’eina ma faaliliu i la tatou lava gagana.

“Matou te le iloa pe o le a le uiga o nei fe’au talu ai e le o tusia i le tatou gagana-ma o le pogai lea ua ‘ou tuuina atu ai ata i le Akiepikopo o Alapati Mataeliga, le Pule o le Kolisi Faafaife’au i Malua ma isi lava ta’ita’i-ina ia silasila i ai,” o lana faaaliga lea.

“Fai mai Toa ia te a’u-ua faali atu e le Atua ia te ia e faapea e tele lava isi fe’au o loo faagasolo mai –ma o lea e tatau ai ona tatou sailia pe o a nei fe’au-e sauniuni ai tatou,” o lana faaaliga lea. 

“Ou te iloa e faigata tele ona talitonuina ae afai o le faiga lea a le Atua e faailoa mai ai Lana fe’au-o lona uiga-o la’u galuega o le faailoa atu lea i le lalolagi Lana fe’au.” Sa fesiligia foi Rev. Opapo pe o le a se lagona o lona aiga e uiga i lea tulaga ma le faitio e tagata o lona afafine-ae fai mai a ia-e tumau lava ona i ai tagata e le masani ona ioe i se mea-ae mo ia lava ma lona aiga-o loo latou faia lava le mea o loo faailoa atu e le Atua ia i latou e fai.

“Ina ua tulai mai le faalavelave muamua-sa ‘ou fai atu i lo’u aiga ma lo’u to’alua e faapea o le a faailoa mai e le Atua le mea moni,” o lana faaaliga lea.

“[Ae peitai] Ou te le iloa e faapea o le ana faailoa mai le mea moni I se gagana e ese ai lea e matua faigata lava, ae masalo e i ai Ana mafuaga-talu ai-afai ua faailoa mai e le Atua Lana fe’au i le gagana Peretania poo le Gagana Samoa-o lona uiga –o le mea ou te mautinoa-e le talitonu i ai tagata. 

“Ae peitai-ua faailoa mai e Ia Lana fe’au i le gagana Eperu ina ia tatou faapea ai o se vavega le mea nei ma e tatau ona tatou matua sailia pe o a Ana fe’au ma e tatau ona tatou mafaia ona fai le mea o loo Ia faailoa mai ia i tatou e fai.” Ina ua talosagaina Toa, fai mai Rev. Opapo e le o fia talanoa o ia i soo se nusipepa talu ai- o lona mana’o ia tapena o ia mo le Atua pe ana faailoa mai le isi fe’au mo ia.

By Deidre Fanene 23 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>