12 taule’ale’a molia mai Luatuanu’u

By Ilia L Likou 22 March 2018, 12:00AM

O lea le fa’amaoniga mai le aso ananafi e le So’oupu a le Matagaluega o Leoleo, Auapaau Logoitino i le aso ananafi.

E aofia ai lea fuanumera se matai e to’atasi.

O moliaga ua molia ai ia taulelea e aofia ai moliaga o le tauai ma’a ma amioaga le taupulea.

O le aso 24 o Aperila lea ua fuafua e valaau ai lea mataupu i luma o le faamasinoga.

O le saunoaga lenei a le Afioga i le Palemia, Susuga Tuilaepa Dr. Sailele Malielegaoi na faasalalauina tuusao i luga o le leitio a le 2AP (19 Mati 2018, 3:20pm) faapea nisi o ofisa faasalalau e faatatau lea i le afioaga o Luatuanuu ma le polokaina o le auala tele ua le mafai ai ona femalaga’i le mamalu o le atunuu.

O le taeao o le Aso Lua na fa’atino ai le fa’aleleiga o afioaga o Luatuanu’u, Lufilufi ma Falefa.

O se fa’aleleiga na saunoa ai le Pulenu’u o Falefa i a Fanualelei Purcell o lea le naunautaiga tele o le taumafai lea e fa’anofo filemu o  le atunu’u.

“Ia e pei o lea lava le fonotaga i lenei taeao, e lei faigofie ae na fa’afetai na sologa lelei mea uma.

“Lea ua uma ona solaupule o vaega uma aua le nofo lelei o tagata uma o si o matou nei itumalo.

O lea le agaga e tasi na fa’ailoa e le So’oupu ole Matagaluega a Leoleo i a Auapaau Filipo Logoitino.

“Fa’afetai tele i le  tapuaiga foi  a Samoa , o lea ua maea oa soalaupule afioaga e lua i le tausiga lava o le filemu.

“O  le agaga foi lena a le matagaluega lea e i ai o leoleo ina ia tausi pea le filemu ma faaoga foi le pulega mamalu a alii ma faipule e lagolago mai ai foi le galuega a le matagaluega e ui lava sa afatia foi nisi o le matagaluega ananafi ona o le galuega sa faatino, 

“Ae talitonu o lea ua taoto mai se taotoga lelei i lenei aso aua o lea ua maea feiloai ma afioaga ia o lea ua foi ua tu’uina mai le lagolago a le afioaga a le matagaluega e tusa ai ma le mataupu foi sa afatia ai le atunuu i aso e lua ua tuanai atu 

“O le taimi lenei o lo’o ua fa’agasolo pea su’esu’ega a le matagaluega i le  taimi lenei o le ala foi lena o lo matou toe o’o mai le afioaga i lenei taeao ina ia molimauina le faaleleiga sa faia foi ma le afioaga i Falefa ia ma tatalo i le afioaga ina ia fa’aoo atu nisi o lo’o ua masalomia lea ua uma ona faaoo mai ai le lisi ananafi mo i latou foi na aafia i lea mataupu i le afioaga 

“O le taimi lenei e ova atu ma le sefulu (lisi o tamaiti o lo’o ua ‘a’afia) tamaiti o le afioaga na ‘a’afia , ia e i ai se taule’ale’a sa avatu e leoleo ananafi , ma o le taule’ale’a lena lea na maua mai ai le lisi o i latou sa aafia i le mataupu.

“Ia o le taimi lenei o lea fuafua le matagaluega e fa’asolo atu lea faiga o su’esu’ega e le gata ii ae o le aga’i le amataga foi o le mataupu ma le mafuaga na tulai mai ai foi le feese’eseaiga 

E to’avalu leoleo sa ‘a’afia  ua toe tete’a uma i tua ananafi 

“O lea fuafua lava moliaga e tusa lava i molimau o lo’o ua toe silafia lava galuega fa’aleoleo e fuafua lava i luga i le maua o mau e faatino ai foi se moliaga ae o le tulaga lena i le taimi lenei o lo’o ua fa’agasolo su’esu’ega i le taimi lenei.

“E momoli atu pea le agaga faafetai , o le agaga lava ia a le matagaluega o le tu’ualalo ina ia maua pea le galulue so’otauau e pei ona silafia o le tulafono lava e va’ava’alua ma pulega mamalu a ali’i ma faipule. 

“O le agaga foi lena a le matagaluega e leai se agaga a le matagaluega e faaaoga se malosi po o se aupega foi.

