Fa’afetaia le Pulega o le Suāvai

Tusia Aruna Lolani ma Fetalai Tuilulu’u ,

57 Hits

Maletina Asia o Faleula.

Maletina Asia o Faleula.

O le lagona o le fiafia na fa’ailoa e Maletina Asia o Faleula-Uta ona o le mafai lea ona maua se  galuega mo lona tuaganae i a Akuino Folau i le Pulega o le Suavai.

O Akuino na mafai ona maua le fa’atalatalanoaga ma le Fofoga o Samoa ma ia fa’ailoa ai le tulaga pagatia ona o le fia maua lea o se fesoasoani tau i galuega.

Na fa’ailoa e lona tuafafine lona agaga fa’afetai ona o lea fa’amama avega ua maua e lo latou aiga ma o le agaga maualuga lava e fesoasoani tele ai i aiga.

Sa ia ta’ua o le tele o pili e tatau ona totogi ma isi me e fai i totonu o le aiga ae peita’i e umi lava se taimi o tau sefe se tupe e totogi ai mea e tatau ona fai. 

“Ia o lesi itu, e leai sesi o le matou aiga e faigaluega, e faigata lava mea uma.” Akuino I le fa’atalatalanoaga talu ai.

O Akuino e 37 le matua o lona soifua ma e nonofo fa’atasi ma isi ona uso e to’alua ma e matai uma i la’ua.

“A iai se matai o le aiga, o le tele fo’i lena o mea e fai i le nu’u ma le lotu.

“Mafaufau la pe a to’alua ni matai o se aiga ae na o le ma’umaga e fa’alagolago ai i mea’ai aemaise se tupe pe’a mana’omia, o le matua tele a o mea e tatau ona fai.

“O matou a ia o le ma’umaga a le tali o lo’o iai i le taimi nei pea mana’omia se tupe mo saogatupe pe totogi fo’i mo ni mea e mana’omia, ma o se mafua’aga lena ua fia maua vave ai se galuega.

“O a’u sa ou galue fa’atasi ma isi tagata o le nu’u i le moaina o vao, ae sa fa’auma la’u galuega ina ua ou faimalaga atu i atunu’u i fafo.

“O lea la ua ou toe su’e galuega ma o la’u tatalo ia ou mauaina se galuega e fetaui ma lo’u tomai lea iai; ou te lelei i le moaina o le vao, o le fa’amama ma le teuteu fanua fa’apea fo’i le fai fa’ato’aga.

Sa ta’ua e Akuino o ia sa le lelei i se aoga.

“Sa uma la’u a’oga ina ua ou iloa ou te lelei ai, ua ou fa’alogo ifo ua ou fia galue i se galuega e fetaui ma lo’u malosi.

“O lea la sa ou amata ai i le fai ma’umaga ma i’u ai na ou moavao.“E tele a le fia fai o so’u aiga mo le lumana’i ae e le mafai. Ou te mana’o a a’u ia e fesoasoani ma tau atia’e muamua lo’u aiga i le taimi lenei.

“Ma o le mafua’aga fo’i lena ou te talosagaina ai se galuega e fetaui mo a’u ina ia ou fesoasoani ai i lo’u a ia tagata aemaise o’u uso.”

© Samoa Observer 2016

Developed by Samoa Observer in Apia