“O le agaga maualuga lava i a te a’u latou i le taimi lenei ia fa’auma lelei la’u aoga inisinia o lo’o o’u i ai nei i Punaoa ia su’e loa se galuega.” Faletoese Letaulau, 18 le matua o Fasito’o-Uta.

I le fa’atalatalanoaga ma le Fofoga o Samoa i le aso ananafi, na fa’ailoa ai e Faletoese le tele o le aoga o le ola mai ai i totonu o aiga aemaise o pulega fa’alematai.

“Ia o a’u ia e pei o lea le lelei ai o totonu o nu’u mavae mo le fanau aemaise o tupulaga talavou.

“Aua fo’i o totonu o nu’u e i ai lava tulafono e lima ta’ita’ia ai so’o se isi e amata mai lava i fanau se’ia o’o i e matutua.

“E le gata la ina lelei ona a’oa’oina e matua o fanau, ae a sau fo’i i mea fai o le nu’u, ia e ta te iloa lelei le savali, o le tu ma le tautala.

“E le so’ona tafiti vale ai se isi, ae pei o taaofiaga nei e iloa ai ona fa’atino e le tagata o so’o se vaega o le aganu’u.

“Ia a ou sau o fai se fono a matai, ia e tele lava ina ou sau o’u matamata, maitau lelei le faiga o fono, o le taimi e pati ai le ava, o le folafola ava ma le tele lava o nisi gaioiga.

“Ou te iloa lelei a ou matua, o vaega nei o le aganu’u ou te fa’atinoina.

Na ia fa’ailoa o le tele o tupulaga talavou i le talafatai o le taulaga e tele lona ese’esega ma e o lo’o i totonu o afioaga mavae.

“O i’inei , ia e oso sa’o lava le tagata po o le tamaititi i lana feau e fai, aua fo’i e fa’atonu lelei e matua.

“Ia o feau masani e pei o le saka, o le ti, o le taeina o le otaota ma le tele lava o vaega o lo’o o matou fa’atinoina.

“Ia a o’o le afiafi ia ua su’e se malae e fa’aafu ai ia ma fiafia ai lava, ia ma toe tope le fale e tuli le taimi o le faigalotu o le afiafi.

Na ia ta’ua o le taimi lenei e le tele lava nisi o fuafuaga o lo’o ia manatu i ai.

“Ia e leai lava ni tapenaga lenei taimi  mo aso fiafia, na o le nofo lava le fale ma tafao ai.

“Ia ma ou toe tapena ai mo aoga o le tausaga fou.