O LA’U TALA FO’I

172 Hits

1. Matauina i Tala Fou se tima’iga a se Ta’ita’i o se Ekalesia na asiasi mai i Samoa nei- ina ia to’a’aga e tatalo. O lona uiga la- atonu e lua ni mea na silafia e lea Ta’ita’i e uiga ia Samoa. Muamua-e le o tatalo.

O lona lua- e le o lava le tatala; lona tolu-e leai se aoga e toe tatalo ai pe saga fai ai nisi tatalo. Ae peiseai e atagia mai saunoaga a lea ta’ita’i-e le o lava tatalo a Samoa!

A le o lena- e na ona uma lava ona fai le tatalo-faasaga ane loa fai le mea e faasa e le Atua-ae o lea faatoa uma ona tatalo! A tatou tilotilo lelei la i le fautuaga a lea ta’ita’i- e le taumate ua na silafia- e matua le toe aoga lava se tatalo mo lenei atunuu! Aisea? Ua fiu ta’ita’i o Ekialesia ma le atunuu e tatalo i le Atua ona o faiga pi’opi’o a le faigamalo-ae le o mafai lava ona tuua.

O lea lava ua tatou vaai tino i nei faiga pi’opi’o ma lona faatinoina ina ia maua ai le manumalo -tusa lava pe soli ai le tulafono-ona avane loa lea o le aganuu e toe fofō ai! Afai la o silafia e lea Ta’ita’i o le Ekalesia-ona pau lenei o le Malo o le Lalolagi o loo faavae i le Atua-ae le to’aga e tatalo-o lona uiga ua fiu e tatalo-ae le o mafai lava ona taofia faiga pi’opi’o ia ua matua pagatia ai tagata uma o lenei atunuu. O le fesili la-o le a le aoga o lea tatalo pe afai e le o mafai ona suia ai faiga pi’opi’o a le Malo? A tilotilo i le ata ua i ai nei Samoa-ua matua pisia lava i le faama’i-oti o le faimea pi’opi’o! Afai la o lea- o le a la le aoga o ia tatalo ae le o kea i le Atua? O le a sou taofi? 

2. Ua toe vaaia foi i Tala Fou si tamaitai lea o loo vaaia i ona lima manu’a poo faailoga na o’o ia te ia –atoa ai ma mea na vaai i ai e pei ona ia faamatalaina mai. O le tulaga la ua faigata ona maua tonu i ai se manatu- o lea tamaitai-o ia tonu lava lea o loo i ai pinefaamau ma molimau i ona lima-ae o lenei lava e saga pisaō ai.

O le fesili la- o ai ‘ea na tofia i tatou e fai ma faamasino o lea mataupu? Afai o ni faailoga ia mai le Atua-e pule toatasi le Atua poo ai lava e faailoa i ai-ma ta’u i ai lona finagalo! Afai la e le o i tatou na aumai i ai lea faaaliga-o le a le pogai o lo tatou vevesi? E sa’o pe a ‘ou fai atu e ala ona tatou  vevesi ona ua faaali i lea tamaitai-ae le o outou? Tou te silafia ‘ea e ese ala a le Atua-ese ala a le tagata? Afai ua le lautogia tatou mo ni faaaliga faapea i lenei vaitau- o le tuu-a-lalo-e i ai lava lo tatou taimi. Ae mo le taimi nei-tuu pea ia sia tamaitai ma lana fe’au taumolimoli e faatino! O le a sou taofi? 

3. Ua matauina foi i Tala Fou se lapata’iga tau afā malosi e faapea e ono lamatia ai Samoa. O foliga la o lea afā e pei ona faailoa mai –e iloa i le mamafa o timuga.

O lea la matagi malosi o loo taamilomilo solo lava i le Pasefika ma e peiseai e tau latalata mai i Samoa ma Tonga!  Afai la ae tulai mai sea tulaga-o lona uiga- o le a matua pagatia ai lava  Samoa! A tuufaatasi la lena tulaga pagatia ma le pagatia o loo i ai nei le atunuu ona o le mativa ma le le tagolima-o le a faapefea nei ona fai? Ia manatua foi- o loo matua teena lava e le faigamalo-e leai se mativa i totonu o Samoa! Ae ui o lea- o le pinefaamau o lena tulaga i aso uma lava- o tamaitai ia o loo faatau atu oloa i aso uma i le ao ma le po i luga o ala tetele-ona o le tau sailia o se tupe e tausi ai o latou aiga!

A toe faaopoopo mai nei la ma le matagi malosi lea ua faailoa mai-o lona uiga-ua le iloa pe o fea a tua i ai tagata o le atunuu-ae ia manatu lelei- e faitau miliona ma miliona tupe a le atunuu- na maumau i faiga pi’opi’o a le faigamalo- ae leai ma se tasi o i latou o falepuipui ai-e pei o isi tagata solitulafono o le atunuu! E mafai la e se tulaga faapena o se faigamalo ona fai se lavea’i mo Samoa? O le a sou taofi?

© Samoa Observer 2016

Developed by Samoa Observer in Apia