E manuia fanau pe ā lelei matua

Tusia Sarafina Sanerivi ma Ilia L Likou ,

134 Hits

Fuaifale Apulu, Faleasi’u, 69 le matua o le soifua o Faleasi’u  Uta.

Fuaifale Apulu, Faleasi’u, 69 le matua o le soifua o Faleasi’u Uta.

E talitonu le to’atele o le  atunu’u o le lumana’i manuia o fanau e afua mai i le lelei ona fa’afaileleina mai totonu o aiga.

“O lea fo’i lo’u ia talitonuga”  Fuaifale Apulu, Faleasi’u, 69 le matua o le soifua o Faleasi’u Uta.

I le fa’atalatalanoaga a Fuaifale ma le Fofoga o Samoa i le aso ananafi  na  fa’ailoa ai e le tinā le mataifaioi lea e asoa  fa’atasi e matua aemaise le lagolagosua a aiga aemaise o le ekalesia.

“Ia e mo le silafia ai o a’u o le tinā ua fai la’u  fanau o nisi o lo’o i atunu’u mamao ae o nisi fo’i ia lea o lo’o i lo matou aiga i le taimi lenei.

“E pei ona i ai lenei taeao , e pei o lea lo’u ia iloa i ai le taimi lenei ma o se tulaga e ao lava  ona silasila i ai le taimi lenei mo le lelei alu i luma o le atunu’u.

“Aua o fanau o le lumana’i lea o atunu’u, aiga ma le Galuega a le Atua.

“O la’u ia  fautuaga i la’u ia fanau, a outou fia ola lelei i se olaga sa’oloto ma le manuia ia outou savali ma le loto maualalo i taimi uma ma ia matata’u i le Atua.

“O le uiga la o la’u tala e le gata ina ave le lu’i i fanau ae ia va’ai mai fanau o lo’o solomua matua ona savavali ai ma o se tulaga lea e ao ona silafia.

“E pei o lea le uiga o la’u tala, o totonu lava o aiga e amata ai olaga a le fanau.

“Afai e fafaga i le fa’amaualuga ma le fa’asausili o lea lava le ala o le a savali ai, afai e fafaga i le alofa ma le fa’amaoni ma le lotomaualalo e atagia lava i so’o se mea e alu i ai lo latou ola.

Sa ia fa’amanatu ‘ o le tala a le manu e fafaga i upu ma tala ae o le tama a le manu e fafaga i fua o la’au’.

“O lea le olaga na o matou ola mai ai, e fasi matou i upu ma tala, e leai se mea e fa’aletonu aua e mautinoa e maini le patua pe a le usita’i. “Ae o lenei olaga ua tatou i ai, ia ua le toe saogalemu lava, ua oso fanau i matua, o sina fautuaga lava oso fanau i le pule i le ola. “Ae pei o lea le tulaga taua o le galuega a matua, ia fafau a’o laititi le tamaititi, e talitonu mai o a fa’afitauli e o’o i ai.

“E le tau fesiligia le toe fo’i i le lelei sa amata mai ai totonu o aiga.

“A lelei matua e manuia fanau, a manuia fanau o se atunu’u manuia Samoa i  le lumana’i.

© Samoa Observer 2016

Developed by Samoa Observer in Apia