Tu’u-fa’atasi le poto-fa’a Saienitisi ma le poto-fa’ale Aganu’u aua le puipuia o la’au Samoa moni ma vaomatua

Tusia Maiava ,

120 Hits

So’o se taumafaiga lava e mafai ona fa’asaoina ai ma pulea lelei nei nofoaga, e matua talia fiafia e le malo fa’apea fo’i afio’aga ma alalafaga tonu e pulea ia nofoaga.

So’o se taumafaiga lava e mafai ona fa’asaoina ai ma pulea lelei nei nofoaga, e matua talia fiafia e le malo fa’apea fo’i afio’aga ma alalafaga tonu e pulea ia nofoaga.

O la’auSamoa moni ma le vaomatua o Samoa, o se tasi o puna’oa fa’aleNatura e fa’atauaina tele i le aganu’u fa’aSamoa, ma o se vaega ogaoga e fa’alagolago iai le soifua manuia o ona tagata.  

O le mafuaga lea e taua tele ai lo tatou galulue fa’atasi e puipuia nei la’auSamoa moni ma ona si’osi’omaga ae maise lava i lenei vaitau o le malosi na’ua o le fa’ananau i atina’e ‘ese’ese fa’apea fo’i le saoasaoa o le fa’ato’ateleina o tagata o le atunu’u. 

O le faiga lelei e fa’atino ai lea fa’amoemoe, o le fa’ailoaina lea o vaega o le vaomatua ua matua afain - pei o ‘ele’ele fa’asao e fa i nofoaga maualuluga i le ogatotonu o Savai’i, le ‘Ele’ele Pu’e-vai i Apia ma vaomatua fa’asaoina e lua i afio’aga o Falealupo, Uafato ma Ti’avea – ma galulue fa’atasi loa ma afio’aga ma alalafaga e fa’aauau lelei le va’aia ma le tausisia o ia nofoaga. 

So’o se taumafaiga lava e mafai ona fa’asaoina ai ma pulea lelei nei nofoaga, e matua talia fiafia e le malo fa’apea fo’i afio’aga ma alalafaga tonu e pulea ia nofoaga. Ina ia saofaga lea tulaga, e mo’omia lava le asiasia fa’alausoso’o ma va’aia lelei le tulaga saogalemu o lo’o iai i le taimi nei, ma silafia ai fo’i fa’atinoga ma le malamalama e mo’omia e avea ma ta’iala o le fa’asaoina o nei vaomatua. 

O le Aso Sa talu ai, na i-a fa’atasi ai le Matagaluega o Puna’oa ma le Si’osi’omaga i faiga fa’aPa’aga ma le Vaega Fa’ava-o-malo mo le Fa’asaoina o Samoa mo le faia o tapenaga fa’ai’u o le polokalame o su’esu’ega (Biodiversity Rapid Assessment Programme 2016) lea ua amata fa’agasolo i le taimi nei. 

E tolu vaiaso o le a fa’atino ai lea su’esu’ega, o lo’o aofia ai le 15 o le ‘aufaigaluega a le Vaega Fa’ava-o-malo ma saienitisi, 15 o le ‘aufaigaluega a le Matagaluega o Puna’oa ma le Si’osi’omaga, fa’apea le silia i le 60 sui mai afio’aga ma alalafaga e fa i Upolu ma Savai’i o lo’o iai vaomatua fa’asao nei. 

O nei fo’i su’esu’ega, o se vaega taua tele  mo le fa’amalosia o vaega ‘ese’ese a le malo o Samoa, mo le pulea ma le va’aia lelei o vaega o le atunu’u ua afaina ma fa’amautuina ai le puipuia ma le va’aia lelei o ‘ele’ele o le atunu’u mai a’afiaga ‘ese’ese, e ala i le faia lelei o ni fuafuaga talafeagai mo le fa’atumauina pea o nei puna’oa aua le lumana’i ma tupulaga fai-mai o Samoa. 

