Fai sou aoga mo lou Aiga

Tusia Seia Soloi ,

130 Hits

Tala Taamilo

Tala Taamilo

Faigata le soifuaga, ae o le mea taua ia mafia ona e faia se auaunaga mo lou aiga mo nei ma le lumanai

O le Tina ia Tala Taamilo, 41-yausaga le matua mai Tufulele o lo’o nonofo nei i le aiga o lona toalua, ma lana fanau e toalua ae o lo’o aumau nei I Siamani aua le suega manuia mo i latou i le lumanai.

“O lo’u toalua e faigaluega i le Yazaki Samoa, ma nisi o tagata o le aigam o i latou la ia o lo’o faamoemo iai le tausaiga o le aiga i mea fai tupe pe a fai”

“E gafatia i le totogi a lo’u toalua le tausiga o le aiga, aua ua leai se faau aoga iinei sa faafaigata ai, pau mea o lo’o moomia ai le seleni o faalavelave faale aiga, ma le ola lava mo aso uma ma mea fai so’o”

 E talitonu Tala ua tele le suiga o le olaga ma luitau ua ia maitauina e tauau ina faavaivaia ai le galue ai o le tagata mo le tausiaga o lona aiga:

“E leai se tatou mea e mafia ona fai, aua o le olaga lava ia e faapena, e alu lava i luma aua e le mafia ona tatou ‘aloese mai ai tusa po o lea le taugata o lo’o iai”

O le galuega a le tina ia Tala i aso uma, o le nofo fale ma faifeau masani o le aiga, o nisi o taimi ua faaaoga lona taimi mo se galuega i le faatoaga, aua se meaai o lea aso ma lea aso

O mea fai i totonu o Nuu ma le Ekalesia, o vaega ia e alu iai le tele o tupe a Tala ma lona aiga;

“Ua masani ai lava o tatou tagata, aua na fai mai foi e o tatou matua ua mavae atu, ma o lo’o faaauau pea e oo mai lava i le taimi nei”

Na ia faaalia, e faigofie mea uma i totonu o aiga pe a tofu sao uma iai tagata o le aiga, aua o le tele o lima e mama ai se avega, ma iai sou aoga mo lou aiga.

“Toatele nisi o tupulaga i lenei vaitaimi ua leai ni galuega, ae a faaoga tatau lea malosi mo feau fai a le aiga, ua lava lea ma totoe, o le manuia foi lea mo ia ma lona lumanai”

O lana feau foi lea mo le atunuu lautele-

“Fai sou aoga mo lou aiga, ma tausi ai matua, aua o lou manuaia a ia e maua mai I lou lava aiga moni”

© Samoa Observer 2016

Developed by Samoa Observer in Apia