Meaalofa o le Kerisimasi a Saina mo Samoa

22 December 2015, 12:00AM

Ripotia e Deidre Fanene

Fa’aliliu e Maiava

 O ananafi na foa’ina ai e le Amepasa o le Malo o Saina, se aofa’iga e $25,000.00 tala mo mea-ta’alo aua le Iuni Lakapi a Samoa. 

O lea meaalofa – sa taua’a’oina i le Ofisa o le Ali’i Palemia, Tuila’epa Sa’ilele Malielegaoi, o le Ta’ita’ifono fo’i o le Iuni Lakapi a le Atunu’u , sa fa’afetaia le lagolago mai le Malo o Saina.

 “Fai a’u nei ma sui o tagata-nu’u uma o Samoa, e fa’ailoa atu ai lo matou agaga fa’afetai tele ma le fa’amalo, i Tagata-nu’u uma ma le Malo o Saina ona o lenei meaalofa e fesoasoani ai a matou lakapi,” o lana saunoaga lea.

Na ta’ua e le Amepasa o Saina, Wang Xuefeng, o lea fesoasoani, o se vaega fa’apitoa e aloa’ia ai  faiga-uo a Samoa ma Saina.

“Ua tatou tu-lalata nei i le Kirisimasi ma le Tausaga Fou, ma o le meaalofa fa’ale-uo mai le Amepasa o le Malo o Saina mo tagata-nu’u o Samoa e momoli atu ai ma fa’amanuiaga mo tagata uma o Samoa,” o lana saunoaga lea. 

 “Matou te tatalo, ia manuia tele taumafaiga a le Manu Samoa i le 2016... ma ia manuia tele le Tausaga Fou ae maise le aga’i i luma o le faiga-uo a Saina ma Samoa.

“Ua matou talitonu, o ta’aloga lakapi, o se ‘auala lelei tele e atili fa’aleleia ai so’otaga va-va-lalata a le Amepasa o Saina ma tagata Samoa i so’o se vaega o le soifuaga.

“Matou te talatalanoa ma tupulaga e uiga i ta’aloga ae maise ‘auala e fa’aleleia atili ai a tatou faiga-uo.”

Na fa’ailoa e le Ofisa Sili o le Iuni Lakapi a Samoa, o Faleomavaega Vincent Fepulea’i e fa’apea, o mea-ta’alo nei o le a tu’uina atu i a’oga ma iuni lakapi i tua, e fesoasoani ai i le atina’eina o le lakapi i Samoa.

22 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>