Manatu O Le Fa’atonu - O se la’asaga iloga mo Parker

Tusia Marj Moore ,

103 Hits

O le tulaga lava lea i mea nei o ta’aloga. E manumalo i isi taimi ae fa’ale-lelei fo’i i isi taimi. Ae mata’utia le tulaga na iai le ta’aloga sa tapua’ia ma fa’atalitali iai le atunu’u; le alofaiva o se tasi o ana tama-fanau, o Lupesoli’ai La’auli Joseph Parker, lea na matua malie ai mata e va’ai ona o le finau, lotoa ma le le-fa’avaivai i le fetauiga le-faigofie ma le tama-uli mai Farani, o Carlos Takam i le po o le Aso To’ona’i.   

Na manino lava le matua to’atele o le tapua’iga ina ua fa’alauiloa mai, o le tama-Niu Sila a’o le mata’i-Samoa nei, ae maise fo’i le lagiina o vi’i o atunu’u e lua. 

Moni la e le’i manumalo Parker i se tu’i-oti e pei ona masani ma ua lauiloa ai, ae na matua fa’afiafiaina lava le ‘au-tapua’i ona na iloga ona tigaina lana paga, ma manumalo a’ia’i ai i le taga-fusu aupito lelei ma malosi ua la feto’ai talu ona avea ma tama-fusu porofesa.

Ioe, e mautinoa le matua va-va-mamao o Carlos Takam ma isi auali’i ia na aua’i muamua atu i le tatou tama.

I le matamata atu i ata na fa’aalia o isi ana fusu’aga na faia muamua, na manino ai le  matua tuai ma le amu o mea-faigaluega a tama sa latou feto’ai muamua, leitioa fo’i a vavave ona fa’asaofafa’i e Parker ina ua auaua’i atu.

O se mea e ao ona atina’e ina ia taulau o le fa’amoemoe.

O le isi vaega e ao ona silasila toto’a i ai , o le fa’atamoe solo ai lea e Takam o Parker i totonu o le maea i le ta’amilosaga e aunoa ma se malolo.

Ina ua pau i lalo na iloa lea tulaga ona o le mase’ese’e o luga o le  fola lea o lo’o ma o lea le vaega na tau maua mai se malosi o le ali’i i le taimi na pau ai Takam.

E ui lava la i lea vaega ae na tele lava se avanoa na mafai ai ona ia faia nei gaioiga ma le mautinoa lona malosi ua matua’i atoatoa mo lea fusuaga e pei ona sa alo atu ai ma le ali’i lenei o Takam.

O le tele o ia ta’amilosaga i totonu o le maea na vaa’ia ai le fa’aleleva o le ali’i o Parker ma o se tulaga na tulimata’i pea e le gata i e na mafai ona matamata atu i le televise ae o i latou na molimauina lenei ta’amilosaga i le vaega lava lea na fa’ataunu’uina ai, ma na faia lava e le tagata ia lana ia fa’amasinoga mai lona talitonuga ina ua ma’ea ai le fusuaga mataina e pei ona maitauina.

O le tele o taimi a’o ia taumafai ai e fa’ato’atoa le ali’i lenei, o le tele foi lea o lona malosi na mafai ona toe fesoasoani malosi e toe osofa’i ai le ali’i o Takam a’o i ai pea i la’ua i totonu o le maea.

Ina ua ma’ea e pei ona maitau atu , ma ina ua lau mai le fa’aiuga sa va’ai le to’a o lana va’ai aemaise ai le tu’uina mai ai o lana fa’afetai i le tapuaiga a lona aiga ma o se tulaga lelei tele.

O le tele o fita ma le fa’afitauli o se tagata ma o se mea e ao ai ona tapua’ia pea a’o alo atu o ia mo le lu’iina o le Fusi o le Lalolagi.

© Samoa Observer 2016

Developed by Samoa Observer in Apia