O aiga e ola fiafia

Tusia Ilia L Likou ,

81 Hits

Matoiala Fa’alava’au o le afio’aga o Si’ufaga Falelatai ma Mulifanua.

Matoiala Fa’alava’au o le afio’aga o Si’ufaga Falelatai ma Mulifanua.

O le aso ananafi na maua ai le fa’atalatalanoaga a le Fofoga o Samoa ma le tamā i a Matoiala Fa’alava’au o le afio’aga o Si’ufaga Falelatai ma Mulifanua.

“Ia e ta’u sa’o atu lava i le taimi lenei le mafatia o lo’o ua feagai nei ma si o matou aiga,” o lana saunoaga mai lea.

“O a’u o se tamā ma e to’atasi si o ma atali’i ma le tinā o le aiga.

O a mai totonu o si o’u aiga?

“Ia o le olaga masani lava o lo’o ua i ai le taimi lenei, e tigā lava ona faigata le tulaga o lo’o ua i ai le soifuaga, ae o le finau lava ma tu’u i ai le loto atoa ina ia mafai ona atia’e aiga.

 “E mo le silafia, o le taimi lenei o lo’o ua matua’i fa’alagolago lava si o matou aiga i le sami aua le tausiga i aso uma aemaise o sina tupe fa’asili.

 “O nisi o taimi a fa’atau atu le tele o vaega nei, ia e tusa ma le $200 le tupe e maua, ia pe ā lelei lava fa’atau o le aso.

“A laititi lava e tusa pe na’o le $150 se tupe e maua, ae mo le silafia ai, ia o le tele lava o vaega e fa’aaoga ai i taimi uma e mo le tausia ai lea o le aiga.

“E le gata i lea ia o pili o le suavai, o le eletise ia ma le tele lava o mau fa’alavelave fa’ale-aiga i aso uma e pei ona ua tatou masani ai lava.

 “Ia o le tele fo’i o taimi e maua lava nai laki, pe a mana’omia mai nai oka o kula i’a mai nisi o lo’o alala i atunu’u mamao.

“E tusa ma le $300 i le $400 ia e mafai ona ou fa’atauina atu ai.

Na ia ta’ua i le Fofoga o Samoa o le taimi lenei e to’atasi lava le tagata o lo’o faigaluega o lo latou aiga e to’asefulu tasi.

“O le to’atele lava ia e pei e pulupululima fa’atasi mo le galueaina o le ma’umaga.

 “Ia ae mo le taimi lenei ia  o lo’o tau va’ava’ai lava i se galuega ina ia mafai ona fesoasoani ai i si o matou aiga i aso uma.

“Aemaise ai lava le tulaga o le to’atele o i matou o lo’o nonofo fa’atasi.

 “Ia o le taimi fo’i lenei i lo’u iloa i ai, ia o le taumafai lava e fa’aaoga tatau tupe pe a o’o le taimi e maua ai.

 “O so’o se galuega lava e fa’atinoina, ia e maua ai lava nai tupe aua le tau fa’asoasoaina mo nai aiga.

 “O le mea taua o lo’o o’u fa’ananau ai mo si o’u aiga, ia maua le fiafia i aso uma, o a lava mea ua i o matou lima o le itu pito sili lea ona lelei.

 “Ia o lo’o o’u iloa lava e a’u, ia  e le mafai ona fa’atauina e tupe le fiafia, ae o le nonofo fa’atasi ma fealofani e manuia ai mea uma.

 “O le tupe e aoga, ae sili aiga e nonofo ma fiafia fa’atasi i taimi uma.

© Samoa Observer 2016

Developed by Samoa Observer in Apia