O le a pu’e i Samoa nei le ‘Survivor Ausetalia’

Tusia Maiava ,

220 Hits

LE TOA MANUMANU: Le Sifi o Natalie White na manumalo i le Survivor Amerika  lea na pu’e i Samoa nei i le tolu tausaga talu ai.

LE TOA MANUMANU: Le Sifi o Natalie White na manumalo i le Survivor Amerika lea na pu’e i Samoa nei i le tolu tausaga talu ai.

E le o toe mamao nai masina, ona pu’eina loa lea o le Polokalame Fa’asolo o le Survivor Ausetalia i Samoa nei.

Na ripotia e le nusipepa o le Daily Telegraph ananafi, ua filifili e fa’atonu o lea polokalame, Samoa mai isi nofoaga o le teropika, talu ai ona o le mata’ina o ona laufanua.

O lea la polokalame a le Ala-Ata 10 o lo’o matua talitalia nei, o le a amata ona fa’asalalauina i se taimi o lenei tausaga. 

E le’i tu’uina mai e le Ala-Ata 10 lea, ni fa’amatalaga au’ili’ili  o le nofoaga tonu o le a pu’e ai lea polokalame peita’i ua manino mai, o le a amataina i nai vaiaso e le o toe mamao.

E le’i mafai fo’i ona tu’uina mai o se fa’amatalaga mai le Pulega o Tagata Maimoa a Samoa, i le aso ananafi.

Peita’i e talitonu le Samoa Observer, o lo’o fuafua e amata ona taunu’u mai le vaega pu’eata i le vaiaso fou a’o le’i felelei mai i latou o le a tauva ma momoli sa’o loa i nofoaga ‘ese’ese i totonu o le atunu’u.

E talitonu fo’i, ua leva ona galulue se vaega-asiasi mai le Survivor Ausetalia ma nisi o so’o’upu ma vaega fesoasoani i le lotoifale – e aofia ai le Pulega o Tagata Maimoa mai Fafo – e tapenapena nisi o mana’oga mo le pu’eina o lea ata, lea e fa’amoemoe e o’o atu i le fa masina.

I se tala mai le Daily Telegraph ananafi, na ulua’i ripotia i le masina o Ianuari, o le a pu’eina lenei polokalame fa’asolo i le motu o Pulau Tiga i Meleisia, lea na pu’e ai le ulua’i polokalame a Amerika i le 2000.

Peita’i ua talitonu nei, o Samoa lea ua filifilia talu ai le mata’ina ma le lafulemu o ona laufanua.

Na aofia fo’i Samoa i le polokalame fa’apea a le Iunaite Setete o Amerika, ae na fa’atoa o’o mai i le 2009.

O lo’o fa’ananau lava le Ala-Ata 10 mo lenei ata-fa’asolo, lea o le a va’aia ai le vaega tauva, o le a feto’ai ma le anoano o lu’itau ma finau mo le siamupini.

E le’i fa’alauiloa maia po’o ai o le a avea ma vaega-talimalo mo lenei fa’amoemoe o le a pu’eina i le tolu masina ma fa’asasalau ai loa i se taimi o lenei lava tausaga. 

E silia i le 15,000 i latou o lo’o talosaga ia maua ni avanoa e ‘auai ai i lea polokalame.

“E i’u lava ina matou filifilia se nofoaga i se atumotu, ma e foliga mai lava o se nofoaga sa fa’atino ma pu’e muamua ai fo’i se Survivor fa’apea talu ai,” o le fa’aaliga lea a le Ofisa Sili o polokalame a le Ala-Ata 10, o Beverly McGarvey i se fa’atalanoaga.

“E taua tele le iai o le tomai lena i le taimi nei. Ma e manatu, o le fou o le va’aiga ma mea ‘uma, o le a matua tatagi lelei ai i le fa’afofoga ma malie ai fo’i i le silasila a tagata ‘Ausetalia.” 

© Samoa Observer 2016

Developed by Samoa Observer in Apia