Suia le Porirua Park Stadium ia Jerry Collins Stadium

Tusia Maiava ,

224 Hits

PORIRUA PARK STADIUM: O le a suia le igoa ia JERRY COLLINS STADIUM, i le Aso Faraile nei.

PORIRUA PARK STADIUM: O le a suia le igoa ia JERRY COLLINS STADIUM, i le Aso Faraile nei.

 O le Aso Faraile nei, o le a toe suia aloa’ia ai le igoa o le malae o Porirua Park Stadium, ae fa’aigoa ia Jerry Collins Stadium, e manatua ai lea tama-fanau a Samoa na matua logologoa ma ta’uta’ua i ona taimi na ta’alo ai mo le ‘Olopeleki a Niu Sila. 

O Jerry ma lona faletua o Alana Madill, na maliliu i se fa’alavelave mata’utia, ina ua lavea le la ta’avale i le itu i sauté o Farani ia Iuni i le tausaga talu ai, ae fa’asaoina si o la alo-pepe o Ayla e na ona nai ona manu’a mitimiti. 

Na ola a’e Jerry ma ta’alo lakapi i le Kalapu Lakapi a Northern United i le malae lea o Porirua Park Stadium, ma o se taumafaiga i feso’ota’iga ‘ese’ese sa una’ia ai le suia o le igoa o lea malae, e fa’amanatu ai Jerry. 

E silia i le fitu-afe i latou sa finauina malosi i luga o upega-tafa’iLagi le alaga-tatau ona faia o lea suiga, e o’o lava fo’i i le pulenu’u o Porirua, o Nick Leggett sa ia lagolagoina lea manatu.

 “O Jerry o se tasi o tama-fanau lauiloa ma alofagia a Porirua ma ‘ou te manatu, tatou te manana’o uma lava e fa’amanatu ma aloa’ia lelei o ia i se ‘auala aupito lelei e manatua ai pea o ia ma si ona aiga,” o le fa’aaliga lea a le Pulenu’u o Leggett i le vaega fa’asalalau, le Fairfax Media. 

“Ua talafeauga lelei lava le fa’aigoa o le malae lea i lona nu’u, i lona igoa.”

Ina ua mae’a lona maliu, na tumutumu fanau-a’o’oga laiti, o aiga, o tama-lakapi a le kalapu a Northern United, o latou e lagolagoina lakapi ma le to’atele o ana uo, e fa’amanatu le soifua o se tasi o ta’uta’ua o le laina i luma a le Hurricanes, Ueligitone ma le ‘Olopeleki. 

Na momoli atu lona pusa-maliu i le ogatotonu o le malae a’o fa’aituala-lua le anoano sa ‘auai i toniga papa’e ma lanumoana a lana kalapu ma fa’atino se siva-tau e manatua ai o ia.

O le Aso Faraile, o le a ‘auai le tama o Jerry i le suia aloa’ia o le igoa o le malae ma tatala aloa’ia ai se ma’a-fa’amanatu e manatua ai le sao ogaoga o lona atali’i le malae, le kalapu ma Porirua atoa.

Ua vala’aulia fo’i e le Ali’i Pule o le Fono a le A’ai o Porirua, o Robert Baldock le mamalu lautele o le a’ai, e ‘auai i lea fa’amoemoe fa’atasi ai ma le fa’apa’iaina o le ma’a o le a ta’ita’ia e Ngati Toa kaumatua Taku Parai. 

“Ua mae’a ona fausia se tulaga-sima mo le ma’a-fa’amanatu, ma ua pipi’i fo’i fa’ailoilo i luga o le fale-matamata i le malae, fa’atasi ma ‘ofu-lakapi ‘ese’ese sa fa’aaogaina e Jerry,” o le fa’amatalaga lea a Baldock i Vaega fa’asalalau.

 “O le aiga lava o Jerry na tusia ‘upu o lo’o i luga o le ma’a-fa’amanatu. O se ma’a matagofie tele, ma e mata’ina lava i le va’ai. ‘Ou te iloa, o le a matua fiafia iai.

“E matua fiafia lava le ali’i e ta’alo i lona malae lea.”

© Samoa Observer 2016

Developed by Samoa Observer in Apia