Tuai galuega o le Malumalu 13 miliona tala
Ripotia e Ilia L. Likou
Fa’aliliu e Maiava
Na fa’amautu mai e le Failautusi Aoao o le Ekalesia aupito to’atele i Samoa nei, le Faife’au o Dr. Afereti Uili e fa’apea, e tatau ona mae’a le fausia o le Malumalu o le Iupeli i Malua, lea e 13 miliona tala lona tau, i se taimi o lenei tausaga.
E le o mautinoa e le Failautusi, le taimi tonu e mae’a ai lea galuega.
“Ua silafia fo’i, e le o se fale mo se aiga e mafai ona fai nei ae fuafua e mae’a a-taeao,” o lana fa’aaliga lea i le Samoa Observer. “O le tasi lenei galuega tele o lo’o feagai ma le ekalesia ma e mo’omia e kamuta le lava o se taimi e silasila toto’a ai i le fa’atinoga lelei o vaega uma aua le saogalemu o le galuega o le Iupeli.”
O saunoaga ia a Afereti e tali ai nisi o fesili sa tu’uina atu e le Samoa Observer, e uiga i le gasologa o lea poloketi tele. Ae sa ia te’ena nisi o tu’ua’iga fa’apea e mafua le tuai, ona o tulaga tau-seleni.
O le poloketi lea – na amataina i le 2014, sa ulua’i fuafua e fitu miliona tala ($7 miliona) lona tau atoa.
O le taimi lena na fuafua ai, e tatau ona tatala lea galuega i le tausaga talu ai.
Peita’i, e le’i taunu’u ia fuafuaga.
A ua ripotia i le taimi nei, ua o’o i le sefulutolu- miliona tala ($13 miliona) le tau o lea poloketi.
O le tausaga talu ai, na fa’amaonia ai e le Ta’ita’ifono o le Komiti o Tupe a le Ekalesia, o Le Mamea Ropati Mualia, se nonoga-tupe e sefululima-miliona tala ($15 miliona tala) a le EFKS mai le NPF e fa’amae’a ai lea galuega ma isi atina’e o lo’o fa’agasolo a le Ekalesia.
“O le 15 miliona tala lea e le gata e fa’amae’a ai le fausia o le Malumalu o le Iupeli, ae fa’atupe ai fo’i isi atina’e a le Ekalesia,” o le saunoaga lea a Le Mamea i lea taimi ma fa’aopopo mai, o lo’o galulue malosi pea e fuafua lelei ma fa’atonutonu le fa’aaogaina o tupe a le ekalesia.
O ananafi ina ua o’o atu i le lotoa i Malua, e leai se tasi na maua iai i le galuega.
Leai se ‘aufaialuega, leai fo’i nisi i le fale sa nonofo ai le ‘au-kamuta ma latou e fesoasoani.
Vagana le vao ua tetele ua lilofia ai le vaega o le fa’avae o le malumalu.
Ui na saunoa mai le Susuga a Afereti, o lo’o fa’aauau pea galuega i le taimi nei.
“O lo’o matou fa’atali i le tau mulimuli o mea-faufale mai le kamupani o lo’o faia le galuega,” o lana saunoaga lea.
“O mea-faufale ia e aofia ai ‘apa, o vaega mo le fola pito i lalo, o sitepu ma isi… ma o lo’o iai le fa’amoemoe, ia mae’a mea uma ia i nai aso o muamua.”
Ae na ta’ua e Afereti, i le taimi nei, o lo’o galulue inisinia ma kamuta mo le fa’amautuina o vaega uma o le fale, ina ia fa’amalieina vaega mo’omia uma e pei o le saogalemu ma le malosi.
Na māua fo’i e le Samoa Observer, sa taofia galuega o le poloketi lenei, i le fa’ai’uga o le tausaga talu ai.
I le amataga o le 2016, na faia ai fa’asalalau a le Ekalesia mo le sa’ilia o se “Tagata Fa’apitoa mo Galuega”, aua lava le poloketi lenei.
“O le Tagata Fa’apitoa mo Galuega, o se tasi e asiasia ma siaki galuega fa’atino ma va’aia le fa’atinoina lelei o galuega e fua i le soifua lelei ma le saogalemu mo’omia,” o se vaega lea o lea fa’asalalauga.
“Afai o e mo’omia se galuega e fealua’i ma tele le gaioi, e lelei i le faia o tonu ma fo’ia fa’afitauli atoa ai ma le lelei o le va’ai i mea-lelei, atonu o lau susuga lena o lo’o sa’ilia nei e le ekalesia.”
E le o mautinoa i le taimi nei, pe ua tofia se tasi i lenei avanoa.
I le tausaga e 2014, na ta’ua ai e le Failautusi Aoao a le Ekalesia i lena taimi, le Faife’au o Iutisone Salevao, e ono kamupani faiFale sa fa’aalia lo latou naunau mo le fausia o le Malumalu o le Iupeli.
Na tu’uina atu lea galuega i le Kamupani a le Shanghi Construction.
E le’i saofaga fo’i se talanoaga ma lea kamupani e o’o mai i le aso ananafi.