Manatu o le Fa’atonu - A o le Alofa lava ma le Agalelei o Le Atua…

167 Hits

Tusia - Marj Moore

Fa’aliliu e Maiava

 

O le muagagana na afua mai i le alaga a John Bradford i le seneturi lona 16 e fa’apea: “La lea John Bradford, o le Alofa Agalelei lava o Le Atua,” e fa’atatau i se vaega o pagota na tata’i atu o le a fasiotia. 

Peita’i, na o si tama’i suiga lava i le “Ao le Alofa lava ma le Agalelei o Le Atua, tatou te mamuia ai”, e pipi’i iai lagona ma mafaufauga ina ua fa’alogo i le afa-vaega 5 lea ua maua ripoti ua matua a’afia ai ma fa’aleagaina maota ma laoa ma le atunu’u atoa, o Tonga ma Fiti.

Ua malamalama lelei i lagona fa’aleTagata e o’o mai i taimi faigata fa’apea, e momomo ai le agaga ma manatu alofa i nai motu-tua’oi, ui o se mapusaga ma se fa’aolatotoga, ona ua le palasi tonu mai ia fa’aletonu ia Samoa.

Ae le fa’apea la o tatou pogisa ai i a’afiaga fa’aleNatura i lenei vaitau o le tausaga aua mo tatou lava ia, o se to’omaga tele ma se fa’amama-avega mo tatou uma, ona o le a mae’a atu vaitau o afa, ae le’i afaina lava soifua o le atunu’u nei.  

Mo le to’atele o tatou sa matua a’afia i le afa o Evani i le 2012, lea na matou lailai ai si o tatou nei tama’i atunu’u, o lo’o tumau pea ma lagona tiga mai lea taimi, a’o ta’afili le atunu’u e toe faufau maota ma laoa, ae maise le toe totogia o le tele o tupe na fa’aalu i le toe fa’aleleia o mea sa fa’aleagaina. 

I tua atu teisi i talafa’asolopito o le atunu’u nei, e matua tele lava a’oa’oga aoga na maua ina ua ma’ea le afa o le 1889 i Apia, lea na tonu ai i tama-sasa’o mai Siamani, Amerika ma Peretania e nonofo pea i le uafu ae le sosola-‘ese i le sami-laolao a’o osofa’ia e matagi e o’o i le 160 kilomita i le itula le atunu’u. 

Mo tatou i Samoa nei ma isi atunu’u o le lalolagi, ua fa’ateleina pea lesona aoga ua tatou maua mai ia mala-fa’aNatura, ui ua tele soifua ua ma’umau ai i sunami e una’ia e mafui’e, ae maise fo’i le fa’atauaina o le faia o fa’ailoilo ma lapata’iga e fa’ailoa ai i tagata-nu’u uma.

Ua ‘ave fo’i le fa’amuamua i le faia o ‘auala mai nofoaga tu-matafaga e aga’i ai i nofoaga maualuluga e maua ai le saogalemu lautele.  

I lenei lava aso, a’o tatou sagisagi fa’amanuao ma savini fa’apuna-o-manu i le alofa o lo tatou Matai, e lagona ma le alofa nai o tatou tuafafine ma uso o i Tonga ma Fiti.

Moni atonu o le to’atele o lo’o saogalemu i le taimi nei, ao le to’atele lava ua leai ni o latou lafitaga, leai ni fale ma ni nofoaga e mapu ma saogalemu iai ae maise le to’atele ua leai ni meatotino, ae maise la o taumafa mo le soifua maloloina lelei.  

Mo nai uso ma tuafafine mai Fiti o lo’o i Samoa nei, o lo’o fa’atalitali ma le popole ni tala mai aiga ma uo, e fa’alototeteleina ai ma fiafia, e le o afaina i le afa mata’utia na afaina ai ananafi.

A o se taimi le mautonu fo’i i le to’atele o matua ma aiga Samoa o lo’o nonofo ai i Fiti ae maise le to’atele o fanau-a’o’oga i le Iunivesete o le Pasefika i Saute. 

E ui fo’i i le sipa-so’o e le tatou Palemia o Tuila’epa Sa’ilele Malielegaoi o le ta’ita’i o Bainimara, ae talitonu lava, o taimi fa’apenei e tu’u’ese ai ia fe’ese’esea’iga ai fa’aloaloa atu a’ao-agalelei o malo uma o lenei itulagi, ma ofoina atu se fa’amafanafanaga, se fesoasoani a’o le fa’amalosi’au e le gata o seleni ae so’o se mea e gafatia e fesoasoani ai i o tatou uso-a-Pasefika o feagai ma puapuaga i lenei vaitau o le soifuaga. Aua o le mea moni lava lea e ta’ua so’o, O FAIGA MA AGA FA’APASEFIKA.

© Samoa Observer 2016

Developed by Samoa Observer in Apia