Toe tofia Muliagatele Makerita ma Ofisa Sili

Tusia Ilia L Likou ,

103 Hits

Afioga ia Muliagatele Masoe Makerita Matafeo

Afioga ia Muliagatele Masoe Makerita Matafeo

Ua faamaonia e le Kapeneta le toe tofia o le Afioga ia Muliagatele Masoe Makerita Matafeo e avea ma Ofisa Sili o le Faalapotopotoga o Taui o Faalavelave Faafuasei mo leisi tolu tausaga.

Na amata galue o ia i lenei Faalapotopotoga mai le tausaga e 1996 ma faauluuluga o le Vaega o Tupe (Finance Manager) seia avea o ia ma Ofisa Sili i le tausaga e 2015.

O nisi o poloketi taua sa galue ma o loo galue atu iai le Afioga Muliagatele e aofia ai le fausia o le Fale o le Faalapotopotoga i le 1998, le Fale o le Maketi fou i Fugalei i le 2012, Fale o le Komesina Maualuga o Samoa i Kanepera i le 2016, faatauina o le Fale o le Gold Star i le fatu o le taulaga faatasi ai ma le fausia o le ACC Food court lea o loo faagasolo i le taimi nei.  

Sa aoaoina o ia i le Aoga Tulagalua a Samalaeulu, Sagata Maria Savalalo ma le Kolisi o Sagata Maria i Vaimoso.  O le Afioga ia Muliagatele o loo ia umia le Faailoga o le Bachelor in Business (Accounting) mai le Iunivesite o La Trobe i Ausetalia.  

Ua 27 tausaga o tautua  Muliagatele i totonu o le Malo.  O le Afioga ia Muliagatele Masoe e mai afioaga o Samalaeulu ma Asau. O ia o se sui o le Ekalesia Katoliko i Mulivai, Apia. Ua faaipoipo, ma e to’alua ona alo.

© Samoa Observer 2016

Developed by Samoa Observer in Apia