O LA’U TALA FO’I

319 Hits

1. Matauina i Tala Fou le tele o faaseā a le atunuu i le Samoa Observer ona o se faaletonu tau le faasalalauina o se faalavelave na tupu- lea na pule ai se tasi o alii talavou i lona lava soifua! E tusa ai la ma manatu faaalia o le toatele-o lea faalavelave  e fai sina matuitui i le aiga o le ua maliu-atoa ai ma le tele lava o isi finagalo faaalia.

O le tali atu la a le nusipepa—O le tuuina atu lea o se Faatoesega i le atunuu ma tagata uma na tuuina mai faaseā…..O lena la faatoesega-o le pine lea o le lape o le nusipepa! Maumau la pe ana faapea le lagona o tagata latou te faia mea sese i le atunuu!

Ae o le felavelave-a faaseā atu le atunuu-ae atili ai ona fai mai upu e le talafeagai ma le fiapule aoao i le atunuu! Afai la ua fai e le nusipepa o le Samoa Observer le faata’ita’iga lelei- o le faamaulalo i le atunuu pe a ua sasi ma sese-o se faata’ita’iga lelei i le atunuu atoa aemaise ai o tatou ta’ita’i o le atunuu-ae le o le lafo mai o upu mataga ma le faasausili! O le a sou taofi? 

2. Matauina foi se faasea a se tasi e suafa ia Cindy of Samoa- e tusa ai ma le tala na faasalalauina e le Samoa Observer -ma o le matau i ai –o se tasi lea o i latou ua faaigoaina o ‘faafafine’! O lea la faasea- e peiseai ua laga mai ona o lē na aafia -o se tasi lea o le latou vaega!

Ia e moni lava o le aia tatau a le tagata soifua-ae ia manatua foi –o le aia tatau foi a le nusipepa - le faailoa atu lea o mea o loo tutupu i totonu o le atunuu! Ia-afai ua alu faa-vaega faapea le faiga o le taaloga i le taimi nei-ua amata la ona tau nunumi le mafaufau pe afai- “e na o le tane ma le fafine” na fai e le Atua! O le a sou taofi?

Matauina foi le vave tali mai o le Palemia e uiga i faiga faavae ma ala taualoa tau Nusipepa ma le faiga o ana lipoti-ma e aliali mai- e faasino foi i le sasi o le Samoa Observer ma lona lipotia o se faalavelave na tupu. O le mea la ua matauina-e vave tele ona faasaga mai i le lape o le isi tagata-ae a tau loa i lona lape ma lana faigamalo-e leai se mea faapena!

A tuu mai la i galuega tau Nusipepa-o le lape ‘ea o le Samoa Observer- o le tala pe o le ata o le tala? Afai la o le tiute o le nusipepa o le faaalia o mea e tutupu i le atunuu-ana le seanoa la le ata na tuuina atu faatasi ma lea tala- e i ai se faaseā?

O le tulaga ua aliali mai-e vave tele ona tula’i mai e lote le faaletonu o le isi-ae a pa’ia loa ona ia lava faaletonu- e fiu e fai atu ae fai lava le mea e loto i ai? Afai la ua uma ona faamaulalo  aloa’ia atu le nusipepa i le atunuu  ona o lea faaletonu-o le a le mea e saga toso ai fua le la’au felefele? O le fesili-e faapefea ou lava faaletonu? Ua e faato’ese mai i le atunuu? O le a sou taofi? 

© Samoa Observer 2016

Developed by Samoa Observer in Apia