Alo David Tua e fa’afeto’ai le pule-i le-ola ma le le-mautonu

Tusia Tusitala o le Samoa Observer ,

329 Hits

SE TASI O AMEPASA ILOGA A  SAMOA: O le a asiasi mai i fanua ma ‘ele’ele le Susuga a To’aletai David Tua.

SE TASI O AMEPASA ILOGA A SAMOA: O le a asiasi mai i fanua ma ‘ele’ele le Susuga a To’aletai David Tua.

O le a taunu’u mai i fanua, se tasi o tama-fanau lauiloa a Samoa, le fo’i sa tu-maualuga i le paga-mamafa o fusu’aga a le lalolagi, o To’oletai David Tua.

O lo’o fuafua e taunu’u mai le tama-Faleatiu i le po o le Aso Lulu mo le Koneseti a Annie Grace i Samoa nei, e faia i lumā-maota o le malo i le Aso To’ona’i a-sau, Aso 30 o Aperila 2016.

Fa’amolemole, e le o malaga mai To’oletai mo se fusu’aga i lea po. 

Peita’i, e ‘ese le fusu’aga lea o le a aloalo iai le ali’i-siamupini, e fa’aaogaina ai le tala’aga o lona soifua, e fesoasoani ai ma fa’aosofia tupulaga talavou ma so’o se tagata lava o lo’o feagai ma fa’afitauli o le olaga nei – le loto masalosalo ma le le-mautonu, i latou o lo’o tau pule i o latou soifua ma isi lu’itau masani.

Ua fuafua fo’i To’oletai, e fa’asoa atu mafaufauga ma lagona na o’o fo’i iai lona soifua a’o ta’afifili ma fa’afitauli fa’apea. O lea fa’amoemoe, e tatala mo tagata uma e fia ‘auai.  

O le fa’aalia lea – ua fa’aigoa o le “Fa’atumauina le Alofa” – o le a ta’ita’ia e se isi fo’i alo-lauiloa o le atunu’u, o Annie Tonumaali’i. O lea fa’amoemoe, o le a si’itia ai le silafila ma fa’amalosia ai fo’i le mamalu o le atunu’u, e sa’ili fesoasoani mo latou lava. 

Ua silafia uma e le atunu’u, o To’oletai David Tua, o se tasi o fetu-pupula o le ta’aloga faipele. ‘

Peita’i e le silafia, sa feagai fo’i ma fa’afitauli fa’apea, na afaina ai lona soifua mo se taimi umi; ae maise lava, i le taimi sa ta’uta’ua ai ma logologoa ona tala a’o fusu, ma le taimi na avea ai le tele o ana meatotino toetoe a leai se mea na totoe.

 “O le fa’amoemoe lea, o se avanoa le-‘au-maua mo To’oletai ma Annie e fa’asoa atu ai nisi o fe’au-aoga, o tima’iga ma fautuaga taua, ae maise lagona fiafia ina ua fo’ia fa’aosoosoga ma le atu-popole o le loto ma le le-mautonu, o faiga-fa’aTautala, o fa’afitauli ‘ese’ese, o gasegase ma le pule i le ola,” o se fa’amatalaga lea mai le vaega o tu’u–fa’atasia lea fa’amoemoe. 

“O lo’o tatou ola nei i taimi faigata ma matou talitonu ai, o le ‘autu o nei fuafuaga uma ma le fa’amoemoe lenei, o le a talia lelei e tupulaga talavou o Samoa. 

 “O le ‘autu lava o lenei koneseti fa’aleTusiPa’ia, o le tu’uina atu lea o se fe’au o le manumalo ma le fa’amoemoe, o le a iai sona aoga mo tupulaga o Samoa. O le ‘autu lava lea, o le “Fa’amautuina o le Alofa”.

E pei fo’i o le tulaga faigata sa iai To’oletai, sa finau fo’i Annie ma fa’afitauli e pei o le fanau-le-au, o le fa’amaonia o lona a’afia i se tasi o fa’ama’i-faigata o ponaivi ma isi lava lu’itau ogaoga o le soifuaga sa la fa’afeagai. 

O le afiafi ua taupoina nei, o lo’o fa’anaunau To’oletai ma Annie e fa’amanatu atu i le atunu’u, e Tumau pea Le Alofa Agalelei o Le Atua.” 

O lo’o latou ‘aumaia i Samoa nei, se vaega fa’asalalau fa’ava-o-malo e silia i le to’aluasefulu, e fesoasoani mo lea fa’amoemoe. 

A’o le’i aulia lea aso, o le a faia e Annie ni a’oa’oga tau-musika e faia fua mo a’oga, o ekalesia ma tupulaga talavou. 

O le a iai fo’i se koneseti fa’apea e faia i Nu’usuatia i le po o le Aso Tofi mo le atunu’u o le a le saofaga mai i Apia i le Aso To’ona’i.

O lo’o fuafuaina fo’i e To’oletai ma Annie e asiasi atu i le falepuipui e fa’asoa atu iai fa’amatalaga o o la soifua, atonu lava e ono suia ai fo’i nei tagata o lo’o taofia ai ma fesoasoani ai i o latou fo’i ola le-mautonu.

© Samoa Observer 2016

Developed by Samoa Observer in Apia