O LA’U TALA FO’I

166 Hits

1.Matauina i Tala Fou fai mai ua faanatinati ona toe fai e le Palemia le toe teuteuina o le Faavae o le Malo o Samoa. Fai mai Tala Fou ua faamaonia e le Palemia le toe teuteuina o le Faavae e avea ai le Talitonuga Faa-Kerisiano-ma tapuaiga aloa’ia a Samoa.

Ae peita’i e le’i ta’ua e le Palemia pe ua talia e le Malo le talosaga a le Faalapotopotoga a Ekalesia Kerisiano Soofaatasi- e tapu ai le tapuaiga Moselame talu ai lona uiga faatupu faalavelave.O le ta’utioga la a le Palemia- e le faia e Ekalesia Kerisiano ia faiga.

O lea e tatau ai ona matua faaeteete Samoa i lea tulaga.O le fesili la-o le a le pogai o le toe teuteu o le Faavae o Samoa? E leai se mataupu e tasi na tu’u faa-pagaenoa e le Fono Faavae na gafa ma le faatinoina o le Faavae o le Malo Tuto’atasi o Samoa e pei ona i ai nei!

O le pinefaamau la o la’u upu-silasila lelei ane la Samoa i lou Faavae –“ua uma ona faamaonia e le Fono Faavae o le Aso 28 o Oketopa 1960-o le Malo Tuto’atasi o Samoa e faavae i luga o lana aganuu ma le talitonuga faa-Kerisiano! O le a la le pogai o le toe Iloilo o le Faavae?

Ina ia toe aumai ai nisi lotu poo talitonuga i totonu o le atunuu? O le tuu-a-lalo-‘aua le lotea afi.’O le a sou taofi? 

2.Matauina foi  i Tala Fou le tele o suiga i le itu i tofiga o le Ekalesia Faapotopotoga Kerisiano ua faia a’o le’i mae’a le Fono Tele talu ai a le Ekalesia i Malua. O nisi o le ‘au-matutua ua malolo penisione ae ua solo’a’i atu Leoleo Mamoe fou.

A tatou tilotilo la i nei fesuiaiga- e le o se mea fou ae o le faagasologa masani lava! O le tatalo la-talosia ia sagai ane ‘ai o le Tai- e toe putiputi ma faaleleia atili nisi o faaletonu na tulai mai talu ai nei!

A matau atu i Tala Fou ma le anoano o faaletonu tau tupe o loo pagatia ai le Ekalesia-ona toe manatua ai lea o afioga a le Alii ina o le a afio i le Lagi-……ia outou fafaga i a’u mamoe! Ia o le lalolagi lava lenei tatou te i ai-ae le faapea ai- e tatau ona tatou faata’ita’i i le lalolagi-leaga o le finagalo o le Alii-ia momoli le fe’au o le Tala Lelei i le lalolagi uma! O le a sou taofi? 

3. Matauina i Tala Fou se ulutala fai mai ua lapata’ina le Malo -e uiga i le faia o se Fuafuaga Mata’utia i le Faavae-ma o lea tulaga e aliali mai e faasino i le tapuaiga Mosalemi-pe afai e faataga mai i totonu o Samoa!

Ia atonu e fai mai nisi e leai se mea e afaina ai-ae o le faalavelave-tatou te le’i vaai tino i lenei ituaiga o tapuaiga ma lona faatinoga-faatasi ai ma ana aoaoga!

Ia atonu e sa’oloto lava le tagata ia e faaali ona mafaufauga-ae ia manatua la-afai ua tatou iloa ma vaai tino i mea o loo faatupu e lea tapuaiga i fafo- e mafai la ona tuuina mai se ta’utinoga-‘a o mai nei tagata i Samoa nei-e leai se vevesi e tulai mai?

O le Tapuaiga Mosalemi la- e le o se lotu fou nei-o le lotu ua leva ae o lea ua i Samoa nei. O le fesili la- o le a le Tapuaiga na talia e o tatou Ta’ita’i ma o tatou matua- e avea ma tapuaiga aloa’ia a Samoa? O le tali- o Ekalesia o Talitonuga Faa-Kerisiano ia na o mai i Samoa nei!

Afai la ua talia e o tatou Taitai na faavaeina le Malo o Samoa e faavae lo tatou Malo i ana aganuu ma talitonuga faa-Kerisiano-o le a la le pogai e saga aumai ai nei lotu i le atunuu ae o lea tatou te iloa lelei lava le faatupu faalavelave o ia talitonuga?

Talofa e Samoa-e te nofo i mamalu o le Atua Soifua-ae te losilosi i talitonuga faa-tiapolo e te malaia ai! O ai la na faaolaina le lalolagi ma i tatou nei? O Iesu le Faaola ma o le Alo Pele e Toatasi o le Atua poo se isi na faavaeina nei talitonuga?

O le a sou taofi?

© Samoa Observer 2016

Developed by Samoa Observer in Apia