E fiafia pe ā galulue fa’atasi

By Vatapuia Maiava ma Ilia L Likou 22 November 2016, 12:00AM

O le galulue ai o le Komiti o Tinā i totonu o nu’u ma afio’aga ta’itasi o se itu lelei mo le lumana’i manuia.

Na maua le avanoa e le Fofoga o Samoa e fa’atalatalanoa ai le Peresitene o le Komiti o Tinā, Alofa Kimi o le afio’aga o Solosolo i le aso ananafi a’o galulue ai i le fa’amatagofieina o tafāala o le afio’aga.

“Ia e pei ona outou tau mai nei, o lea lava le masani a le Komiti o Tinā o le afio’aga nei o le galulue ina ia ma tapenapena le ‘a’ai nei.

“O se itu e fa’afetaia ai le lagolagosua o le tele o i latou nei ua mafai ona ‘auai mai lenei taeao mo lenei fa’amoemoe taua mo le lautele o le afio’aga nei.

“O nei galuega fa’atino e faia i masina uma, ia ae pei o lenei ua tatou i ai i vaitau e asiasi mai ai le tele o nai o tatou tagata mai fafo ia pei o lea le fa’amoemoega o lenei taeao ia fa’amatagofie mea uma.

“Ina ia amata ona tapena vaega uma nei ,e le gata la mo i latou omai mai fafo ae mo aiga lava i totonu o le afio’aga.

“O le taimi lenei olo’o i ai la matou asiasiga i maota ma laoa o tinā ta’itasi, e alu ai asiasiga i fale-le-ta’ua, o totonu i tapenapenaga a le tinā ia mo lona aiga ma nisi lava itu lelei...i le fa’ai’uga o le vaiaso lenei.

“Aua e le fai mo nisi, ae pei o le ave lava o le una’i i le atina’eina o totonu o o latou aiga.

Na ia fa’ailoa o so’o se fa’alapotopotoga lava e i ai lava ma fa’afitauli.

“Ia o le matou komiti sa i ai muamua e silia ma le luaselau nai tinā sa i ai, ia ua alualu ia ua fa’ama’amulu nisi ona o mea fai lava.

“O lea lava le tulaga e le’o fa’amalosia ia ae pei e ave fa’afautuaga lava ina ia fa’amalolosi.

“Ia o le lelei ai fo’i o le maopopoga o Komiti nei, aua fo’i o tinā o so’o se fa’amoemoega lea i so’o se mea e fai.

“A lelei lava nai tinā ia o le matagofie fo’i lea i so’o se afio’aga, ia e pei o ia lava galuega olo’o una’ia aua le lelei alu i luma o si o matou afio’aga nei.

“E fiafia pe ā galulue fa’atasi.

By Vatapuia Maiava ma Ilia L Likou 22 November 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>