To’avalu tamaiti-a’oga ua molia

22 February 2016, 12:00AM

Ripotia e Deidre Fanene

Fa’aliliu e Maiava

 

Ua amata le tausaga fa’aleA’oa’oga,  ua toe aliali mai ai fo’i foliga mataga o misa ma fusu’aga ma fe’ese’esea’iga a tamaiti-a’oga i nofoaga faitele i le taulaga e ui i le tele o taumafaiga a pule-a’oga o aso nei ma tausaga ua mavae, e tau fo’ia lea fa’afitauli.

E to’avalu tamaiti-a’o’oga mai Kolisi e lua a le malo, o Leififi ma Avele ua molia nei i le fa’amisa i nofoaga faitele ma ua fuafua e tula’i i le Fa’amasinoga i le Aso 23 o le masina nei.  

Na fa’amanino mai e le Ofisa mo le Va-i-fafo a Leoleo, o Su’a Muliaga Tiumalu, o tamaiti ua molia nei, sa a’afia i se misa i le va o a’oga nei e lua i le Aso Gafua ma le Aso Lua talu ai. 

“O le taimi nei o lo’o fa’agasolo pea su’esu’ega e fia iloa pe iai nisi tamaiti sa a’afia ai ma tau sa’ili fo’i pe o le a le mafuaga o ia vesiga i le va o kolisi nei e lua,” o lana fa’aaliga lea.

 “Ua maea ona su’esu’eina tamaiti o a’oga nei ma e to’alima e mai Leififi ma le to’atolu mai le Kolisi o Avele lea sa taofia e Leoleo.

“Ua tatala uma i tua i se tu’utu’uga e tatau ona ripoti mai ma saini i le Ofisa o Leoleo i Aso Faraile uma se’ia o’o i le Aso 23 o le masina.”

Na ta’ua e Su’a, o le vaega e 43 o le Tulafono o Soligatulafono 2013, o lo’o ta’ua ai, o le taunu’uga o le fa’atupu misa i nofoaga faitele, e o’o atu i le tasi le tausaga i le falepuipui.

O tamaiti-a’oga o lo’o a’afia i lea fa’amasinoga, e i le va o le 14 ma le 18 tausaga le matutua.

22 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>