O le Poloketi lea (BIORAP 2016, o le a maua mai ai fa’amatalaga e aoga mo le iloiloina o a’afiaga o la’au ma le si’osi’omaga ona o le tau ae maise o la’auSamoa moni o lo’o totoe i Savai’i ma Upolu nei. O ia fo’i fa’amatalaga, o le a avea o se fa’ailoilo aoga mo le malo ma afio’aga nei, e fuafuaina lelei ai ni ‘auala talafeagai mo le fa’asaoina ma pulea lelei o vaomatua nei mo le aga’i i luma. 

E matua mo’omia lava le ‘auai o sui o nu’u i su’esu’ega nei, e fa’amautuina ai fo’i lo latou iloa o le taua ma le aoga o ia taumafaiga ae maise fo’i o le ‘aumaia o la latou lagolago i fa’atinoga uma o le poloketi aua le puipuia o le natura o mea, lea o lo’o fa’alagolago iai lo latou lava soifua. 

 “O le una’ia o faiga-fa’aPa’aga a le malo, o le ‘aumaia o se vaega o saienisi fa’apitoa mai le lalolagi ma le ‘auai o sui o afio’aga ma alalafaga, o le a mafai ai i lenei su’esu’ega ona fetufaa’i tomai ma iloa i le sui o le atunu’u i le fa’atinoga o su’esu’ega, o tomai fa’apitoa e mo’omia, ae maise fo’i le a’oa’oina ai o sui o afio’aga i ‘auala ma faiga e fa’atino ai ia galuega,” o le fa’aaliga lea a Schannel van Dijken, le Ofisa Sili o le Vaega Fa’asao Fa’ava-o-malo, o ia fo’i o le Ta’ita’i o le Poloketi lea. 

O lenei taumafaiga tu’ufa’atasi, e taua tele aua lava le pulea lelei o ia puna’oa talu ai, o le ‘autu tonu lea o lo’o tulimata’ia, o le taunu’uga manuia ma le fa’aauaina o le poloketi.

O fa’amatalaga o le a aoina ma maua mai lenei su’esu’ega, o le a fa’aaoga e le malo fa’apea pulega a ali’i ma faipule fa’apea ta’ita’i, e faufau ai ni fuafuaga e aoga mo le pulea ma le va’aia o vaomatua fa’apea i le lumana’i ma fa’aauau ai pea ona avea nei puna’oa ma to’omaga o afio’aga ma alalafaga uma o Samoa,” o le fa’aaliga lea a Seumaloisalafai Afele Faiilagi, le Pule o le Poloketi lea a le Matagaluega o Puna’oa ma le Si’osi’omaga. 

I vaiaso muamua e lua a’o le’i amataina le su’esu’ega, o le a fono ai sui o le malo ma le Vaega mai fafo ma sui o ali’i ma faipule, e fefa’asoaa’i ai le fa’amoemoe ‘autu o lea poloketi ma talosagaina ai fo’i le lagolago mai afio’aga ma alalafaga, i le tauto’aluaina o saienitisi mai fafo i le fa’atinoga o galuega mo’omia.

O le manuia o lea fa’amoemoe, e fa’alagolago i le sao o ali’i ma faipule o afio’aga o iai nei puna’oa aua le fa’asoaina mai o lo latou tomai ma le silafia fa’aleAganu’u, ae maise fo’i sa latou fa’alumaga mai saienitisi mai fafo o le a latou galulue fa’atasi i lenei taimi umi.

Ua fiafia lava afio’aga ma alalafaga e ‘auai i lenei poloketi ma ua talitali mai ma le toto’a le taimi e talimalo ai i nei tagata-iloga mai fafo.  Ae le mafai lava ona fa’atinoina lenei taumafaiga, e aunoa ma le lagolago mai o e tonu e pulea nei ‘ele’ele, latou e silafia lelei vaomatua ma tele lo latou silafia.

O se fesoasoani tele i le tau sailia o ‘auala-savali aupito lelei ma vave, o nofoaga e ono tolauapi ai ae maise oga’ele’ele e tatau ona fa’atino ai su’esu’ega a saienitisi mai fafo.

© Samoa Observer 2016

Developed by Samoa Observer in Apia