Taunu’u le miti a se ali’i-talavou a’o soifua pea

Tusia Ilia L Likou ma Maiava ,

176 Hits

KI ORA AOTEAROA: Le ali’i o Sinaumea(ogatotonu) ma ona matua o Vaiala ma Arieta ma ona tuafafine o Hetta ma Luisa i le Malae Va’alele i Faleolo.

KI ORA AOTEAROA: Le ali’i o Sinaumea(ogatotonu) ma ona matua o Vaiala ma Arieta ma ona tuafafine o Hetta ma Luisa i le Malae Va’alele i Faleolo.

Ua tu’ua nei Samoa i se malaga le-‘aumaua, e si ali’i-talavou lea e manatu foma’i e le silia i le 20 tausaga e soifua ai, ona o se gasegase faigata o lo’o maua ai.

E fa’afetaia ai se ulugali’i o Samaria Agalelei e le manana’o e fa’alauiloa o la suafa, ona o le a muta ai le popole ma le atuatuvale o si ali’i o Sinaumea Sofara, 18 tausaga mai Salepoua’e i Sale’imoa.

E aupito sili ona taua, ona o le agalelei o Samaria Agalelei nei, ua foa’ina ai le silia i le luasefulu-afe tala ($20,000.00) mo le malaga a Sinaumea, o ona matua o Vaiala ma Arieta ma ona tuafafine e to’alua, o Hetta ma Luisa, o le a maua ai le avanoa le-‘aumaua i Niu Sila mo le isi tolu vaiaso o muamua.

O lea malaga ua mae’a ona totogi atoa, o le a maua ai se avanoa e mafuta ai ma aiga ma uo, ma asiasi ai fo’i le Fale o Manu i Aukilani, se tasi o nofoaga ua leva o moemiti iai Sinaumea. 

“Leva ona ‘ou fia o’o e va’ai ia Niu Sila, ua tele tala ua fa’alogo iai,” o lana fa’amatalaga lea i le Samoa Observer, i le Malae Va’alele i Faleolo ma ‘ata’ata fiafia ma le pepa-malaga i ona a’ao.

 “Leva na ‘ou moemiti e fia alu i Niu Sila. O le aso la lenei ua taunu’u ai la’u miti. ‘Ou te fia o’o lava i le Zoo ma fia ‘ai fo’i ia McDonalds. Fa’afetai i Le Atua.” 

O le ali’i o Sinaumea e faigata tele le gasegase o lo’o maua ai. O se tulaga e seasea a’afia ai nisi ma e tasi mai le 3,600 tama (1:3600) e mimigi maso ma fa’aletonu ai lava ma i’u ina vave uma ai le soifua a’o laiti pea. 

E to’alua isi uso o Sinaumea ua maliliu ai i le fa’ama’i lava lenei. 

Na maliliu fa’atoa ta’i-sefulufitu o la tausaga. O lo’o taumatea fo’i e foma’i, e aulia lava le 20 tausaga e Sinaumea, ae le sili atu. 

Na o loimata o le fiafia na va’aia i ona matua i le po o le Aso Sa, a’o le’i ulufale le ‘aloa i le va’alele – Virgin Samoa mo le malaga i Aukilani.  

 “E le’i fa’agaloina e Le Atua Sinaumea,” o le tagi-talatala lea a si ona tama o Vaiala.

“Ua tali Le Atua i tatalo a Sinaumea ma ua Ia ‘aumai lenei avanoa mo matou e asiasi ai i Niu Sila. ‘Ou te momoli atu ai le fa’afetai tele i le Loto Taumafai ae maise lava, o Samaria Agalelei.  

“Na o lo’u fia iloa o o latou nei e momoli atu iai la’u fa’afetai, ui i lea, o lo’o silafia e Le Atua i latou agalelei ia.”

Na fa’aalia fo’i e le Pule o le Loto Taumafai, o Lagi Natanielu lona fiafia tele ona o le Aiga o Sofara.

“Ia Vi’ia pea Le Atua ona o nei Samaria Agalelei,” o lana fa’aaliga lea. “O ‘upu lava o le Salamo e 23 o lo’o fa’apea mai… ua e fa’au’uina lo’u ulu i le suau’u ma ua taumasuasua la’u ipu.

 “’Ou te fia momoli fo’i le fa’afetai tele ona o le lagolago mai o le matou Ofisa Sili, o Leta’a Defou mo  fanau e le-atoatoa le malosi fa’apea e uma sa lagolago mai. E fai lava le mea matou te mafai ae fa’alagolago pea i Le Atua e fesoasoani mai e fa’atino mea uma.”

Na ta’ua fo’i e se tasi o sui mai le Loto Taumafai, e iai lava mana’oga fa’apitoa o Sinaumea. 

“O le tausaga ua mavae na fai ai i lona tina, ua fia va’ai lava i le tuagane o lona tina o lo’o i Niu Sila. E lua aso e va ai, na matou asiasi ai i le aiga lea talu ai, o le matou galuega lea o le asiasi i tua e fa’alelei nofo-fa’ata’avalevale ma fai ana fa’amalositino masani. 

 “I le matou malaga lena, e iai le isi ali’i sa matou malaga fa’atasi, ae na fa’alogo loa i si aiga lea ma le mana’o o Sinaumea, fesili loa iai e ta’u mai le atunu’u o le lalolagi e fia alu iai.

“Na fesili ia Sinaumea pe fia alu i Disneyland ae tali Sinaumea ‘po’o fea le ga mea?”

“Mulimuli ane musumusu iai Sinaumea, e fia alu i Niu Sila fa’atasi ma ona matua ma ona tuafafine e to’alua, e va’ai le uso o lona tama.” 

Na toe fo’i mai lava le ulugali’i lea mai Ausetalia ma fa’atino loa le la folafolaga ia Sinaumea.  “E atoa i le Aso 8 o Aperila le 19 tausaga o Sinaumea, a’o iai i Niu Sila. O se tala i le agalelei o tagata e alolofa mo isi o puapuagatia.”

© Samoa Observer 2016

Developed by Samoa Observer in Apia