Matagofie pesepesega Lauli’i ma Faleata

Tusia Ilia L Likou ,

77 Hits

O le po o le Aso Lulu na fa’afiafia ai le Ekalesia Fa’apotopotoga Kerisiano i Samoa i Lauli’i.

O le Kolisi o Faleata le Aso Tofi ma na mata’ina le tele o fa’afiafiaga na o latou saunia lea o lo’o ua mafai ona o gatusa ai ma le fa’amoemoe  o le Polokalame o le 13 Aso o le tapena lea o loto ma agaga aua le aga’i atu i le fa’amanatuina ole soifua mai o le Fa’aola, Iesu Keriso.

E latalata le selau le aofa’i o aufaipese na o latou fa’atinoina pesepesega aemaise o le tala fa’akonaseti na saunia e Lauli’i mai lava i le Valoaga se’ia o’o mai le fa’ataunu’uina o le Finagalo o le Atua e ala i a Iesu Keriso ma salalau ai le Talalelei lea na o’o mai Samoa e ala i le Misionare Viliamu ma o Sapapali’i na taunu’u ai.

O le amataga foi lea o le galuega a le Lonetona Misionare Sosaiete po o le Ekalseia Fa’apotopotoga Kerisiano e pei ona iloga ai nei i totonu o Samoa ia Aokuso, 1830 ina ua asiasi mai Rev. John Willians (Ioane Viliamu), lea na malaga faatasi mai Rev. Charles Barff (Papu) i Samoa ma tuu i Sapapalii ni faia’oga Tahiti ma isi nofoaga i le motu o Savaii.

O le 1835 na tofia ai ni misionare Europa se to’aono, e pei o Messrs Heath, Hardie, Mills, Macdonald, Murray ma Branden. E le’i umi ae tofia loa ni pule a’oga se to’alua ma se tagata e lomia faamaumauga. O le 1837 na tuufaatasia ai ekalesia i se vaega e tasi.

E o’o ma ii le 1840, ua aofia atoa motu autu e tolu o Upolu, Savaii ma Tutuila i se fesootaiga e ala i nofoaga o ekalesia. 

O le 1844 na faavae ai le Kolisi Faafaife’au i Malua, i se mamao lea e tusa ma le sefulu-lua maila i sisifo mai Apia i le motu o Upolu. O lenei galuega na pogai ai ona tuueseese Rev. George Turner, LLD, ma Charles Hardie.

O le tofi o Hardie sa mulimuli ane ona faatumuina ia Tesema 1859 e Rev. Henry Nisbet, LLD, ma aveeseina ai mai Sapapalii Savaii, lea sa nofo ai talu mai le 1850. Na maliu Dr. Nisbet i Malua i le 1876, ae faamalolo litaea Dr, Turner i le 1882.

Na tofia Rev. John Marriot i Malua i le 1878, ma o  Aokuso 1887 na aveeseina ai Mr Newell mai Savaii mo le Kolisi Faafaife’au i Malua. O Novema 1904 na maliu ai Rev Marriott, ma na suitulaga i ai ia Aokuso 1905, Pastor Ernest Heider mai Westphalia, Siamani.

Le Talalelei lea ua ao ai nei Samoa e o’o mai lava le taimi lenei.

O nisi nei o ata mai fa’afiafiaga na feagai ai ma le Kolisi o Faleata ma le E.F.K.S. Lauli’i.

© Samoa Observer 2016

Developed by Samoa Observer in Apia