Su’esu’e pea e Leoleo le maliu o se teine talavou

Tusia Pai Mulitalo Ale ma Fa’aliliuina: Ilia L Likou ,

200 Hits

 “O matou sa fagogota ae matou va’aia loa se mea o tafetafea i le sami,” o le fa’amatalaga lea a Sam.

“O matou sa fagogota ae matou va’aia loa se mea o tafetafea i le sami,” o le fa’amatalaga lea a Sam.

O le Aso Lulu na maua ai e ni ali’i faifaiva se to’alima o Utuali’i, le tino-maliu o se teine-talavou o tafetafea i le sami i gataifale o le afio’aga. Saunoa le So’oupu a le Matagaluega a Leoleo, Su’a Lemamea Tiumalu e fa’apea o le taimi lenei o lo’o fa’aauau ai pea a latou su’esu’ega.

E pei ona ripotia muamua atu ai, o lea tama’ita’i o lo’o taumate po’o ai, e i le va o le 16 – 18 tausaga le matua. 

Na fa’ailoa mai i le Samoa Observer e Sam Taufao, 25 tausaga o Utuali’i e fa’apea, e maua lea tama’ita’i-talavou ua maliu.

 “O matou sa fagogota ae matou va’aia loa se mea o tafetafea i le sami,” o le fa’amatalaga lea a Sam.

“Na matou fa’alatalata atu iai ma iloa, o le tino o se tama’ita’i ua maliu.” 

Na ta’ua, na fa’ate’ia i latou uma ma fefefe ona o lea va’aiga.  “O le mea moni, ua silia i le sefulu tausaga o ‘ou fagota, a o le taimi muamua lea ua ‘ou tau ai i se mea fa’apea i luga o le sami,” o le fa’aaliga lea a Sam. 

O Sam sa fagogota ma ona uso e to’atolu ma le uso o lo latou tama, i le afiafi o le Aso Lulu ae tau ai i le tino-maliu.

“E laki lava ona sa matou o-fa’atasi ma le uso o lo’u tama ae semanu e le-taitai tu’ua i luga o le va’a. Atonu pe nonoa lona vae i se maea ae toso i uta i le pa’umātū.”

 “A’o matou fo’i i uta, sa amata ona sau le palapala (toto) i lona isu ma e matua manogi lava,” o lana fa’amatalaga lea.

“O le mea na tupu, ‘ou te le’i moe i le po atoa lea ona ua le-mafai ona ‘ave’esea ona foliga ma lo’u mafaufau. E o’o fo’i i le manogi, na tumau i lo’u isu. “Atonu pen a maliu i le po anapo ae matou te le’i tau iai.” 

Na fa’afeso’ota’i vave le Ofisa o Leoleo ina ua taunu’u i uta le tino-maliu.

“Na ‘ou fa’alogo i ali’i-leoleo sa pu’eina ata o le teine o fa’apea, o ia lea na alu i se va’a mai Matautu,” o le fa’aaliga lea a Sam.t

Na ta’ua fo’i e Sam, e le’i malamalama i le fa’aaliga lea a leoleo ae na ia fa’atoa iloa  mulimuli ane, e iai se teine na sola i se va’a mai le Uafu i Matautu i le taeao lava lea o le Aso Lulu. E le’i maua se fa’amatalaga mai le Matagaluega o Leoleo ananafi, e uiga i lenei mata’upu. 

A’o le taimi nei, o lo’o ta’oto nei lona tino-maliu i le fale-maliu a’o fa’agasolo su’esu’ega a Leoleo.

© Samoa Observer 2016

Developed by Samoa Observer in Apia