Savali tele i Tuana’imato e fa’afeiloa’i le Peresetene o le Ekalesia Asofitu

180 Hits

Ripotia e Deidre Fanene

Fa’aliliu e Maiava

Na matua tumutumu ma pisapisaō  ‘ele’ele o Tuana’imato i le afiafi o le Aso Lulu, i le anoano o sui o le Ekalesia Asofitu i Samoa, na ‘auai atu e fa’afeiloa’i lo latou Peresetene. 

O le savali tele lea i le malae-hoki, o se vaega o le polokalame sa fa’afeiloa’ia ai le Peresetene o le Fono Aoao a le Ekalesia Aso Fitu i le Lalolagi Aoao, le Faife’au Toea’ina o Ted Wilson ma lona faletua o Nancy.

I lana ulua’i saunoaga fa’afeiloa’i, na ta’ua ai e le Peresetene, o lea fa’aeaea fa’atasi ma fa’aaloaloga uma i aso e lua talu ona taunu’u mai, o se tulaga maualuga na’ua e le ma-fa’amatalaina. 

 “’Ese le tou ‘aulelei, matagofie tele ‘outou ma tou va’aiga mata’ina, e foliga ua tou sauna mo fe’au a Le Ali’i,” o lana saunoaga lea. 

“O lo’o ‘auai Le Atua ia tatou uma a’o tatou savavali ma soifua i aso ta’itasi o le ola nei, o lo’o tatou savavali i le pa’o o talipalau mai le lagi.

“Lea ua tatou va’aia nisi o talipalau mananaia tele o pa’o i lenei aso ma ua fa’aosofia ai lagona o le fia-‘auai i se savali aogā fa’apenei, talu ai, ua fesoasoani tele talipalau e ‘aumaia lagona o’o-o’o o le avea o lou tagata ma se tasi o vaega taua o lenei fa’amoemoe lelei.”

Na fa’amamafaina fo’i e Peresetene Wilson le mana’oga, ia fa’alatalata i Le Atua.

 “E fa’ananau pea Le Atua ia tatou feso’ota’i pea ma Ia i aso ta’itasi uma, e ala i A’oa’oga a le Tusi Pa’ia, o le Tatalo, o le talitonu ma fa’atuatua i Ana poloa’iga mo ‘Oe ma ia fa’alogo i Ana poloa’iga e ala i le musumusuga a le Agaga Pa’ia,” o lana saunoaga lea. 

Sa fa’amalosi’Au atu fo’i, ina ia fa’alogo pea i le leo o le Agaga Pa’ia e ta’ita’ia i latou. 

“O se mea-mata’ina tele ma fa’amanuiaina pe a fetalai atu le Agaga Pa’ia ia ‘Oe ina ia savavali to’alua ma le lagi ma ‘ou te talitonu, o le a outou fa’alogo pea i Lona si’ufofoga ma le pa’o o le talipalau mai le lagi,” o le tomatau atu lea a le Peresetene.

“Aua o lo’o fesoasoani pea Le Atua ia tatou uma, e aga’i atu i le manuia i le lagi a’o tatou iai i le soifuaga nei.  

 “O se fiafiaga a’o se fa’amanuiaga na’ua mo ma’ua, o’o mai i Samoa nei, e asia ma va’ava’ai Lana  ekalesia ua iai le agaga ma le musumusuga mai a le lagi. 

“A ‘ou te fa’amanatu atu ia ‘outou uma, ae maise o tupulaga talavou, ina ia manatua le aso lenei, e le na o se aso ua afifio mai ai e fa’aaloalo ma aloa’ia le ekalesia i le lalolagi, aua o la tou fa’amoemoe lena.

“Ua ‘outou fesoasoani ia ma’ua nei, e tatala ai le va’ai, o lo tou mamalu, o se vaega o le aiga o Le Atua i le lalolagi.”

Ina ua mae’a le savali fa’aaloalo tele, ona potopoto uma lea o sui o le Ekalesia Asofitu sa ‘auai, mo se sauniga sa faia i le Fale Ta’alo Numera 1 i Tuana’imato.

© Samoa Observer 2016

Developed by Samoa Observer in Apia