Toe ‘Ausia o se Matagofie na Leiloa

Tusia Maiava ,

217 Hits

Toe mafaufau tasi lava…

O ē silafia, e le o ‘Oe o se tagata e to’atasi, ae to’atolu? O le tagata e te manatu o ‘Oe lea, o le tagata e manatu isi o ‘Oe lena, ma le tagata moni lava o ‘Oe.  

O le i si aso, na matamata solo ai le i si ali’i i totonu o se faleoloa e fa’atau ai oloa ma ata-tuai. Na tau atu i se ata-vali e foliga taugofie, toetoe e leai sona tāua.

Peita’i ina ua toe tilotilo toto’a atu le ali’i, na ia iloa ai, se i si ata e foliga o lo’o nanā i lalo ifo o le ata taugofie lea. Na ia iloa lelei, e tele ata mananaia ma isi mea-tāua, o mea ‘anagatā, ma mea-taugata e o’o i le ta’i-miliona o latou tau, e masani ona natia fa’apea.

Nofo loa le ali’i fa’atau le ata lea, ma totope loa i le fale, ‘ave‘ese muamua le ata taugofie o i le pito i luga. Mavae nai itula o lana galuega sa fai-fai toto’a, na ia va’aia mulimuli ai, se ata e matua mata’utia lona matagofie. O le ata lea ua tele tausaga o leiloa.

A’o lea ua maua ma toe fa’aleleia atoa i lona ‘aulelei ma le matagofie sa i ai muamua. 

O tatou uma ta’ito’atasi, e pei lava o le ata ‘aulelei lea. O le tagata moni o ‘Oe ma a’u na faia ai e Le Atua, o lo’o natia ona o manatu ma mafaufauga o isi tagata ia tatou, ae maise ai lava, le ituaiga-tagata ua tatou manatu, o tatou. O o tatou mafaufauga sesē ia e uiga i o tatou tagata, e taofia ai tatou mai le avea ma tagata moni ma le tagata atoa e tatau ona i ai.

O mea uma lava e uiga ia tatou ma mea fo’i tatou te fai, e afua mai i le tatou va’ai i o tatou lava tagata. Afai la tatou te manana’o e suia o tatou tagata, e ao lava ona matua tu’u-tu’u i le loloto, ae le na o le suia o fa’atinoga ma amioga.

E tatau ona suia o tatou mafaufauga ma silasila lelei i o tatou lava tagata, i le mafaufau ma le agaga. “O le manuia ma le fa’amalieina, o se mea “mai totonu!”

Ua tatou iloa lelei, o le masani lea a i si tagata, o le va’ai na o fafo – pe fa’apeī o tatou foliga ma gaioioga o faia, ae maise tulaga ma fa’atinoga sa faia, pe sa a’o’oga, o le a le maualuga na o’o iai, pe faigaluega fo’i. Peita’i, e na o sina vaega la’iitiiti lena o lou tagata.

Na o Le lava na faia ‘Oe e silafia lelei lou tagata atoa, lou tagata o lo’o nana i lalo ifo o lou tagata lea e va’aia e i si, ma ‘Oe fo’i i lau va’ai. 

O le mafuaga lea o le Afio mai o Le Atua le Alo, e fa’ailoa manino mai ia tatou, le tulaga moni e va’ai ai i o tatou tagata ma ‘aumai Lona mana lilo tatou te manuia ai.

O Iesu na o Ia, e mafai ona fa’ailoa atu le tagata na Ia fuafuaina ‘Oe ia i ai, ma fesoasoani atu ia ‘Oe ina ia e avea tonu lava ma le tagata lena. Tatalo nei, e fa’amagalo ‘Oe ona o ou ala tuai, ou mafaufauga tuai ma lou ola tuai. Tatalo ia amata e Ia ona suia lou mafaufau, lou fatu ma le agaga atoa i le asō, ina ia amata ona avea o mea uma Na Ia faia ma saunia ‘Oe, ia e maua. Toe mafaufau tasi lava…


© Samoa Observer 2016

Developed by Samoa Observer in Apia