“O le agaga a le matagaluega ia maua pea se nofo filemu i nuu ma afioaga e pei ona molimauina i lenei taeao i le saofaiga a afioaga e lua i lenei taeao e toe soalaupule le faafitauili sa tulai mai ia o lea ua tatou molimauina lea ua maua ai le filemu ma o lea ua  toe sologa lelei ma galuega o le matagaluega a leoleo ina ia mafai lea ona toe tuuina atu i latou sa faia lea gaioiga i le tulafono.

E pei ona ripotia atu ai muamua, o lo’o ua molia nisi o taulele’a o le afioaga o Luatuanu’u i se vevesiga  na tula’i mai i le Aso Gafua.

E fa’apea ripoti o lenei vevesi na mafua ona o se feese’eseaiga i le va o Falefa ma Luatuanu’u mai ta’aloga ma na fa’aiu i le poloka ai e nisi o taulele’a o Luatuanu’u le auala i ma’a.

Ina ua taunu’u atu malu ole malo ma taumafai e ave’ese ma’a mai luga o le auala aepeitai na lavevea nisi i ma’a  ina taua’i ane i a te’i latou.

Na fa’amaonia mai e le Komesina, Fuiavailili Egon Keil e fa’apea o lo’o ua i ai nei nisi o lo’o ua molia mai lea gaioiga.

E le’i mafai ona fa’ailoa mai pe to’afia ua ‘a’afia i le tulafono ona o lea mataupu e pei ona ua tula’i mai.

Na fa’ailoa e Fuiavailili o le po o le Aso Sa na amata ai ona poloka e nisi o le afio’aga le auala a le malo ma e lei mafai ona maua se fa’amatalaga aloaia mai sui o le afioaga.

I le saunoaga a le Afioga i le Alii Palemia, Susuga Tuilaepa Dr. Sa’ilele Malielegaoi na ia ta’ua ai le taua o le galulue fa’atasi o afioaga ma le malo i taimi e o’o ai fa’afiatuli i so’o se vaega o le atunu’u.

“Faatoa ou iloa nei i le taeao ina ua maua le telefoni mai Malu o le Malo, ua afaina nisi o Leoleo. Sa logo mai ua taofia e le autalavou foi poo taulelea i Luatuanuu ia le femalaga’i o tagata.

“O auala o auala o le Malo, ma soo se isi a na te faia le mea lea o le solitulafono, ma e tasi a le mea e oo i ai o le aumai e kaloka i Tafaigata. O amio nei e le’o ni amio e faia e ni fanau a tagata, o amio e faia e mo mea o ta’ifau ia ituaiga amio nei.

“O lea e feoa’i le mamalu o le atunuu, ae o ane taofiofi, o ane tauai; ia o uiga ia e le’o toe moomia i aso nei, ae mafua mai i mo mea o taaloga lakapi, o se mea faatauvaa tele. “Ai na faaoolima ai ia le au maimoa i taaloga sa fai i Saoluafata, i se tama taalo poo se tulaga faapena ou te le’i maua atoa le faamatalaga a Luatuanuu ia o lea la ua taui masui.

“O mea la faapenei, e te le alu a oe faaoo le sala i se isi o le mea na a le tulafono. “O le mea e tatau ona fai tuu mai pea i Leoleo o lea e faatino e Leoleo ia le latou tiute, ae le’o le ō ā o le autalavou lea poo le tinifu ma nisi o matai ona taofi fua lea o taavale feoa’i, ai o manatu poo o mai ai nisi mai ō, auā e aafia Falefa aafia ia Solosolo.

“O ituaiga mea la faapenei, o i tonu a afai na tupu i le Aso Toana’i; O fea o i ai matai o le afioaga lea o Luatuanuu? O fea o i ai? O fea o i ai le Seiuli ma le Luafalealo? O fea o i ai le Lauofo? O fea o i ai ia Lefulu, o Ifopo, Taua’ilefaiga? A o fea o i ai le Amo Mua a le Tuiatua? O fea o i ai? Ua leai ni tofā.

“E faapea na matuā fiu le Faifeau e taofiofi i le taeao nei, a ua le mafai a. Ua o mai pei ni tagata leaga ua saisai ia o latou mata, ia a lea e o atu Leoleo ae liliu mai i Leoleo e i ai fana na papa.

“Ou te fiafia ma ou te faamalo i le Komesina o Leoleo ma Leoleo na o atu. E i ai le taiala mo Leoleo, e puipui e latou le latou ola, ma o Leoleo nei o tamalii o le atunuu, o Samoa atoa lea e totonu o le force a Leoleo, ma o se isi a e tagofia Leoleo o lona uiga ua aliali mai ai le le migao; o tamalii, ma fanau o le atunuu lea e o atu e tausi le filemu.

