Fa’amalosi-‘au le Peresetene ia Samoa “ …ia tatalo…”

By Deidre Fanene 22 April 2016, 12:00AM

O le taeao ananafi, na feiloa’i atu ai le Peresetene o le Ekalesia Asofitu i le Lalolagi, le  Faife’au Toea’ina o Ted Wilson, i Lana Afioga le Ao Mamalu o le Malo, Tui Atua Tupua Tamasese ‘Efi.

O lea feiloa’iga sa fuafuaina i se mafutaga-tatalo fa’apitoa sa ‘auai le Ao o le Malo ma le Masiofo o Filifilia Tamasese, le Sui-Palemia, Fiame Naomi Mata’afa ma nisi o ta’ita’i o le ekalesia. 

O le fonotaga lea ananafi, se tasi o vaega mulimuli o fuafua mo le asiasiga a le Faife’au Toea’ina ma lona faletua o Nancy a’o le’i tu’ua le atunu’u. 

O le a malu-taeao ma le fono-tatalo lea, o se avanoa o le Ali’i Peresetene e saunoa fa’afeiloa’i ai i ta’ita’i o le atunu’u ma tatalo fo’i mo Samoa. 

“O le mea aupito taua lava lea mo tatou uma, o le tatalo,” o lana saunoaga lea. 

“E amata lava i le taeao pe a maleifua mai, ona asiasi lea i Le Atua e ala i le tatalo ina ia fa’atasi mai mo tatou i mea uma o le a faia.

 “E o’o lava i taimi o le aso, e tatau lava ona tatou tatalo. E le tau to’otutuli, pau lea o le musumusu atu ia te Ia ma talosagaina Lana fesoasoani mo tatou uma pe a tatou lagona le vaivai.

“E tatau ona ‘ave o tatou taimi e fa’atasi ai ma Iesu, na o tatou lava ma Ia ma talosagaina Ana fa’amanuiaga mo lo tatou ola.” 

Na fa’amanatu fo’i e le Toea’ina, o tagata ta’itasi uma, e lo’o iai se fa’amoemoe lelei o iai mo le ola nei.

“O lo’o tatou savavali i le lalolagi ma le fa’amoemoe, e ‘au’auna i Le Atua,” o lana saunoaga lea. 

“’Aua le fa’amoemoe i le iloa ma le malamalama o ananafi e ta’ita’ia ‘Oe i le aso ae fa’atuatua i Le Atua e ta’ita’i ‘Oe i taimi uma.” 

By Deidre Fanene 22 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>