Mana’omia e Sanelivi le suavai

By Deidre Tautua-Fanene 22 February 2018, 12:00AM

E ova ma le 30 tausaga talu ona nofo pologa le aiga o Sanelivi Fuamaila mai le afioaga o Satapuala ma lenei mala o le leai o se suavai.

Ae o le itu e sili ona leaga ai ona o lea foi e feagai lea tama ma mafatiaga o le tino.

“Sa ou pa’ū mai luga o le ulu i le 10 tausaga talu ai ma o lesi vaega atoa o lo’u tino e le mafai ona gaioi lelei.

“O le avega mamafa e tau amo i aso uma le savali e asu vai mai i le tane vai a le malo o lo’o i le a’ai.

“E fai lava si mamao o le nofoaga o lo’o i ai le tane vai ma le nofoaga lea ou te nofo ai.

“E leai se suavai e o’o mai i le nofoaga lea matou te iai, e pei o le mafuaaga lea e matou te fa’aalagolago tele ai i le tane vai a le nuu.

“Ana fa’apea e lelei le sau a le vai, e leai ma se itu e fa’apopoleina ai.

“Ana fa’apea fo’i o lo’o sologa lelei le tala i le seleni, semanu e fa’apenei ua leva ona fa’atau mai se tane vai ina ia ea ai le pologa o lo’o tauamo nei.

“E le lelei le tamaoaiga o le matou aiga, ma e le mafai ona totogiina se taavale e lau mai ai vai o le mafuaaga lea ua loto ai lava e savali tusa lava po’o le a le faigata.”

Sa ta’ua e Vaimaila e fa’alua ona alu e la’u mai vai o le taeao ma le afiafi.

“Afai e to’atasi e alu e la’u mai vai e fa’alua ona alu lana savaliga.

“E muamua lava ona ta’eele fa’atoa fa’atumu ai lea o paelo vai e la’u mai.”

Sa talosagaina e Vaimaila le malo ina ia silasila ane i le pologa o lo’o i ai nei aiga o lo’o nonof i uta i Satapuala.

E leai se aiga o Vaimaila ua faia, ae sa ia ta’ua o se olaga faigata lava o lo’o ola ai.

“E o’o i le taualuga o le fale o lo’o kava uma i pepa ma atigipusa e tali ai le timu i le sao mai i totnu o le fale .

“E o’o i le moli e le saogalemu ae ua pau lava o se mea ua mafai ona fai ina ia malu ai.

 “”E liki le taualuga o le fale e o’o fo’i i le fola o le fale ua tauau ina malepe.

“O lenei vaitai o tupe lava mea uma, ae na o lona atalii o lo’o faigaluega e $100 lona totogi e maua.”

Pau lona naunautaiga o se moli uila ma se leitiō e fa’alogologo ai, ae peita’i ua na se miti ia te ia nei manaoga.

“Fia maua se leitio e faalogologo ai i le tala o le tau ma mea o lo’o tutupu i Samoa nei.”

Afai e te fia fesoasoani i a Vaimaila faafesootai le numera 7614958.

By Deidre Tautua-Fanene 22 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>