Tamaiti A’oga mo Iapani

By Deidre Fanene 22 July 2016, 12:00AM

E to’alima tamaiti a’oga mai a’oga eseese o le a malaga atu i Iapani i le faaiuga o le vaiaso ona o le agalelei o le Yazaki ED’s mo le polokalame o le  ‘Summer Camp’ poo le Mafutaga o le Tau Mafanafana.

Fai mai le Sui Peresetene o le Yazaki Eds Samoa o Shuji Tange, o lea polokalame o le a tuuina atu ai i tamaiti le avanoa e asia ai Iapani ma lana aganuu, faa-masani i le olaga i totonu o Iapani ma o le mea e sili ona taua-o le asia lea o isi fale gaosi mea o le Hazaki.

“O lenei polokalame na amata i le 1988-o lona uiga-ua 27 tausaga talu ona faatino e le kamupani lenei polokalame,” o lana faaaliga lea. “O le Kamupani a le Yazaki o loo i totonu o atunuu e 47 o le lalolagi ma o lenei la polokalame-e 476 tamaiti ia o le a malaga atu i Iapani mo le Polokalame o le Summer Camp.

“O tamaiti a’oga mai Samoa e amio lelei ma ou te talitonu o le a outou fiafia i la outou malaga, taumafai ma a’oa’o ni mea se tele e mafai ona outou aoaoina e uiga i le aganuu ma nofoaga ia o le a outou asiasi i ai.” Na ia faamanatu i tamaiti a’oga e faapea o lenei avanoa ua mafua ona maua ona o le galulue malosi o latou matua i totonu o le kamupani.

“Ona o le faamaoni o outou matua I le kamupani ma le galuega fita o latou faia i totonu o lenei kamupani-o lea ua matou manatu ai –o la matou auala lenei e faailoa atu ai la matou faafetai ia i latou,” o lana faaaliga lea.

O le mea lea-ia outou taui mai lenei agalelei e ala i le avea o outou ma tama ma teine lelei i totonu o Iapani ma ia faafiafiaina outou i la outou malaga ma ia outou toe taliu mai ma se tala fiafia mo i latou ina ia mafai ai ona latou faaauau pea ona galulue i totonu o le kamupani.

“Ia outou nonofo i le saogalemu ma ia fesoasoani le tasi i le isi- ona o nisi o outou-o lo outou taimi muamua lea i totonu o Iapani, o le mea ia outou faaetete ai ma vaai faalelei outou- a outou i ai i lena atunuu ae ia sili ai ona outou maua le fiafia” E tusa ai ma le Fesoasoani Faapitoa a le Sui Peresetene o Etsuko Okishiita-o lea avanoa ua maua ona o matua o nei tamaitai a’oga-ia o loo avea ma tagata faigaluega o le kamupani mo le sili atu i lo le 20 tausaga.

O Matua o nei tamaiti a’oga ua leva ona galulue mo le kamupani mo le tusa ma le 20 tausaga i le taimi nei ma o la matou faiga lea e faailoa atu ai le loto faafetai-o le tuuina atu lea o le avanoa ia latou fanau e malaga ai ma faafiafiaina i le ‘Summer Camp,” o le faaaliga lea a le tama’ita’i.”

O matua o se tasi o tamaiti a’oga mai le Kolisi o Leifiifi o Isac Laiafi –na ia faafetaia le vaega o le pulega o le Yazaki Samoa mo le avanoa ua tuuina atu ia latou fanau. 

 “O Avanoa faapenei e le masani ona maua i aso uma ae o i matou o matua-matou te fia faafetai atu mo le aloa’ia o a matou galuega i totonu o le Kamupani,” o lana faaaliga lea.

“Ou te iloa e anoano isi tamaiti a’oga na talosaga mai ae o lea ua tuuina atu ia te outou le avanoa ia outou fanau e o ai i lenei malaga o le a manatua pea-ma o le mea lea e momoli atu le faafetai tele.” Ua matua naunau lava Tofuola Siaki mai le A’oga Maulalao a Laulii e fia vaai ia Iapani mo le taimi muamua.

“Ua ‘ou matua fiafia lava talu ai-o le taimi muamua lenei o le a ‘ou malga ai i se isi atunuu,” o le faaalia lea a le tamaitai. “O lenei malaga e matua taua tele talu ai-ou te fia vaai pe faape’ī Iapani, le latou aganuu ae o le mea e sili ona lelei-o le a matua maua ai lo’u fiafia tele. 

“Ou te fia faafetaia foi lo’u tina mo lana galuega fita lea ua mafai ai ona ‘ou maua lenei avanoa e malaga atu ai, Ou te alofa ia te oe”.O lea ‘aumalaga o le a ta’ita’ia e Sione Alesana ma o le a latou tuua Samoa i le Aso Tofi mo se malaga e tasi le vaiaso i Iapani.

By Deidre Fanene 22 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>