Manatu o le Fa’atonu - Lapataiga ua fetaui lelei ma le taimi mo tagata uma

166 Hits

Tusia - Mata’afa Keni Lesa

Faaliliu e Seagaiumua Tupuola


O tagata tau faasese ia o loo feoa’i solo ma fetogia’i solo tupe mai  tagata e le fufu’e o le atunuu e le o se mea fou lea. O lea matou te talanoa atu e uiga i tagata solitulafono ia o loo faaaoga sese ma le faa-le-tatau le agalelei, faapalepale ma le alofa o tagata ese ia o loo afaina ia latou faiga faa-tiapolo.

Ua matou iloa e tupu mai lea taimi i lea taimi. Ae peitai- e lelei ona toe faamanatu atu i le taimi nei ma iēluā pe faapefea ona tatou nofo sauna i taimi uma. O le tala ua faaigoaina “Faasese se Aiga e se tagata faimea pi’opi’o uiga ese” na lomia faasalala i le itulau i luma o le Saturday Samoa Observer talu ai- o se faataitaiga sili lea o le mataupu lea matou te talanoa atu ai. 

O se taimi i le lua vaiaso talu ai, na pelogia ai e se alii e le o mautinoa e se tasi poo ai moni lava ia-se aiga e uiga i lona tau i lea aiga, ma faasese ai i latou ma sola ese ma le latou tupe. 

 “Fai mai a ia o lona igoa o Fuataiga ma o ia o le atalii o Fuataiga Tufuga mai Asau  “o le faamatalaga lea a Theresa Masoe-Taimalelagi.

O le tamā o Mrs Taimalelagi e mai Asau ma e toatele tagata o lona aiga o loo nonofo ai. O lea talanoaga sa faaauau mo sina taimi talu ai-sa talanoa pea lea tagata e uiga i tagata e tau i le tamā o Mrs Taimalelagi.

Fai mai lea tamaloa o ia o se kamuta  ma o loo i ai ana mea faigaluega uma lava mo lana matatā “Na ia faailoga foi i lo’u tamā e faapea na alu i le Aoga o Matata Eseese a le Don Bosco i Savaii ma sa mana’o foi e faaali ana mea faigaluega i lo’u tamā.” Ona ua talitonuina lana tala, o lea na faafaigaluega ai e le tamā o Mrs Taimalelagi o ia ma ofo atu ia te ie totogi e $6 i le itula.

Ma talu ai ona ua tuai,  sa lagona e le tamā o Mrs Taimalelagi lona alofa i lea tagata ma faataga ai o ia latou te momoe i lea po i lo latou fale. “Fai mai Leti pe tusa o le itula e 2-3 i le taeao, na fafagua ai o ia e lea tamaloa ma na talosagaina poo fea le itu e i ai le fale taele,” o le faaaliga lea a le tamaitai.

“Na fesili foi o ia ia Leti pe o le fale ta’ele e i totonu o le potu o lo’u tamā.” Ina ua feala mai le aiga, ua le iloa pe o fea o i ai le tamaloa. 

“O le itula lea e ono i le taeao ae ua alu ese o ia, a’o su’e la le ato tupe a lo’u tama,” o lana faaaliga lea. Talu mai lena taimi, o loo sailia pea e le aiga se faamatalaga e uiga i lea tamaloa. “O le ato ue a lo’u tamā sa i ai le $1,400 ae ua alu lea tamaloa ma ave.

Na ia faavalea i matou ma sola ese ai.”Ua uma ona latou faafesoota’ia Leoleo, na latou o’o lava i le falepuipui e siaki  pe o ia o se pagota ma faapea foi ona tuuin atu ni fe’au i luga o le social media, e talosagaina ai tagata lautele mo se fesoasoani.

O le isi itu, ua maua foi e le aiga e faapea o le tagata lea na ia faaalia e faapea o lona tama (Fuataiga Tufuga) e leai foi sona atalii.

O loo fai pea su’esu’ega a Leoleo. “O se itu faigata lea talu ai matou te le iloa lona igoa moni ma e le o ia i matou foi sona ata.”

I le taimi nei, fai mai Mrs. Taimalelagi latou te fia lapata’ina tagata o le atunuu e faapea o loo i ai lava tagata pepelo ma saili o latou auala i totonu o le gaoia faamalosi o tagata e leai se sala.

 “E mafai ona avea ma lesoa aoga mo i tatou uma lava,” o le faaaliga lea a Mrs Taimalelagi.

.”O le mea na tupu i lo’u aiga ma lo’u tamā e mafai foi ona tupu i soo se tasi o i tatou.”

 “Ae peita’i e lelei ona iloa le mea moni e faapea o loo i ai lava tagata e matua leai lava se alofa na te faasese oe ma lou aiga ma savavali i lou loto talitonu ma le alofa. . “E tatau ona matua pupula lelei o tatou mata talu ai-o loo ai le lelei ma le leaga o loo siomia ai tatou ma e tatau ona tatou nofo uta i taimi uma lava.

“O nisi tagata o le a latou faia mea uma lava e maua ai le mea latou te manaomia, ae tatau ona aoaoina i tatou mai le mea na tupu i lo’u aiga ma puipuia i tatou mai le uia o mea na matou ui mai ai.”

E leai se isi faaupuga e sili atu i le faaupuga a Mrs Taimalelagi. O le lesona mautino mo tagata uma e faapea e le o tagata uma e tatau ona e faatuatuaina. O le tulaga o le mana’o ma le solitulafono o loo i ai nei ua matua uiga ese ma ua le toe fefefe isi tagata e gaoi mea a isi tagata a’o la e pulato’a mai.  O le mea lea-ia outou matua faaeteete ma maua le saogalemu, Samoa!

 


© Samoa Observer 2016

Developed by Samoa Observer in Apia