“O lea la e o atu e taofiofi, ae liliu ane ma latou nei talavou faatasi ai ma matai ua faaoo lima i Leoleo. Ou te faafetai e le’i aapa Leoleo i a’upega, auā o loo i lalo o le tulafono e mafai a ona faaoga e Leoleo ia le a’upega.

‘O a latou mea ia na avifo o mo mea o meataalo, a oo loa ina papa fana ia a Leoleo, poo fea a le mea e te feosofa’i solo ai i le fale e ati atu a pulu ia, e matuā le malamalama ai a latou nei i le mata’utia o le mea lea latou te faia.

“Ou te tatalo ia o ane matai auā o lea o le a faagasolo galuega a Leoleo e taala’u uma mai latou nei, e le o atu foi Leoleo e o atu filemu o le a o atu a ma le a’upega e faatino ai le latou galuega.

Aisea? Leaga o lea e fai ma aga’i i tagata o le atunuu o lea e feoa’i i le auala tele. Ae ou te matuā ofo i nei matai; o le mea lea e mitamita ai le atunuu nei o matai latou te pulea ia nuu i le filemu, ma aoa’i fanau, ave i ai upu lelei. O fanau ia a tagata e fafaga i upu, a’o fanau a manu e fafaga i fuga o laau.

“O lea la na vaalaau atu ia le Minisita i le pulenuu e sau, o le galuega lea a le pulenuu. “O fea o i ai Sui o le Malo? “Ae foliga mai o le pulenuu le isi tagata tala pito sili ona pepelo lea e i ai totono o su’esu’ega a Leoleo.

“O le tiute la o Leoleo e su’e uma mai a latou nei, e oo a poo ai a matai e su’e uma mai a, ma o le a o i ai Leoleo e fai a latou su’esu’ega, ma o le a o uma i ai Leoleo e fai le su’esu’ega e le māmā i le malo ia ituaiga tagata faapenei auā a tuu fau e sosolo.

“E sosolo le ituaiga amio lea leaga o le toatele o latou ia e matamata i ata tifaga ia e sau mai fafo, ona faapea a lea o latou e faigofie le mea lea o le tausiga o le filemu. “O lea la ou te tatalo ia oo ifo le malamalama i a’i latou nei e ta’u o matai, e le faia o latou tiute.

“O lona uiga ua pule ai fanau, e le’o faia ni o latou tiute, e o ane e faafilemu a latou fanau o le a o atu Leoleo e saili uma a latou nei ma aumai i i le tulafono, e pau lea o le mea e tatau ona fai, ma aua nei faalavelaveina le galuega a Leoleo. “O la’u fautuaga na i a’i latou nei.

“Ma e, o le tulaga sa tatau ona i ai, sa tatau ona o ane ia matai e vaai taaloga nei. Ia o taaloga sa fai i Saoluafata. O fea matai o Saoluafata? Sa tatau ona o ane e leo le malae ia aua nei tupu se faafitauli.

“O ituaiga mea a ia o lea e tupu nei, e faatino taaloga a fanau ae tuulafoa’i fanau e pule a latou. Sa tatau ona i ai i ni matai mai Falefa, o ni matai ma Solosolo, afioaga uma ia o lea e aafia e latou te puipuia le filemu, aua le tuufaua fanau.

“A o lea la ua tupu mai, ona aga’i atu ai lea ina fai mea valea ia, o le ifo fua taofi ma feoaiga o taavale o le auala tele. O le solitulafono lena e le mafai, le mafai ona faamagaloina, leaga a le tata i lalo uiga ia e tupu pea, ona avatu ai lea o le tala i fafo ma avatu ai e faapea e nofonofo le Malo ae le faia se faiga i tagata nei.

“O le mea lena e matuā leai a ma se avanoa e toe tuu i a latou nei, leaga a tupu tele le mea lea, ona tula’i mai ai lea o le vevesi i le atunuu lenei, ma e le tuufaua matai nei o le a matuā saili uma mai e Malu o le Malo, e le moomia ni ituaiga uiga faapenei.

“O le tulaga o Luatuanuu, o le sala foi lea o lea e faasala ai ma Laulii, mea a lea o le tuufau o fanau ma o faamisa i totonu o taaloga, aemaise foi le aafia fua o e le’o taalo, le aumaimoa.

