Fesoasoani i aiga

Tusia Vatapuia Maiava ma Sarafina Sanerivi ,

106 Hits

O le agaga o lo’o fa’amuamua e le tama’ita’i i a Lasi Avelima o Letogo, 17 tausaga ‘ e aoga le ola e fesoasoani i le aiga.

E maua le avanoa o le Fofoga o Samoa i le aso ananafi o lo’o fa’atauina atu e le tama’ita’i i a Lasi fa’ipula, maukeni, aufa’i i lumāfale o le aiga aua se tupe maua.

“Ia o a’u ou te i le Vasega 12 i le Kolisi o Vaimauga ua ou le alu i le aoga ona e leai sa’u suega e faia i le asō.

“O lea ua tonu ai loa i lo’u mafaufau ou te sau e nofo i luma i’inei ae se’i malolo o’u matua.

“E mo le silafia ai e leai se isi o faigaluega i lo matou aiga, ae pei o vaega nei o lo’o fa’amoemoe tele ai le tausiga.

“Ia o le tele lava o aso e $60 le tupe maua, ma o lo’o fesoasoani tele i si o matou aiga i le taimi lenei.

“E le gata i le tausiaina ai o le aiga ae o matou pasese ma nai o’u tei i le aoga i aso uma.

“E le’i leva ona amata ai la matou maketi, o le masina lea ua te’a na amata ai , ma e maitau atu lava olo’o i ai lava tupe o lo’o maua mai ma fesoasoani ai tele ai i so’o se vaega.

“Ia e maitauina lava le tau fa’asoa i taimi uma ae o lo’o fesoasoani lava vaega nei i tulaga uma i totonu o si o matou aiga.

“Ou te iloa lava e a’u ia, a fesoasoani lava i aiga ia e manuia fo’i le olaga.

O le fa’anaunauta’iga o le tama’ita’i o Lasi , e fia avea o ia ma foma’i i le lumana’i.

“Ia e pei o le galuega lea o lo’o o’u mana’o ai lava i le lumana’i, ina ia avea  a’u ma foma’i.

“E le gata ina ou fesoasoani ai i lo’u aiga ae o i latou o lo’o fia maua se fesoasoani.

“O se miti ua leva ona ou nofo ma a’u ma talosia i le alofa o le Ali’i , atonu o le ausia lava i le lumana’i pe a aulia i se ola ma se malosi.

© Samoa Observer 2016

Developed by Samoa Observer in Apia