E ola manuia se aiga fiafia

Tusia Fetalai Tuilulu’u ,

86 Hits

Mei Si'isi'i

Mei Si'isi'i

O se aiga fiafia o se aiga filemu foi lea.

Na fa’ailoa e le tinā mātua ia Mei 64 tausaga le matua le soifua i le Fofoga o Samoa o le aiga finau ma tauivi ma maua le fiafia o le aiga sili ona manuia lea.

“O lo’o maua lava le fiafia i totonu si o maotu aiga ma o lo’o manuia lava mea uma. O lana lea saunoaga.

“O lo’o ua tatou iloa uma lava le taugata le soifuaga o lo’o tatou feagai ai nei ae o le taumafai lava ma le ola naunau e foia ai lava mea uma. 

“E ui lava la i le tele o fa’alavelave o lo’o feagai ma tatou ae o lo’o iai lava le auala e foia ai. 

I le saunoaga le tinā matua ia Mei o le maumaga lava o lo’o fa’amoemoe ai le tausiga si on aiga e ui lava o lo’o iai nisi le fanau faigaluega ae o le maumaga le fesoasoani sili. Sa ia taua foi e laititi le tupe maua ae o lo’o lava ma totoe mo le fa’asoa.

“O le tau mai i lenei itula le aso, o maua ma le tamā le aiga e nofo mau i Savai’i ae o le ma o’o mai nei Apia o le asi’ina  mai o le fanau faigaluega. 

“O le maumaga i Savai’i o lo’o fa’amoemoe ai si o ma aiga i mea fai ae le gata i lea o le lafoina mai foi lea o tupe i nei fesoasoani i aoga le fanau. 

Sa taua foi e le tina e faigofie lava ma lelei mea uma i le matou nonofo ai i Savai’i ae o le o’o mai foi i nei le vaega o lo’o aumau ai le fanau e tele lava mea e fia fa’aleleia pei o le auala i lumafale ae le gata i lea o le suavai foi.

“E lelei ma sefe le nofoaga o lo’o nonofo ai si a’u fanau ae pau lava o le auala i lumafale pei ona tou tagataga’i atu ai matua leaga faia ae le gata foi i lea o mea tau suavai.

“E le o’o mai le fa’asoa le paipa i uta nei ma ta te leiloa foi po le a se mafuaga tatau. Ia ua laki lava le fa’atanoa i tuafale ma vai mai le tupe o lo’o maua ai sina suavai."

“O la’u talosaga foi lea ina ia mafai ona vave maua mai se fesoasoani i le suavai i uta nei.

Sa fesiligia e le Fofoga o Samoa se manatu o le tina i le eseesega le nonofo ai I Savai’i ma nei i Upolu ae tali le tina e fai lava sina tele le eseesega. 

“O le olaga i Savai’i e amata mai lava i faiganu’u ma pulega fa’amatai e o’o mai lava i le taimi nei ae o nei Apia e leai ni ia mea fa’apeia. 

“O Savai’i foi e filemu mea uma ma faigofie le soifua i le tausiga le aiga ae o nei i Apia a le faigaluega e le a’ai le aiga. 

Sa fa’ailoa foi e le tinā o le soifuaga ua taugata lava ae o le le galuega lava ma le fa’amoemoe i si e afau ai le pologa o olaga o tagata.

“E tofu lava le tagata ma lona fanua e galue ai ma fa’aoga tatau aua o le galuega lava i lau oe meatotino e fua mai foi e fua mai lava i lou malosi.

O suiga ma tele o fa’afitauli e mana’o ai lava le tinā ia Mei e lelei lava le nonofo ma si ana fanau i Savai’i peitai o le olaga e le tumau aua ala ai ona loto tele le tinā e omai tamaiti i Apia e su’e ni lumana’i manuia.

© Samoa Observer 2016

Developed by Samoa Observer in Apia