Ua le’o toe faigofie nei aso – Sefulua’i

Tusia Vatapuia Maiava ma Ilia L Likou ,

209 Hits

Sefulua’i Mulitalo, 29 le matua o le  soifua i Saoluafata-Uta.

Sefulua’i Mulitalo, 29 le matua o le soifua i Saoluafata-Uta. (Photo: Vatpuia Maiava)

“O la’u tala lava lea e fai, o a’u ou te le ma e ta’utino le tulaga o lo’o i ai le tau atina’eina o si o matou aiga.” Le tinā i a Sefulua’i Mulitalo, 29 le matua o le  soifua i Saoluafata-Uta i le fa’atalatalanoaga ma le Fofoga o Samoa i le aso ananafi.

“O a’u ou te le ma e ta’utino le tulaga pagatia o lo’o i ai lo matou aiga i le taimi lenei, ma e tasi lava le ulo olo’o fa’aaogaina mo mea’ai, fai ai le saka, saka ai laufala, ia o le falai ai o le chips, e fai uma ai lava i le ulo lea e tasi.

“Ia o nisi o taimi a ou va’ai o tia’i se tipoti uila a se aiga i le lapisi ou te taumafai lava e aumai ina ia mafai ona toe fa’aola matou te fa’aaogaina.

“O le olaga ua i ai nei aso, i lo’u iloa i ai ua taugata lava le tau o le soifuaga ma e le tatau ai se nofoa’i ae ao lava ona galue.

“I lo’u ia iloa i ai, ana ou le galue nei, o lona uiga e fia’a’ai si a’u fanau.

“Ia e pei ona silasila mai ia e ausage lava si o matou aiga, o si o’u to’alua o lo’o alu atu i lana galuega a maua mai lava se $10 mai galuega o lo’o i ai i le aso, ia ua lava lea mo i matou.

Na ia fa’ailoa i le Fofoga o Samoa e le’i leva ona ia taumafai e fa’atau atu chips aua se tupe fa’asili o le aiga.

“Ia e pei ona outou maitaua mai le tulaga o lo’o i ai si o matou aiga, aepeita’i e le’o avea lea ma se itu e fa’avaivaia ai a’u le tinā o le aiga.

 “Ia e na’o a’u lava le tama a o’u matua ma o le taimi lenei ia olo’o taumafai lava.

“O le agaga fa’afetai i le Atua o lo’o fesoasoani mai i le vaivai i le tele o aso.

“O lea ua mafai ona maua nai senesene i le fa’atauina o tauaga, chips, ma meataulima ou te nofo lava ma faifai, ia lea ua alu alu lea ua manaia lava.

 “Ia e pei o a’u lava o lo’o tele ina faia le tele o feau i aso uma aemaise lava le taumafaiga o tamaiti aua e tele ina faigaluega le tamā o le aiga.

 “Ia o a’u na lelei lava le aoga, ae na ou nofo ina ua le gafatia e nai o’u matua na totogi lo’u pili i le aoga.

 “E pei  na ou le alu loa i le Iunivesite o’u alu loa su’esu’e sa’u galuega ma ou galue aua lava aua le tausiga o nai o’u matua, ia na maliliu loa i la’ua, ae ua fai atu ai lava ma la’u fanau o lea na ou nofo ai loa e va’ai tamaiti e o’o mai lava i le taimi lenei.

 “Ia o nisi o taimi e ita ai lava si o’u to’alua i le fa’atauina atu o nisi o vaega i luma o le fale, ae pei e pau lea o sina vaega e mafai ona maua mai ai sina tupe.

 “O la’u ia lava lea tala e fai ai, o le ma e le’o se mea lelei, o le itu taua a mana’o e fai se vaega e lelei ai le aiga e ao lava ona alu e fai.

 “O le ma o le mea lena a le tiapolo, e fua atu ai i si o’u aiga i le tulaga e pei ona i ai nei, ia afai e mulimuli le upu ma, o lona uiga e ma’imau ola o si a’u fanau i le fia’a’ai pe a ma e su’e mai le tupe.

© Samoa Observer 2016

Developed by Samoa Observer in Apia