Le-mautonu i le lumana’i o pisinisi

208 Hits

Fonotoe Vaefa Lauofo, Saikoke Lauofo and Katalina Suilaulau Luamanuvae Gaugau Mateo ma lona toalua Salafai Ah Tong.

Fonotoe Vaefa Lauofo, Saikoke Lauofo and Katalina Suilaulau Luamanuvae Gaugau Mateo ma lona toalua Salafai Ah Tong.

Ripotia e Lanuola Tusani Tupufia

Fa’aliliu e Maiava 

 

Ua le-mautonu nei le silia i le luaselau faiPisinisi laiti - na a’afia i le mu na liu-efuefu ai le Maketi i Savalalo i le Aso To’ona’i talu ai – i le lumana’i o a latou pisinisi ui o lo’o tumau pea lo latou fa’amoemoe. 

O le lagona lautele lava lea na fa’aalia e nisi o faiPisinisi na afaina, ina ua mae’a la latou fono sa faia i le aso ananafi.

O le fonotaga lea sa faia i le Maketi i Vaitele, sa feiloa’i ai le ‘au-faipisinisi laiti ma le Ofisa Sili o le Fa’alapotopotoga mo ‘Ele’ele a Samoa, o Peseta Afoa Tiotio, lea na fa’amalosi’Au atu iai, o lo’o silasila le malo i le taimi nei, i se faiga lelei e fesoasoani ai mo le toe amataina o a latou pisinisi.   

E latalata i le 300 pisinisi-laiti, o fale’aiga ma faleoloa na liu-efuefu atoa i le Aso To’ona’i talu ai, ina ua fa’atama’ia e se mu. O se taunu’uga fa’anoanoa lea, e silia i le 200 i latou e ana pisinisi nei, ua leai se mea o totoe. Talu ai o le vaiaso fou e toe amatalia ai a’oga a fanau, o le to’atele ua matua popole ma fememea’i ona o le lumana’i fanau ma aiga.

O le amataga o le vaiaso nei, na saunoa ai le Ali’i Palemia, Tuila’epa Sa’ilele Malielegaoi e fa’apea, o lo’o silasila le malo i ‘auala talafeagai ‘ese’ese e fesoasoani ai i le lumana’i o pisinisi laiti nei na afaina i le afi.” 

O ananafi na fa’ailoa ai e Peseta, o se vaega o lea fuafuaga e aofia ai le fa’atuina o se flea-maketi le-mautu i le taimi nei ma e tatau ona mae’a ona tapena i le vaiaso fou.

Ae mo fesoasoani tau-seleni, na ta’ua: “E le’i fai i le taimi nei se fa’ai’uga a le Kapeneta i lea tulaga ae o lo’o fono i le taeao nei (ananafi) i le mata’upu lena.

 “Ae o lo’o iai fo’i isi maketi o lo’o avanoa e tatau ona fa’aaoga, pei o le maketi i Vaitele, le Maketi a Amau ma Ah Liki ma isi o lo’o i le taulaga.” 

O Leulua’iali’i Rosemary Va’a’ulu, le Peresetene o le Sosaiete a le AufaiPisinisi Laiti i le Maketi i Savalalo, sa fai ma sui o faipisinisi uma ma ta’ua ai, o le mea aupito mo’omia lava i le taimi nei, o se seleni e toe amataina ai pisinisi nei talu ai, o le tele o a latou oloa na fa’aleagaina atoa.

“Sa fa’ailoa lava o matou popolega na ia Peseta ma ua fa’amautu mai fo’i le silafia lelei e le malo o le tulaga lea,” o le fa’aaliga lea a Leulua’iali’i. “E fa’afetaia ai lava le tali-vave mai o le malo. Lea matou te iloa o lo’o avanoa isi maketi. O nisi o matou ua naunau iai ia ma fia vave fa’aaoga le avanoa lea.” 

Na talia aloa’ia e faiPisinisi nei le fuafuaga a le  Malo. Na ta’ua e Fauali’i Pokati Apineru, e leai lava se afaina o fesoasoani a le malo ae ‘auala mai fa’aNonoga-tupe. 

“Pau lava le mea o lo’o mana’o ai, o se mea e toe amata ai la’u pisinisi tusa lava pe o se nonoga-tupe,” o le fa’aaliga lea a Fauali’i.

“O le mea pito sili ona leaga o le tupu tonu o le fa’alavelave i le taimi o le a toe fo’i ai le to’atele o tagata mai fafo aua o le taimi lea e tele ai a matou fa’atau. O le tele o tupe e maua e fa’aalu i le fa’ateleina o oloa e fa’atau atu. O le taimi nei, ua matua leai se mea o totoe. 

Na ta’ua e le isi faiPisinisi o Simolo Masele e fa’apea, na mu uma ana oloa ma le-aoga ma ua matua leai se mea o totoe, leai fo’i se tupe e fa’atau ai mea mo lana pisinisi elei.

