Manatu o le Fa’atonu - O Fete’enaiga o lo tatou taimi

Tusia Mata'afa Keni Lesa ,

115 Hits

Faaliliu e Seagaitumua Tupuola

Ia-o lea ua uma ona toe faaui i tua talosaga uma tau le faiga-palota-ma le tasi na matua pa’ū faō lava i luga o lona ulu-talu ai le le lava o faamatalaga molimau-o le mataupu sa finau ai o le aganuu ma le tulafono aloa’ia lea ua tula’i mai ai ni fesili uiga ese mo i tatou i le avea ma atunuu.

O nei faiga uma tau le faapalepale, faamagalo atu ma tonu na fai i tua o le pupuni, e anoano mataupu ua tula’i mai ai –ia e tatau ona tatou fo’ia. O tusa lea lo tatou tulaga temokalasi ma o tatou mafaufauga? 

O tatou faia ‘ea le mea tonu? O faafoeina ‘ea lenei atunuu e ni faiga faavae tau faiga-malo lelei ma le mautali atu pe ua na o se mea lava e faapito i luma? O le a le aoga o le sui o tulafono tau faiga-palota ma le faamoemoe e teuteu mamā ai le faiga palota ae o lea ua faataatia ese i tafāala ma fulitua i ai? 

O le mea ‘ea o lea faatoa tatou aloa’ia faale-tulafono faiga pi’opi’o? O i tatou ‘ea o se atunuu uiga ese lea o feteenaiga. 

Ma e tusa ai ma fesili ua uma ona lāgā ma le tatou sailiga mo ni tali, ua matou manatu e tatau ona matou faasoa atu se tusitusiga ma matou lomia faasalalau i le tausaga talu ai  e uiga i nei fesili uiga ese. 

O lea tusitusiga sa faa-Ulutalaina-“O faiga pi’opi’o a Papalagi ma le mativa o le tagata Samoa,” o loo i ai ni mea e tutusa ai e tusa ai ma amio faaalia i mataupu na aafia ai-o le mativa ma faiga pi’opi’o sa aofia ai. O la matou faaupuga la lenei na matou fai atu ai i lea taimi. Afai o oe o se tagata asiasi mai-poo se tagata ese-i lenei atunuu, e mafai ona faamagaloina oe pe a e manatu e faapea o i matou tagata Samoa o ni tagata uiga ese lava. E faasino la matou faaupuga i le mea moni e faapea o tatou tagata e masani e masani lava ona talia ma fusi mau le tele o mea a papalagi- ae vagana ai pe a pa’ia mea e leaga ai le vaaiga ia i matou.

Ia ona faafuase’i ai lava lea ona fai le taaloga a Samoa ma le pepe a le papalagi.  Ioe, matou te fiafia i mea a papalagi ma ua matou faatagaina i latou ina ia liua le ala o loo matou ola ai. Ua outou silafia le mea lea ou te fai atu ai. Ae a pa’ia loa faiga pi’opi’o, faafitauli ma le mativa, e faafuase’i lava ona e maua e faapea o loo i ai se fua e ese ai mo le Samoa ma le papalagi.

O lea la o le a ‘ou faamatala atu. I se taimi ua mavae e le’i mamao tele atu, na maua ai e le Pule ma Su’etusi Sili ni faiga uiga ese tau faiga pi’opi’o ua le mafai ona taofia- faatasi ai ma faaletonu tau pulega i totonu o nisi o ofisa ole malo. O ia mataupu na faaalia manino i totonu o se lipoti e tasi pe lua-ae a itiiti mai e tolu lipoti na faataatia i totonu o le Palemene. O nei lipoti sa tuuina atu i se Komiti e igoa o le Komiti a Alii Ofisa o le Palemene (O.P.C.). Sa latou su’esu’eina ia tuuaiga, o lona tau i tagata totogi lafoga e matua anoano lava tupe ma na manaomia i latou ina ia toe lipoti atu i le Palemene mea na maua ia latou sailiga. 

I le faaiuga, o le vaega a le O.P.C. sa aofia ai ni tausitusi tulaga maoa’e, o loia ma isi lava galuega taualoa, na faamaonia ai mea na maua i suesuega a le Pule ma Su’etusi Sili.  Na latou maua o loo i ai ni faiga pi’opi’o a nisi o tagata faigaluega o le malo ma sa i ai foi ni taimi sa fai ai ni taupulepulega leaga e faaaoga sese ai tupe a tagata totogi lafoga.  Ina ia fo’ia lava lea faafitauli, sa fautuaina e le Komiti le faiga o se moliaga faale-tulafono e faasaga i tagata ta’ito’atasi o loo tuua’ia.

Ia, e leai se mea faapena na tupu, e pei ona manino mai. Sa faataatia lea lipoti i le laulau-a-fono ae nofo le faiga-malo na tafi ese e ala i lana tali mai. Ua le o le lipoti poo le tali mai a le malo o se mataupu lea o se felafolafoaiga lautele ona o le mea lea sa tatau ona e Sui Usufono o le Palemene ma isi isi, e pei ona latou fai mai, o se tala faasolopito lea.