‘;O lea foi la na toe tagitagi mai, o lea ua fai si leva ona faasala ia Laulii, lea foi la e toe tagi tagi mai, e le mafai ona toe faia se au a Laulii; ona o tulaga a ia na tutupu mai e le toe faia foi ma se au a Luatuanuu.

“O le a tilotilo foi i isi polokalame ia a le Malo, aemaise o tagata e o i fafo i tulaga o galuega tauapu, e le tatau foi ona toe avea se tagata e to’atasi mai Luatuanuu. “E faapefea ona ave o lea e aliali mai i o ni fanau e amio faamaile.

“O le tulaga la lena o lea o le a oo ia Luatuanuu, e le gata la o lakapi, e le toe i ai se latou au lakapi e talia e le Iuni, ae o le a oo foi i fanau e ono ave i fafo i mea nei o polokalame a le Malo, e le mafai foi ona toe avea.

“O le a ou tilotilo foi i isi polokalame, i le tulaga lava e faasino i le afioaga lenei o Luatuanuu.

“O le mea lea na tupu o lea foi e aafia ai ma Falefa o le a tilotilo i ai le Komiti auā e tatau foi ona faasala ma Falefa i le mea lea i le fasiga o le tamaitiiti lea i Saoluafata.

“A’o le mea lea e tatau ona fautuaina matua, e le faapitoa la i i leaga o lakapi ia e fai o lea e faaalu polokalame o lakapi i totonu o afioaga, ma afai e le mafai e matai o le nuu ona auai e faafilemu ia tama ta’aalo, ia o le mea a e tatau ona fai o le aua nei toe o mai e ta’aalo, leaga e leiloa ta’aalo ia aemaise foi o le omai e le’o ni tagata, e le’o i ai ni matai e i ai ni tofā e pulea ia amio a fanau.

“Ae o le mea foi ou te ofo ai, o le fiu o faifeau e taofiofi a lea a e le amanaia faifeau, o lona uiga o nei aiga uma e totonu o Luatuanuu, o lona uiga na ona o i le lotu ae faapaupau uiga.

“O le tulaga lena ua tauā ai le tatou talanoa, na o le pau la’u fautuaga aua nei tou faalavelave i le galuega a Leoleo; e le lelei le taunuuga, ma e le’o ni agelu foi ia Leoleo o la e o atu e faatino le latou galuega.

“Ave foi le fautuaga ia to’a pea le tai, i afioaga ia o Solosolo faapena foi ma Falefa, ia paū pea le samala i le ulu o le fao. O latou a ia e fai i ai su’esu’ega a Leoleo o lea, e mafua ai le faavevesi atunuu ia e tatau ā ona aga’i i ai ia le tulafono.

“O le faafetai atu lena i le tou o mai foi i lenei itula o le aoauli e fia maua se tulaga tonu o i ai, ia ma le galuega a Leoleo o loo fai i ai. O Leoleo o le latou tiute lea, na tauto e faatino le latou galuega o le puipuia lea o le filemu, ae e le’o le o atu o Leoleo e fai le latou galuega ae o ane osofa’i, e le’o ni agelu foi Leoleo.

 

“La e i ai le latou aia tatau, e puipuia ai e latou latou lava, ia aua nei aafia i ni tulaga e osofa’ia ai latou. Ma o le fofo o nei mea uma aua le fai mea tuulafoa’i alii ma faipule i le taimi e faatino ai taaloga a latou fanau, o ane e tapua’i ma o ane e fai le upu lelei i fanau ia taalo faatausala.

“A e tilotilo atu i taaloga ia i fafo o le a lava le mea e oo i ai, e toe fofo alamea a; auā o aso nei o aso o le malamalama. Ua ota faapea ua i ai le malamalama i nisi o nuu nei, a lea ou te vaai atu e matuā pogisa a.

“O le tautalaga lena e tusa ai o le faalavelave, ae faamalo foi i le tapuaiga a Samoa i ona tulaga faalupe, le au fai tatalo ma tupu ma e’e o Samoa i le latou faafofoga mai, ia o mea a ia e tutupu i le soifua, a faatamala ai le Malo, leaga o aso nei ua sosolo mai a faiga ia faafafo, e le tatau ona faatamala foi Leoleo i le faatinoga o latou tiute.

“Talosia ia ia oo ifo ia le agaga lelei i a’i latou o le afioaga o Luatuanuu, ia ma galulue faatasi ma Malu o le Malo ina ia aua ne’i toe tupu mai se mea faapenei i le lumana’i.

By Ilia L Likou 22 March 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>