Ae mo Emi Belfor-Mata’u, na le fiafia i le fautuaga na tu’uina atu, o lo’o avanoa le Maketi i Vaitele e fa’aaoga. “Silasila atu iai, e leai ni mea e maua ai – pei o se solofagua ua make,” o le fa’aaliga lea a le tina e lua ana poloka-pisinisi sa iai i le Maketi i Savalalo.

 “E sili mamao ia a’u Savalalo aua o le nofoaga e iai uma pisinisi ma talafeagai mo tagata mai so’o se tulimanu o Upolu. E leai se isi e fia fai-pisinisi i se nofoaga gaogao-i’i pei o Vaitele.” 

Na laga fo’i e nisi ni fa’asea a tagata faiFaleoloa, pe fa’apefea ona fa’atau a latou oloa i se nofoaga ta’alaelae le-tumau ma leai ni fata ma ni pusa’aisa. 

O Luamanuvae Gaugau Mateo ma lona to’alua o Salafai Ah Tong, sa iai lo la faleoloa i le Maketi i Savalalo.

Na ia fa’afetaia le fesoasoani mai le malo ma ta’ua ai, po’o le a lava le lagolago e tu’uina atu, a o le mea taua lava, o le maua lea o se fesoasoani mo latou uma e ana pisinisi ua fa’aleagaina. 

Na ia fa’ailoa mai fo’i, sa tofu sao uma le ‘aufai-pisinisi i le Maketi i Savalalo mo le totogiina o a latou avanoa sa iai ma e tatau fo’i la ona iai ni tapenaga i le maketi le-tumau o le a fai, mo vaega fai-faleoloa. 

Na fa’aopopo mai lona faletua, pau lava lea o le mana’o, ia fa’aauau le pisinisi – o le fia afe o aiga o lo’o fa’alagolago i pisinisi nei, e ao fo’i ona fa’amalieina o latou mana’oga ma fa’aauau pea. 

 “A silasila lelei iai, o le Maketi i Savalalo o le nofoaga lea sa tumutumu iai aiga e vaivai le tamaoaiga, ona e taugofie oloa e maua ai,” o le fa’aaliga lea a Salafai. “E fa’atau atu a latou oloa i ni tau e taugofie, o meataulima e o’o i lavalava-a’oga o fanau e su’i ai. E taua ai tele le fa’aauau o pisinisi uma nei.

Na fa’aalia fo’i e le isi faiPisinisi o Muliau Isa Hosea e fa’apea, e manaia le manatu e fai se maketi le-tumau i le taimi nei ui e iai fo’i nai vaivaiga.

“O le a leai a la se ‘ese’esega mai le mea sa masani ai i luma o Eveni, e amo ‘ato-pa’u e tumu i oloa i oloa ‘ese’ese, e amo mai toe amo atu pe a mae’a galuega i aso uma,” o le fa’aaliga lea a Muliau.

A tatala le maketi le-tumau i le vaiaso fou, o le a tele fesili e fesiligia ai e le ‘Aufai-Fale’aiga pei o Lilomaiava Fana, pe o le a fa’apefea ona fa’avela mea-taumafa i se nofoaga fa’apea.

“’Ou te iloa o matou tagata ia o le a fesiligia le tulaga lea,” o le fa’aaliga lea a Lilomaiava.

“O le tapena o taumafa e tatau ona ia mea masani pei o ogaumu, o ipu ma ia mautinoa fo’i ia o-gatasi le gaseseina o taumafa ma ta’iala ma tulafono a le Soifua Maloloina.

“O le ituaiga pisinisi lea matou te faia, e ao lava ona mata’itu lelei tulaga o le soifua maloloina ma o le fa’afitauli tele lava mo matou, ona e le fa’atagaina i le maketi i Fugalei ma isi, ni fale’aiga e faia ai…pau le mea e mafai ona matou fai, o le tapena o taumafa mai o matou aiga ma ‘aumai i le maketi le-tumau lea.”   

Ae atonu o le tasi o fa’afitauli tele o feagai ma le ‘aufaiPisinisi Laiti nei, ona o le to’atele o latou nei, e fa’alagolago i a latou pisinisi ia, le fa’atupeina o a’oga a fanau.

Na ta’ua e Vaiasa Sam Ling, o se tama e to’atolu le fanau e fa’apea, o lona popolega tele lava lea i le taimi nei. 

O se tasi o ona afafine e a’oga i le Kolisi o Fa’atuatua ma o le pili i le kuata e tasi, e $600.00. Na fa’aaliga e lea tama, o lana pisinisi lava lea sa maua ai se tupe e totogi ai pili-a’oga uma o lana fanau. 

© Samoa Observer 2016

Developed by Samoa Observer in Apia