I lenei la Aso i totonu o le parataiso, o tagata na tuua’ia o loo fetamo’ea’i solo lava, ma soifua i o latou olaga e aunoa ma sina popole i ai le lalolagi nei. I fafo mai la o le Palemene, o le tali a se Sui Usufono sinia o le Palemene e uiga i faiga pi’opi’o fai mai ua matua faafita ai le mafaufau i lea taimi. O loo tumaupea lea tulaga. Faafofoga mai foi: “O faiga pi’opi’o a le Papalagi e ese mai le faaiga pi’opi’o a Samoa. A faatusatusai atunuu tetele, o soo se faiga pi’opi’o i totonu o Samoa e matua itiiti lava. 

 “O le faiga pi’opi’o lea na tupu i totonu o le Iunaite Setete faatasi ai ma lana faafitauli tau tupe na sasao atu i isi lava atunuu ma aafia ai tatou ma isi atunuu o le lalolagi. Ae afai o i ai se faiga pi’opi’o i totonu o Samoa, e le aafia ai Amerika Samoa, o se mea masani lea mo tatou.” E a ‘ea! O lona uiga la- o loo i ai se faiga pi’opi’o a papalagi ma se faiga pi’opi’o a Samoa?  Ma o le faiga pi’opi’o a Samoa e gata lava iinei e moni?  O Lapisi. O se matua uta mata’utia lava o lapisi!

O le a faatu la lea mataupu iina mo le taimi nei ae se’i o tatou toe asi le mataupu i le mativa. O le vaiaso talu ai, na toe teena ai foi e le Palemia o Tuilaepa Sa’ilele Malielegaoi manatu e faapea o loo i ai le mativa i Samoa. 

 “O loo i ai se faiga faa-Papalagi e faamanino ai le (mativa), o le faaaliga lea a Tuilaepa e uiga i lipoti o loo faamaonia ai le i ai o le mativa iinei. Fai mai le Palemia ua uma ona ia faatonuina le Vaega o Fuainumera Faamaumauina ina ia faaaoga le “faiga faa-Samoa” e fua ai le mativa, ae le o le faiga faa-Papalagi. E le o le taimi muamua lenei ua lapisi ai e Tuilaepa manatu e uiga i le mativa.

E le’i umi se taimi talu ona fai e lana faigamalo le ulua’Lipoti i le Tulaga o Aia Tatau mo Samoa, lea na faamaonia ai le mativa e le faafitiai totonu o lenei atunuu, na ia toe liliu mai ma faaigoa i latou na tusia lea lipoti o “vale”. O lea lipoti, i se tasi itu, na tatala aloa’ia e le Palemia lava ia. Na tuufaatasi e le Ofisa o le Komesina o Sulufaiga e avea ma Faalapotopotoga a le Malo tau Aia Tatau a Tagata (N.H.R.I.) o Samoa, na maua ai e faapea o le toatasi mai tagata ta’ito’alima uma o Samoa o loo soifua i se olaga maliva. 

Ia, toe silasila mai: “E ui lava i le tulaga auiluma o i totonu o le ata tele tau le tuputupu a’e o le tamaoaiga ma i totonu o le tulaga maualuga o fuafua tau le atiina a’e, ae o loo i ai se tulaga eseese i taunuuga tau le atiina a’e aemaise ai lava i totonu o nuu i tua.

Pe tusa ma le 20 pasene o le faitau aofa’i o tagata Samoa  o loo soifua i lalo ifo o le laina o manaoga faavae (B.N.P.L.), faatasi ai ma se vaega maualuga o tagata o loo nonofo i nuu i tua  ua pa’ū’ū i lalo ifo o le (B.N.P.L.  Basically, this means that about 1 in every 5 Samoans lives in poverty.” E tusa ai la ma lona faavae, o le uiga o lenei mea e faapea e tusa ma le 1 o tagata ta’ito’alima uma 

Uso e, o le a matou toe fai atu foi, o ia upu e le o ni a matou upu. O upu na o le lipoti na faamaonia e le Palemia o Tuilaepa e tusa ai ma lana lauga i le tatalaina aloa’ia o lea lipoti. O le isi itu, na ia tapā le faavaeina o se Komiti Faa-Palemene na te tuliloaina fautuaga a ia lipoti.

Ae peitai- na toe sui lona mafaufau. “O lena tulaga e faavae i luga o le mafaufau faa-Papalagi,” o lana faaaliga lea.” O se mafaufauga faavalevales e faavae i luga o le manatu e faapea e le o lava mea’ai ma tupe maua.

