Maliu se Pagota i le falepuipui i Tafa’igata

By Pai Mulitalo Ale 22 August 2016, 12:00AM

Na fa’amaonia mai e le Sui Komesina o Falepuipui, o Sagaga Galu Frost, le maliu ai o se tasi o pagota, o Aola Ulberg i le Falepuipui i Tafa’igata.  Na maliu o ia i le afiafi (5.00) o le Aso Gafua, 15 o Aokuso 2016, i se tasi o fale mo pagota-gasegase sa iai.

Na ta’ua, o Aola e le’i nofo i nofoaga masani mo pagota ae sa ‘ave i se tasi o maota e fa’apitoa mo pagota ua gasegase.  “Na maliu ai lava i le maota lea sa nofo ai ma sa ‘ou ‘avea i le falema’i le afiafi lava lea,” o le fa’aaliga lea a Sagaga.

Ua mae’a ona fa’ailoa i le Matagaluega o Leoleo le maliu o Aola ma o lo’o fa’agasolo a latou su’esu’ega i le taimi nei. 

“’Ou te manatu e le-mo’omia le faia fua o se ta’otoga-fa’apitoa, ona na maliu lava o ia i tulaga masani, ae pule lava latou, le foma’i-fa’apitoa mo su’esu’ega.”  E maliu Aola ua 59 tausaga o lona soifua ma o se tasi o pagota e ‘au-ma’ia, ma e tai ‘ave lava i vaiaso uma i le Falema’i i Moto’otua.   

 “O se tasi e ‘ese le gasegase so’o; sa ‘ou ‘ave fo’i se tusi i le Komiti o Palola, e fautuaina ai le magalo ai i tulaga tau-palola, ona o lona soifua. “O le mafuaga fo’i lea o le le-tu’ua fa’atasi ai ma isi pagota ona ua matou iloa, ua le toe tutusa lona malosi.”  Na ta’ua fo’i, e iai taimi e ‘ave ai Aola i le falema’i pe a le-talafeagai lona malosi ma le falepuipui.

“Na fa’amaonia mai lava e le Falema’i le tulaga lena o lona gasegase ma sa matemate lava ua a’afia i le kanesa.” 

Na fa’ailoa fo’i e Sagaga, o Aola ua tele ona moliaga e pei ona fa’asalaina ai i le to’ese.

“E le fou, ua masani ona ‘aumai i le falepuipui nei ma toe magalo.” Na ta’ua fo’i e Sagaga, ua fai lava e Aola le falepuipui ma ona aiga, le nofoaga e maua ai le filemu o lona mafaufau.  

“O se pagota e amio-pulea lelei ma o le a misia fo’i o ia ona o ona uiga lelei.” 

O le Aso Faraile talu ai, na fa’amaonia mai ai e le So’o-‘Upu a Leoleo, o Su’a Le Mamea Tiumalu, le faia pea o su’esu’ega i lea mata’upu i le taimi nei.  O le maliu o Aola Ulberg, sa ripotia i le Matagaluega o Leoleo i le Aso Malolo na fa’ailogaina ai le Aso mo Tama. 

O Aola na molia i le Aso 25 o Aokuso 2015 i moliaga o le taupulepule e fa’ao’o le oti ma fa’asalaina ai i le fitu tausaga ma le masina i le falepuipui. Na ta’ua e Sagaga, ua mae’a ona latou fa’afeso’ota’ia le aiga o Ulberg ma e le o iloa po’o afea e faia ai ona toe sauniga. 

By Pai Mulitalo Ale 22 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>