Fesiligia e le Iuni Lakapi le ripoti

153 Hits

Ripotia e Tusitala o le Samoa Observer

Fa’aliliu e Maiava

 E lo’o taofiofi-mamau pea le Ofisa Sili o le Iuni Lakapi a Samoa, Faleomavaega Vincent Fepulea’i i lona fa’apea mai, e le’i faia se fa’ai’uga mautu mo le tofia o se faia’oga fou o le Manu Samoa.

I lana tali mai i le tala “Faia’oga Fou o le Manu Samoa” na ‘auina atu i le laupepa muamua o le Samoa Observer ananafi, na fa’aalia ai e Faleomavaega, e sese lea tala talu ai, o lo’o iai ‘auala a le Iuni Lakapi e tatau ona mulimulita’ia.  

O ia vaega e aofia ai le fa’amaonia o le filifiliga e le Komiti Fa’atonu a le Iuni Lakapi lea e le’i faia, o lana fa’aaliga lea.

O le Komiti lea e ta’ita’ifono ai le Palemia, Tuila’epa Sa’ilele Malielegaoi lea na fa’ailoa i le vaega fa’asalalau i lana polokalame masani, e le o toe mamao ae fa’ailoa mai se fa’ai’uga.

E le’i ta’ua e Tuila’epa, po’o le a le ‘umi e fa’atalitali ai.

Peita’i, e le’i fa’amaonia e le Ofisa Sili pe te’ena fo’i ripoti fa’apea, o Namulau’ulu Alama Ieremia lea o le a avea ma Faia’oga-Ulu mo le Manu Samoa. 

Na ta’ua e Faleomavaega, o le a fa’ailoa aloa’ia e le Iuni lea tofiga peita’i, o le taimi tonu lea o feagai le Iuni Lakapi ma le tele o isi fa’afitauli e ao ona tau-fa’asa’osa’o. 

Na toe ta’ua fo’i, o ia mata’upu e aofia ai le fa’amaonia e le Komiti Fa’afoe o le Iuni Lakapi ae maise feutaga’iga ma lē o le a tofia, i mata’upu e pei o le totogi ma aiaiga o le galuega.  

O ananafi, na ta’ua ai e le Samoa Observer, o molimau maumaututu sa latou ta’ua fa’apea, o le laulau sa feagai ma filifiliga, sa ta’ita’ia e Graham Mourie, le kapeteni muamua o le ‘Olopeleki lea sa naunau ia Namulau’ulu, i le taimi o fa’atalanoaga umi sa faia ma sui e 20 sa talosaga. 

“O ia le tagata aupito talafeagai mo le galuega, mai ia latou uma sa talosaga,” o le tala lea na o’o mai i le Samoa Observer. 

O Namulau’ulu sa avea ma faia’oga lagolago mo le Manu Samoa, i ana tapenaga mo le Ipu a le Lalolagi fa’atoa uma atu. Sa avea muamua fo’i ma faia’oga lagolago mo le Hurricanes, le ‘Au Lakapi a Ueligitone. 

 

LAKAPI A LE LALOLAGI

I nisi mata’upu tauLakapi, ua te’ena e Lakapi a le Lalolagi se fa’amatalaga fa’apea, ua latou fa’afoeina nei le fa’atamo’ega o le Iuni Lakapi a Samoa. 

Na ta’ua e William Glenwright, le Pule Sili o Lakapi a le Lalolagi mo le Vaega o Asia/Oceania, i le Leitio a Niu Sila e fa’apea, o lo’o una’ia pea polokalame mo le toe-fa’aleleia o le Iuni Lakapi a Samoa ma o lo’o fesoasoani mai iai. 

Ua malilie le Iuni Lakapi a Samoa e fa’atinoina pulega lelei ma suiga fou o le fa’agaioia o tulaga tau-tupe, ina ua mae’a talanoaga ma le pulega o lakapi i le fa’ai’uga o le tausaga talu ai. 

Mai lena taimi, sa tofia ai loa se Ofisa Sili fou, le pule o le Vaega mo Koleniga, le Pule Sili ma le Faia’oga o le Ta’ito’afitu, ma o le to’atele ua filifilia e fa’atinoa ia tiute, o tagata mai fafo atu o Samoa. 

“Ua ‘ou māua faitioga ona o le tele o tulaga iloga lea ua tofia nei iai tagata e le o ni tagata-nu’u Samoa,” o le fa’aaliga lea a Glenwright.  

 “’Ou te le-talia le tulaga fa’apea, o le a ‘pulea ma fa’atonutonu e Lakapi a le Lalolagi’ – moni o nisi o avanoa nei, sa matou ‘auai i le laulau e faia filifiliga, ae na o le to’atasi le tagata o matou mai le to’atolu, to’afa, pe to’alima fo’i i nisi taimi ma o le matou popolega lea – pei fo’i o le Iuni Lakapi a Samoa -  o le fa’amautuina o le tagata aupito lelei mo le avanoa sa’o ae maise ia gafatia ona fa’atupe. Ana fa’apea o ni Samoa i latou nei, e matua lelei lava ma talafeagai peita’i, o le matou popolega tele lea, o le ‘aumai o tagata aupito talafeagai o lo’o i totonu o le atunu’u.”

Na ta’ua fo’i e Glenwright, o lo’o fa’atino fo’i e le Lakapi a le Lalolagi se polokalame fa’aleA’oa’oga mo le fa’aleleia atili o faia’oga o lo’o i totonu o le atunu’u, o latou e feagai ma ta’aloga, o tagata e malamalama i ta’aloga, o foma’i ma latou e fa’afoeina ta’aloga i Samoa.

© Samoa Observer 2016

Developed by Samoa Observer in Apia