Fa’amalo & Fa’afeiloa’i le Palemia e lana Matagaluega

Tusia Maiava ,

217 Hits

MALO TAUATA’I: Le Ali’i Palemia (luma) ma le Ofisa Sili, o Agafili Shem Leo ma le Pulega a le Matagaluega a le Palemia ma le Kapeneta.

MALO TAUATA’I: Le Ali’i Palemia (luma) ma le Ofisa Sili, o Agafili Shem Leo ma le Pulega a le Matagaluega a le Palemia ma le Kapeneta.

E le o se tulaga na matua ogaoga le fa’afeiloa’iga o le Ali’i Palemia ma aloa’ia ai fo’i le fa’amalo a lana matagaluega, i lo latou lava Ofisa i le taulaga.

Na saunoa le Ofisa Sili o le Matagaluega a le Palemia ma le Kapeneta, o Agafili Shem Leo e fa’apea: “Atonu e le’i iai se finagalo o le matou Minisita e fa’afeiloa’i aloa’ia o ia ma tu’uina atu ni meaalofa e fa’ailo ai lo matou fiafia, ae na manatu lava, ne’i misia lenei avanoa e fa’afeiloa’i aloa’ia ai ma avatu le fa’amalo i lana Afioga, le Ali’i Palemia aupito ‘umi i tala-fa’asolopito o le atunu’u.”   

Ae na talia ma le agaga-fiafia tele e le Palemia, Tuila’epa Sa’ilele Malielegaoi lea fa’alo mata’ina ma ia fa’afetaia ai le Ofisa Sili ma le ‘Aufaigaluega ae maise fo’i o le galulue malosi aua le tautuaina o le atunu’u i tiute ma faiva o feagai ai. 

E le’i ‘ela fo’i i lana silasila, le tele o finagalo fa’ama’ite mea-lelei ae maise fo’i, o polo-tu’u-mamao na ta’ape fa’afatu-ati atu i tausaga e tele o lana nofoa’iga, peita’i o lo’o maua’a pea lona finagalo, o lo’o sologa manuia ma soifua fiafia pea le atunu’u, i lalo o lana ta’ita’iga fa’atasi ma le galulue punoua’i o le ‘aufaigaluega. 

“Fua le va’ai i le tatou atunu’u i le taimi lenei ma le 30 tausaga talu ai.

“’Aua lava ne’i galo, o lo’o tatou soifua i se lalolagi o lo’o iai tagata, na o le pau lava lea o le latou ta’aloga e fiafia tele iai, o le sa’ili’ili masei,” o le saunoaga lea a Tuila’epa. 

“Leva ona avea ma tulaga e fa’avae ai fa’atosina-fa’aPolokiki ma taulia ai fo’i nusipepa.   

“A o le vaega tele lea o la’u tautua i ‘upu-fai a malo, o le atina’eina lea o le atunu’u lenei ma lo tatou malo. 

“A ua na o a’u lava o se ‘au’auna, e tele fo’i ‘ou vaivaiga a ‘ou te talitonu lava, e mafai tele ona ‘ou ta’ita’i le atunu’u, fa’atasi ma la tou fesoasoani mai e momoli atu le fe’au i se ‘auala lelei faigofie ma malamalamana.” 

O le tausaga e 1980 na ulua’i ofi ai Tuila’epa i upu-fai-a-malo ina ua manumalo i le palota la’ititi a Lepa, ma avea ai ma Faipule o le Itumalo.

Mai lena taimi, o lo’o fa’auau ai pea le avea ma sui o Lepa mo le 25 nei o tausaga. 

Sa avea ma Minisita o Tupe mai le 1991 – 96 i le faigamalo a Tofilau.

O le tausaga e 1996 na tofia ai e avea ma Sui Palemia. 

Lua tausaga mulimuli ane, na se’ei ai i le Tofi Palemia e sui-tulaga ia Tofilau Eti Alesana ina ua ritaea mai le palemene ona ua gasegase, ma avea ai loa ma Palemia lona ono o le Malo o Samoa. 

O lana ta’ita’iga manuia o le Vaega e Puipuia Aia Tatau a Tagata (HRPP), na toe pale mai ai i Faiga Palota o le 2001, 2006, 2011 ma le 2016. O ‘upu masani, o le isi anoano, ua  tala-fa’asolopito…

© Samoa Observer 2016

Developed by Samoa Observer in Apia