Mana’omia le fa’aleleia o auala

Tusia Vatapuia Maiava ma Ilia L Likou ,

127 Hits

Selepa Avon o Saoluafata-Uta.

Selepa Avon o Saoluafata-Uta.

O le talitonga o Selepa Avon o Saoluafata-Uta i le Fofoga o Samoa i le aso ananafi, ‘e pei o le fa’afitauli lava o lo’o feagai ma uta nei, o le leaga o le auala.

“Ia e pei o lea le fa’afitauli  ua leva na feagai ma le nu’u nei aemaise ai lava le taimi e sauni e la’a atu ai i tai i le auala autu, ia e fai sina maomao mai uta nei.

“O lo’u iloa i ai, ona o a’u e fai mai totonu o le aiga ma le afio’aga ae na i ai pasi na feoa’i mai uta nei, ae ona o le leaga o le auala ou te iloa o  le isi mafua’aga tele lea na fa’ama’amulu ai le tele o pasi.

“Ia o nisi o taimi e faigata lava i a’i matou nei ona la’a atu i tai ma toe omai, ona e lelei lava i aiga e i ai a latou ta’avale.

“Ae pei o le tele o aiga ia o lea lava le tulaga pagatia o i ai.

O le isi itu o lo’o fai ma popolega na ia fa’ailoa o le taimi e fa’afuase’ia ai le mana’omia o se fesoasoani ae o lo’o fa’aletonu auala.

“Ia ou te leiloa se faiga pe a te’i ua oso  fa’afuase’i se ma’i o se isi , ona ou te iloa a kili atu i tai le tagata ma’i i le mamao lenei mo se ta’avale e ave ai le falema’i , ia e popole le loto.

“Ona o le itu lava lea o le faigata o feoa’iga ona o le leaga o le auala i uta nei, ae ua maitauina le to’atele o aiga ua omai e fa’atoa le tele o fanau i ga’uta nei o le afio’aga.

“Ia e pei ona ta’ua muamua ia o le fa’afigata lena o lo’o i ai le taimi lenei.

Na ia fa’ailoa o le taimi lenei o le auala e le saogalemu ona o le tulaga e pei o le pefu.

“Ia e polepole lava le mafaufau aua e matua’i pefu lava le auala pe a o’o i vaitaimi e mugala ai.

“Aemaise ai o le fanau o le taimi lenei, ona o le fa’aete’etega i ma’i e maua ai ona o le lelei o le ea e manavaina.

“O le mafua’ga lea ua fai ai le pa la’au i luma o le fale ina ia tau fesoasoani e tau punipuni ai le sau o le pefu i tua i lo matou nei fale i le tele o aso.

“O le agaga maualuga lava ia saogalemu, ma ia vave se taimi e fa’alelei ai auala nei e sau i uta nei i si o matou nei pitonu’u.

“Ina ia sologa lelei ai pea le tele o nai aiga.

© Samoa Observer 2016

Developed by Samoa Observer in Apia