O se matua mafaufauga faavalevalea lea (mo se tagata Samoa).” Ona toe aumai ai lea o tatou i tua i le mataupu na matou faaalia i le amata o lenei tusitusiga. E le o se mea malie ‘ea le faiga lea ua fusi mau ai e le malo mea uma lava e uiga i le lalolagi o le papalagi ae peitai, a pa’ia loa mataupu latou te le o fiafia i ai, ona faafuase’i lava lea ona mana’omia i latou i totonu o le vaaiga faa-Samoa? Ua le avea ‘ea lenei mea ma faamanatu ia i tatou e uiga i se alii ofisa lea na ia faaalia ai –e faapea o faiga pi’opi’o i Samoa nei ua na o ni pinati pe a faatusatusa i faiga pi’opi’o o loo tutupu i totonu o atunuu tetele? 

Ia –o le a la le tulaga tonu lava o le mativa i totonu o Samoa? E tusa ai ma le Palemia, o le mativa o loo faamaninoina o se tagata lea ua matua mativa lava ma ua latou feoa’i solo ua lē lavalavā “O i latou ia ua lē lavalavā i taimi uma,” o lana faaaliga lea. “Ua e silasila i se tagata faapena i totonu o Samoa? Afai o le tali o le leai, o lona uiga-e leai la se tasi o soifua i le mativa i totonu o Samoa. E leai foi se tasi o fesavalia’i solo i luga o ala tetele e lē lavalavā.”

Ae peitai- e le ona pau ai lena. “Ou te le’i faalogo i se tasi i totonu o Samoa ua maliu ona ua matua pa’e’e’e lava ona o le leai o ni mea’ai.” Ia, atonu ua tala fetaui foi lea.

Ae peita’i-e le o maliliu ‘ea o tatou tagata i lea itu ma lea itu ona o le leaga o mea’ai?  E le tusa ‘ea le leaga o le tino pa’e’e ma le mativa talu ai e taunuu ia mea e luai le oti? 

O le tulaga moni o loo i ai Samoa i aso nei e faapea o le toatele o tatou tagata ua matua matitiva lava ma o a latou aga tau taumafa ua matua uiga ese lava. O loo fafaga i latou i taumafa e aupito i sili ona taugofie ae matua afaina ai i latou.  

Mafaufau i ‘apa elenei taugofie ia o loo matua una’ia solo mo faalavelave, o nisi o ia mea e matua le talafeagai lava mo meaola ae o mea ia o loo faalagolago i ai le toatele o tatou tagata. Silasila i fagu inu suamalie a mea’ai e i ai le suka o loo una’ia sa’oloto i totonu o le atunuu.

O le laina taua lava o lenei: e ui lava i faaupuga a le Palemia ma lana pulega e uiga i le mativa, faiga pi’opi’o ma faafitauli, ae le o ni vale tagata o lenei atunuu.

E mafai ona latou vaaia le mea sa’o o i totonu o na faaupuga e leai se aoga ma faaupuga faa-polokiki. O le mea moni, e le mafai ona tatou faafitia le faapea o le mativa ma le mata’utia o mea faatiga-o mataupu ogaoga ia i totonu o Samoa.  O lea matou te talanoa atu e uiga i le mativa tau galuega, mativa i ala e maua ai tupe ma le mativa tau avanoa ia e amulī ona taunuu i le mativa o lou laualo. 

Ioe, afai e leai sau galuega e maua ai se tupe, e te ono taunuu i le fia’ai. O le a i’u foi ia matelaina lau fanau. O le laina autu lena. Ma o le pogai lea o le i ai o nei tagata i luga o ala tetele. O le latou vaai i lea tulaga o se ituaiga lea o galuega; ma e tusa ai ma le latou vaai-ona pau lava lea o le auala e mafai ai ona maua se tupe e ola ai. 

Faamata latou te tuua a’oga ma faafeagai ma le saua o le tulafono pe ana faapea latou te le o pagatia? Faamata e faateleina le numera poo le aofa’i o tagata e faatau atu oloa i luga o ala tetele i Samoa nei pe ana leai se mativa? Faamata e faateleina le talepe fale, gaoi, mataupu lautele ma soligatulafono-pe ana leai se mativa?

Tama’ita’i e ma alii, o taimi uma lava e fulitua ai lo latou malo i faiga pi’opi’o ma teena e leai se mativa, o le a faaauau pea ona tupe ma faateteleina nei mataupu. O le a faaauaupea ona sosolo le Solitulafono ma nisi solitulafono e sili atu. O le a avea lea tulaga ma lumana’i e faanoanoa ai. 

Ae peitai-ia ‘aua ne’i maumau lo tatou faamoemoe. E le tatau ona maumau lo tatou faamoemoe. O le Amiotonu lea ua aga’i mai. Se aso lelei e tasi, ioe, se aso lelei e tasi.

O le a sou taofi? Ia outou maua Samoa se Aso Faraile saogalemu ma ia faamanuia atu le Atua!

 

© Samoa Observer 2016

Developed by Samoa Observer in Apia