Manatu o le Fa'atonu - E si’itia le ‘au’aunaga pe a fai fa’atauvaga

By Marj Moore 22 August 2016, 12:00AM

Ioe, e fa’atalofa ma fa’afeiloa’i atu, ma momoli fo’i mo’omo’oga lelei ma fa’amanuiaga i le kamupani-va’alele a le Talofa Airways, le pisinisi fou tau-femalagaa’iga lea ua amata aloa’ia i le asō.

O le mea mautinoa, ua tele aso ma taimi o le Afioga a Toleafoa Jeffrey Hunter ma le faletua o Maria, sa fitaituga ai e tau fuafua, e tau-fa’asaosao fo’i nai seleni e fa’atau ai va’alele ae maise o le taligā o maliega  ma fa’amaoniga, e fa’atagaina ai ona felelea’i va’alele i totonu o le Pasefika. 

Moni ai ‘upu masani o le soifuaga nei, so’o se mea lava e lelei ona fuafua, e mautinoa e manuia ma taunu’u i se taunu’uga lelei ma fa’amalie-loto. 

A o le fesili, o tatou mo’omia moni ‘ea se isi kamupani-va’alele?

A’o lea ua iai le lua. Le Polenisia ma le Samoa ‘Ea o lo’o tautuaina Samoa e lua.

Ae sa’o lelei, pe a silasila fo’i i mea sa tutupu lata mai nei ae maise le matau a le mamalu o le atunu’u femalagaa’i.

A lea sa talosagaina i le Aso Tofi (silasila i le itulau 15 fa’aPeretania) le Ofisa Sili o Pulega a le Kamupani a le Polenisia, le Susuga a Seiuli Alvin Tuala, mo se “fa’amalamalamaga” i se komiti o le Maota o Amerika Samoa, lea sa fa’aleoina fa’alaua’itele sa latou fa’asea ona o le ‘au’aunaga a le kamupani va’alele lea i nai vaiaso ua tuana’i atu.

O fa’asea e aofia ai le tuai o femalagaa’iga ma le taligā e pasese, o nisi o malaga ae maise le ta’i-fia o itula o fa’atalitali le mamalu o le atunu’u ma pasese femalagaa’i, ae aunoa ma se fa’amatalaga e tu’uina atu i taimi tonu e tu’uva’a ai – o nisi taimi e o’o atu lava i le ta’i-sefululua itula o tatali. 

E le aofia i faitioga nei, le mea masani fo’i lea o le ta’u mai o le taimi e tu’ua ai le Malae Va’alele i Fagali’i, ae fa’atoa iloa mulimuli ane ina ua taunu’u i Fagali’i, e fa’atoa alu le malaga i le isi itula i luma atu. Le taimi ua tapena atu mo le potu e fa’atalitali ai mo le va’alele.  

E matua fa’atiga-ulu lava mo pasese ua mae’a ona fai a latou fuafuaga e toe fia taliu mai Pago i le aso lava lea ae maise fo’i le le-mautinoa o fuafuaga mo faigamalaga.

A’o tulaga la fa’apenei, e masani lava ona i’u ai i se tulaga lelei ma sologa manuia. 

Silafila fo’i i le Ali’i o Richard Branson.

Na ta’ua e le ali’i-pilionea faipisinisi lea, o le tele lava o ana taumafaiga, e afua mai i fa’asea ma fa’atiga-ulu sa feagai ma lana pisinisi – o se fa’ata’ita’iga lelei lava, le kamupani va’alele o le Virgin Airlines.

Na ta’ua e Richard, na maua mafaufauga, ina ua fa’aleaogaina e le kamupani va’alele a Amerika (American Airlines) se malaga e le’i-tumu ae toe tu’u iai lona igoa fa’atasi ma isi pasese i se malaga o le aso na soso’o ai.

Sa le-fa’atali loa le ali’i o Richard – ua sologa lelei lana kamupani va’alele o le Virgin, ae alu loa totogi-pau se va’alele, tu’u iai ma se fa’asalalauga fa’alauiloa i le malae-va’alele e fa’apea “$39 i le malaga e tasi a le ‘Ea Virgin” ma e le’i ‘umi ae tumu lana ulua’i va’alele.

“E iai si a’u tama’i-fautuaga: ‘Aua le ano iai, tau lava o le fai.” 

 “E iai loa se mafaufauga e iloa e maua ai se suiga i olaga o isi tagata, fai loa ma fa’atino. Ua 50 tausaga o ‘ou faia le mea lena. E ‘umi ma faigata i le taimi amata ae tatalo, e iai se taimi e ‘ausia ai le ‘olo lea ma sologa lelei ai le kamupani ona fa’aauau ai lava lea i se tulaga mautu ma lelei ma iloa ai, o le lagi lava le muta’aga ma fa’asolo manuia ai lava i le lumana’i. Tu’u atoa iai lou fa’atuatuaga ma taumafai e fiafia iai i fa’atinoga uma e faia.” 

Na mae’a lena fa’aletonu, tonu loa ia Richard Branson, ua le-lavā feagai ma ia ituaiga pisinisi tau-femalagaa’iga fa’apea, ma mana’o ai loa e fai iai o sana fuafuaga. Na o si vala’au lava i le kamupani a le Boeing pe iai ni a latou va’alele o le ituaiga o le 747 e fia fa’atau, ma amata ai loa lana kamupani va’alele fou lea, le Virgin Airlines.  

I Samoa nei, lea o le a mafai ona fai lau filifiliga i le kamupani-va’alele e fia malaga ai. Ae talitonu mai, o le tolu ai o kamupani e tauva mo pasese ma tagata-faimalaga, o le si’itia ai lea ‘au’aunaga i le tulaga aupito lelei ma fa’atuatuaina, tatou te mo’omia. 

Ae maise, o taimi tonu e malaga ai.  (Fa’aliliu e Maiava) 



By Marj Moore 22 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>