O LA’U TALA FO’I

135 Hits

1. Matauina i Tala Fou se ulutala fai mai ua faamaonia- e leai se mea e sala ai le Peresetene o le Toomaga mo e Puapuagatia!

O lea la ulutala e faasino i se faaiuga a le Alii Faamasino o Vaepule Vaemoa Vaai i le anoano o moliaga e faasaga ia Siliniu Lina Chang -ae le o faapena lea faaiuga i isi o itu tete’e o lea mataupu. Fai mai na molia Siliniu i lona taumafai e faalavelave i le taualumaga o le amiotonu-faatasi ai ma le Superintendent o Sala’a Sale Sala’a-ma isi o le aufaigaluega a le Toomaga e pei o Tumua Luafalealo ma Elaine Elena Ulia Faiga.

O moliaga tau solitulafono e faasaga ia Mrs. Faiga i le 2013-na faaleaogaina-ina ua tuua e le itu tagi -o Susan Stowers le atunuu! Ia- o se tala fou umi lenei-ae o le aoaoga ua tatou maua ai- o soo se mataupu lava faapenei-e tatau lava ona ave i le Faamasinoga-e fai i ai le amiotonu ma le faamasinoga e tusa ai ma le Faavae o le Malo Tutoatasi o Samoa! O moomooga la o le loto- maumau e pe ana faapea- o le faiga foi lea o loo fai i mataupu uma lava faapenei!

A tatou tilotilo nei la i faiga pi’opi’o a le faigamalo lea na maumau ai le faitau miliona ma miliona o tupe a le atunuu-ae leai se mea o faia i ai-ae uma ona faamaonia lelei e le Pule ma Su’etusi Sili ma le Komiti Filifilia a Alii Ofisa o le Palemene-ae o lea lava e taofiofi e le o mafai ona tuuina atu e fai i ai le amiotonu ma le faamasinoga.

O le fesili la ua tulai mai-“O ai e mafai ona molia i le Faamasinoga ona o ni faiga pi’opi’o-ae o ai e le mafai ona molia i le Faamasinoga? A toe faamalamalama atili-“o ai e luga a’e o le tulafono-ae o ai e i lalo ifo o le tulafono?

A tatou tilotilo la i faiga pi’opi’o a le Malo-sa aofia ai foi ma taupulepulega leaga a le aufaigaluega a le Malo! O le a la le pogai o le ave o isi mataupu i  le faamasinoga ae le mafai ona ave isi? A toe tuu atu la i ai ma le fesili poo anafea na amata mai ai nei faiga pi’opi’o-o le tali-na amata mai lava i le taimi na faatoa tulai mai ai le faigamalo o loo i ai nei!

O afea la e ono mafai ai ona fai le amiotonu i nei faiga pi’opi’o? Afai o falepuipui tagata o le atunuu i le gaoi o le $20-a faapefea la lenei faitau miliona ma miliona? Faamata la e mafai ona fai le amiotonu i nei faiga pi’opi’o pe a toe tulai mai foi le HRPP e faafoe le Malo? O le a sou taofi? 

2. Matauina foi se tasi o tulaga fou ua tupu mai le atunuu i lenei taimi-i le va o sui faatutu mo le Faiga-Palota Lautele o loo loma nei. O lea tulaga fou-o le molia lea e le tasi sui o le isi sui i le faamasinoga-e lu’i ai ma faamaonia lona tulaga agavaa e tauva ai i le faiga-palota –e ala i le fai o le tautua mo le tolu tausaga! A tatou tilotilo la i lea tulaga-e ala ona fai le tautua-ona o le fia agavaa e avea ai ma sui tauva mo le faiga-palota!

A tatou tilotilo la i le aganuu moni a Samoa e uiga i le Tautua-e le o se mea e fai mo na o le 3 tausaga-ae o le mea e fai i le olaga atoa-ae le mafai lava ona mautinoa ai pe matai pe leai. Afai la o se mea faale-aganuu le tautua-aisea ua aumai ai e le faigamalo- e fai ma pa-pupuni mo isi tagata e fia tauva i le Palota! O se mea a le HRPP poo se mea a le atunuu? O ai la na te faamaonia lena tautua? E faamaonia e le aiga o loo tautua i ai pe faamaonia e le Malo?

Tatou te pepese i taimi uma i le faa-temokalasi-ae tausolomua lava le faigamalo ona faalavelave ma fiapule i aia tatau a tagata Samoa na soifua mai ma i latou! O le faiga sa sau a’i-sa filifili e nuu ma itumalo o latou lava sui faatutu-ae o lea foi ua fao ese talu ai lava nei mea o faiga-vaega faa-upufai! Afai la o le tulaga lea o le a alu ai-o le a faapefea ona toe malu measina a le atunuu? O le a sou taofi? 

Matauina foi i Tala Fou o lea foi ua toe saini e le Palemia se isi foa’i tupe mai le Iuni a Europa e $16.2 miliona mo le Suavai ma isi fuafuaga tau le Suavai. O le matau la i lenei foa’i-o se tupe tele-ma e ofo le loto pe afai e le mafai ona fo’ia ai le tele o isi faafitauli tau le suavai o loo i ai nei.

I le taimi nei pe a fua i le umi o le taimi talu ona tutoatasi Samoa-faamasino mai lava oe Samoa-ae o le talitonuga-e lei taitai lava ona o’o le tulaga tau le suavai o Samoa i se tulaga lelei ma le faatuatuaina! Afai la e moni lea- e lua lava mafuaga e pogai ai. Muamua- e le o faaaogaina atoatoa ia tupe mo le faamoemoe na aumai ai.

O lona lua-o le fai o ia galuega e ni tagata latou te le iloa ona fai! O le uiga la o le faamatalaga-o le maumau o tupe i tagata sese-ae latou te le iloa ona faatino galuega i se tulaga lelei- e tusa ai ma le faamoemoe na aumai ai! Afai la o lea le tulaga-o le fesili la- o ai e pogai ai? O le a sou taofi?

© Samoa Observer 2016

Developed by Samoa Observer in Apia