Aua le fa’apalapala - Palepo Valoaga

Tusia Ioana Tupa'i ,

82 Hits

Palepoi Valoaga.

Palepoi Valoaga.

O le tamā ia Palepoi Valoaga 62 tausaga le matua mai Faleasiu na maua atu e le Fofoga o Samoa ma faatalatalanoaina ai i le taeao ananafi.

“Ua taugata lava le soifuaga ma ua leai lava se mea ua toe taugofie i lenei vaitau,” o lana saunoaga mai lea.

“O lea ua tatou tulata i le Kerisimasi o lenei tausaga ma ua tele foi tapenaga ua faatino e aiga aua le o’o atu i aso fiafia”.

“I si o matou aiga, o lo’o lelei le eletise, ae o loo lelei foi auaunaga o le suavai o loo atu i lo matou aiga”.

“O loo iai foi tagata faigaluega o loo faapena ona maua mai ai seleni o loo fesoaoani i le tausiga o lo matou aiga faatasi ai ma le faatinoina o faalavelave faale-aiga, Nu’u ma le Ekalesia”.

“Ui a i lea o loo utiuti lava le faasoa. 

“E pei o le ala lea a o’o ma le faalavelave e lēlava le seleni e mafai ai ona amata le atinae ua fuafuaina”.

“O le faafitauli lava lea  o loo taofia ai le faatinoina o se atinae”.

“Ou te talitonu o le toe agai lava e galueina le laueleele o se tasi lea o vaega o le a foia ai le tele o faafitauli o loo feagai ma le aiga i le taimi nei”.

“E moni e umi ona faatali mo le seleselega ae ou te talitonu lava au ia, o se tasi lea o alagatupe tele e mafai ona maua pe afai ae o’o i le taimi e selesele ai ma faatauina atu ma maua mai ai le seleni.”

“O le seleni foi o le a maua o le a mafai ai ona toe faaleleia nisi o vaega o lo matou fale ma isi lava vaega o loo manaomia le toe faaleleia”.

“Ia o le tulaga lava lena o lo’o ua i ai nei aso, ia aua lava le fa’avaivai ae aga’I pea i luma.

© Samoa Observer 2016

Developed by Samoa Observer in Apia